पेईंग गेस्ट मुलींचे छुप्या कॅमेऱ्याने शूटिंग, घरमालकाला अटक

घरमालकाच्या वागण्याचा मुलींना संशय आला आणि त्यांनी घरात बसवलेल्या अॅडप्टरविषयी शोध सुरु केला. गूगलवर या अॅडप्टरबद्दल माहिती गोळा करताना त्यामध्ये कॅमेरा असल्याचं उघड झालं.

मुंबई : पेईंग गेस्ट मुलींचे छुप्या कॅमेऱ्याच्या मदतीनं चोरुन शूटिंग करण्याचा प्रकार समोर आला आहे. मुंबईतील गिरगाव परिसरात हा धक्कादायक प्रकार उघड झाला आहे. याप्रकरणी डी. बी. पोलिसांनी घरमालकाला अटक केली आहे.

वैद्यकीय शिक्षण घेणाऱ्या तीन विद्यार्थीनी जून महिन्यापासूस गिरगावात पेईंग गेस्ट म्हणून राहत होत्या. मात्र घरमालकाने घरातील अॅडप्टरमध्ये असलेल्या कॅमेऱ्याच्या मदतीने मुलींचे संभाषण आणि चित्रीकरण रेकॉर्ड करत होता. मुलांनी अॅडप्टरवर काही दिवसांपूर्वी पडदा लावला होता.

मात्र अॅडप्टरला पडदा लावल्याने सिग्नल मिळत नसल्याचं सांगून घरमालकाने मुलींना तो हटवण्यास भाग पाडलं. मात्र घरमालकाच्या अशा वागण्याचा मुलींना संशय आला आणि त्यांनी घरात बसवलेल्या अॅडप्टरविषयी शोध सुरु केला. गूगलवर या अॅडप्टरबद्दल माहिती गोळा करताना त्यामध्ये कॅमेरा असल्याचं उघड झालं.

सगळा प्रकार लक्षात आल्यानंतर मुलींनी थेट पोलीस स्टेशन गाठलं आणि सर्व प्रकाराची पोलिसात तक्रार केली. मुलींच्या तक्रारीवरुन पोलिसांनी घरमालकाला अटक करुन विनयभंग व माहिती तंत्रज्ञान गैरवापर प्रतिबंध कायद्यांतर्गत गुन्हा दाखल केला आहे.

अॅडॅप्टरमधील छुप्या कॅमेऱ्यातील व्हिडीओ त्याच्या मोबाईलमध्ये दिसत असल्याचं समोर आलं आहे. त्यानुसार पोलिसांनी घरमालकाचा मोबाईल जप्त केला आहे. याप्रकरणी आरोपीला जामिन मिळाल्याची माहिती पोलिसांनी दिली.