Shivsena: मुंबईत शिंदे गटाची पहिलीच शाखा सुरू होणार, मानखुर्दमध्ये आज उद्घाटन
Shivsena : शिंदे गटातील खासदार राहुल शेवाळे हे मुंबईत शिंदे गटाची पहिली शाखा सुरू करणार आहेत. शनिवारी शिंदे गटाच्या शाखेचे उद्घाटन होणार आहे.
Shivsena : शिवसेनेत अभूतपूर्व बंड झाल्यानंतर आता शिंदे गटाने (Eknath Shinde Group ) भाजपशी हातमिळवणी करत राज्यात सत्ता स्थापन केली. त्यानंतर आता शिंदे गट आपली शाखा सुरू करणार आहे. आज सकाळी मुंबईत शिंदे गटाची पहिली शाखा स्थापन (Shinde Group Shivsena Branch in Mumbai) होणार आहे. शिवसेनेचे बंडखोर खासदार राहुल शेवाळे (MP Rahul Shewale) यांच्या मतदारसंघातील मानखुर्दमध्ये ही शाखा सुरू होणार आहे. आगामी मुंबई महापालिका निवडणुकीसाठी शिंदे गटानेही तयारी सुरू केली असल्याचे हे चिन्हं असल्याचे म्हटले जात आहे. आज सकाळी 11.30 वाजता शिंदे गटाच्या शाखेचे उद्घाटन होणार आहे.
शिंदे गटाकडून शिवसेना ताब्यात घेण्याचा प्रयत्न सुरू असल्याचा आरोप करण्यात येत आहे. आम्हीच शिवसेना पक्ष असल्याचे सांगत शिंदे गटाने केंद्रीय निवडणूक आयोगाकडे धाव घेतली आहे. तर, दुसरीकडे शिंदे गटाकडून दादरमध्ये प्रति शिवसेना भवन उभारले जाणार असल्याची चर्चा सुरू आहे. मध्यवर्ती ठिकाणी कार्यालय असावे असा तर्क यासाठी शिंदे गटाकडून देण्यात आला. त्यानंतर आता शिंदे गटाकडून शाखा सुरू करण्यात येत आहेत. शनिवारी, 13 ऑगस्ट रोजी मानखुर्दमध्ये बंडखोर खासदार राहुल शेवाळे यांच्याकडून मुंबईत शिंदे गटाची पहिली शाखा सुरू करण्यात येत आहे.
पक्षातील फुटीनंतर शिवसेनेसाठी आगामी मुंबई महापालिकेची निवडणूक अतिशय महत्त्व ठरणार आहे. तर, दुसरीकडे या निवडणुकीत उद्धव ठाकरे यांच्या नेतृत्वातील शिवसेनेच्या ताब्यातील मुंबई महापालिका आपल्याकडे खेचण्यासाठी भाजपने कंबर कसली आहे. राज्यातील शिवसेनेच्या 40 आमदारांनी शिंदे गटात प्रवेश केला आहे. यामध्ये मुंबईतील पाच आमदारांचा आणि एका खासदाराचा समावेश आहे.
शिवसेनेतील बंडखोरीनंतर मुंबईतील शाखांना भेट देण्यास आदित्य ठाकरे यांनी सुरुवात केली. त्याशिवाय, पक्ष प्रमुख उद्धव ठाकरे यांनीदेखील काही शाखांना भेटी दिल्या. स्थानिक पातळीवर कार्यकर्त्यांना कार्यक्रम या शाखांच्या माध्यमातून दिले जाते. त्यामुळे शिवसेनेच्या संघटनात्मक बांधणीत शाखांचे महत्त्व मोठे आहे. अशातच आता, शिंदे गटानेही मुंबईत शाखा सुरू करण्याचा निर्णय घेतला आहे. या शाखांना कसा प्रतिसाद मिळतो, मुंबई महापालिका निवडणुकीत याला कसा प्रतिसाद मिळतो हे आगामी काळात स्पष्ट होणार आहे.
इतर महत्त्वाच्या बातम्या:
महत्त्वाच्या बातम्या
