Ganeshotsav 2023 : गणेशोत्सवासाठी राज्य महामार्ग वाहतूक पोलिसांची बैठक, प्रवासमार्गात सुविधा केंद्र उपलब्ध करुन देण्याचा निर्णय
Ganeshotsav 2023 : आगामी गणेश उत्सवाबाबत राज्य महामार्ग वाहतूक पोलिसांनी मंगळवारी विविध विभागांच्या अधिकाऱ्यांची बैठक घेतली. गणेशोत्सवादरम्यान महामार्गावर काय करता येईल आणि कोणत्या उपाययोजना कराव्यात याबाबत बैठकीत चर्चा झाली.
मुंबई : आगामी गणेश उत्सवाबाबत (Ganeshotsav 2023) राज्य महामार्ग वाहतूक पोलिसांनी (State Highway Traffic Police) मंगळवारी (5 सप्टेंबर) विविध विभागांच्या अधिकाऱ्यांची बैठक घेतली. या बैठकीला एमएसआरडीसी (MSRDC), पीडब्ल्यूडी (PWD), राष्ट्रीय महामार्ग प्राधिकरण (NHAI) आणि जिल्हा पोलीस अधिकारी उपस्थित होते. गणेशोत्सवादरम्यान महामार्गावर काय करता येईल आणि कोणत्या उपाययोजना कराव्यात याबाबत बैठकीत चर्चा झाली. विविध ठिकाणी सुविधा केंद्र तयार केले जातील, जिथे माता आपल्या मुलांना आहार देऊ शकतील, वैद्यकीय मदत आणि इतर मूलभूत सुविधा उपलब्ध करुन दिल्या जातील, तसेच कोणतीही दुर्घटना टाळण्यासाठी अंधार असलेल्या ठिकाणी दिवे आणि सूचना फलक लावले जातील, असा निर्णयही बैठकीत घेण्यात आला.
वाहनचालकांसाठी कॉरिडॉर उपलब्ध करुन देण्यासाठी प्रयत्न
याबाबत महाराष्ट्राच्या वाहतूक विभागाचे अप्पर पोलीस महासंचालक रवींद्र सिंगल यांनी या बैठकीविषयी माहिती दिली. गणेशोत्सव हा सण साजरा करण्यासाठी मोठ्या संख्येने मुंबईकर कोकणातील आपल्या मूळगावी जातात. या आठवड्यापासून चाकरमानी गावी जाण्यास सुरुवात करतील. वाहनचालकांसाठी एक कॉरिडॉर उपलब्ध करुन देण्यासाठी सर्व प्रयत्न प्रशासनाकडून केले जाणार आहेत.
कोकणात जाणाऱ्या बसचे मार्ग, उपाययोजनांची माहिती सोशल मीडियावर मिळणार
या बैठकीला एमएसआरटीसीचे अधिकारीही उपस्थित होते. कारण सणासुदीत कोकणात बसद्वारे प्रवास करणाऱ्यांची संख्या मोठी असते. या बसेसचे मार्ग कसे असतील आणि त्यावर काय उपाययोजना कराव्या लागतील यावर बैठकीत चर्चा झाली. महामार्ग पोलीस त्यांच्या सोशल मीडिया प्लॅटफॉर्मवर सतत अपडेट्स पोस्ट करतील. तसेच त्यांनी भाविक आणि वाहनधारकांना वाहने चालवताना सर्व खबरदारीच्या उपाययोजना करण्याचे आवाहन केले आहे.
गणेशोत्सवासाठी कोकणात एसटीच्या 3100 जादा बसेस धावणार
यंदा गणपती बाप्पांचं 19 सप्टेंबर 2023 रोजी आगमन होत असून बाप्पाच्या स्वागतासाठी एसटी महामंडळ देखील सज्ज झालं आहे. गणेशोत्सव आणि कोकणाचं अनोखं नातं आहे. गणेशोत्सव (Ganeshotsav 2023) काळात कोकणात जाणाऱ्या गाड्या फुल्ल असतात, अशातच एसटी (ST Bus) महामंडळाने गणेशोत्सवासाठी कोकणात जाणाऱ्यांना खुशखबर दिली आहे. कोकणातील चाकरमान्यांचा अत्यंत जिव्हाळ्याचा सण असलेल्या गणपती उत्सवासाठी एसटी महामंडळाने यंदा 14 सप्टेंबर ते 19 सप्टेंबर दरम्यान 3,100 जादा एसटी गाड्या सोडण्याचा निर्णय घेतला आहे.
Ganeshotsav And Traffic : गणेशोत्सव अन् वाहतुकीच्या समस्या; पोलिसांच्या राज्यस्तरीय बैठकीत काय झालं?
हेही वाचा
महत्त्वाच्या बातम्या
