Mumbai Local Mega Block : मध्य रेल्वे आणि हार्बर मार्गावर रविवारी मेगा ब्लॉक, एक्स्प्रेस गाड्यांचेही डायव्हर्शन

मध्य (Central Railway), पश्चिम (Western Railway) आणि हार्बरच्या (Harbor Railway) लोकल वाहतुकीवर परिणाम होणार आहे. त्याचप्रमाणे मेल/एक्स्प्रेस गाड्यांचे डायव्हर्शन करण्यात आले आहे.

local mega block

Mumbai Local Mega Block :  मुंबईकरांसाठी (Mumbai) महत्त्वाची बातमी आहे.  रविवारी, 21 ऑगस्ट रोजी उपनगरीय रेल्वे मार्गांवर मेगाब्लॉक (Mumbai Local Mega Block) आहे. त्यामुळे विकेंडला लोकलनं (Mumbai Local) प्रवास करणार असाल तर रेल्वेचं बदललेलं वेळापत्रक जाणूनच प्रवास करा. रुळांच्या दुरुस्तीच्या कामासाठी आणि सिग्नल यंत्रणेतील कामासाठी हा मेगाब्लॉक घेण्यात येणार आहे. त्याचा मध्य (Central Railway), पश्चिम (Western Railway) आणि हार्बरच्या (Harbor Railway) लोकल वाहतुकीवर परिणाम होणार आहे. त्याचप्रमाणे मेल/एक्स्प्रेस गाड्यांचे डायव्हर्शन करण्यात आले आहे. त्यामुळे मुंबईकरांनो रविवारी घराबाहेर पडणार असाल आणि लोकलनं प्रवास करण्याचा विचार करत असाल, तर मेगाब्लॉकबाबत सविस्तर माहिती जाणून घ्या. 

मध्य रेल्वे - 
मध्य रेल्वे, मुंबई विभागाचा  शनिवार आणि रविवार रात्री विविध अभियांत्रिकी आणि देखभालीची कामे करण्यासाठी आपल्या उपनगरीय विभागांवर मेगा ब्लॉक घेण्यात आला आहे.  

भायखळा - माटुंगा अप आणि डाउन जलद मार्गावर दि. 20.8.2022 च्या रात्री 11.30 ते 21.8.2022 च्या पहाटे 4.30 पर्यंत जलद मार्गावर मेगाब्लॉक घेण्यात आला आहे. तर दि. 21.8.2022 रोजी सकाळी 12.40 ते 05.40 पर्यंत डाउन जलद मार्गावर ब्लॉक आहे.

 रविवारी छत्रपती शिवाजी महाराज टर्मिनस येथून सकाळी 05.20 वाजता  सुटणारी डाउन जलद मार्गावरील लोकल भायखळा आणि माटुंगा दरम्यानच्या धीम्या मार्गावर वळवण्यात येईल आणि ती नियोजित थांब्यांवर थांबून  गंतव्यस्थानी 10 मिनिटे उशिरा पोहोचेल.

ठाणे येथून दि. शनिवारी रात्री 10.58 आणि 11.15 वाजता सुटणाऱ्या अप जलद मार्गावरील सेवा माटुंगा आणि भायखळा दरम्यान अप धीम्या मार्गावर वळवण्यात येतील, त्यांच्या नियोजित थांब्यांनुसार थांबतील आणि निर्धारित वेळेच्या 10 मिनिटे उशिराने गंतव्यस्थानी पोहोचतील.

 मेल/एक्स्प्रेस गाड्यांचे डायव्हर्शन

12051 छत्रपती शिवाजी महाराज टर्मिनस -मडगाव जनशताब्दी एक्स्प्रेस भायखळा आणि माटुंगा स्थानकांदरम्यान धीम्या मार्गावर वळवण्यात येईल. दादर प्लॅटफॉर्म क्रमांक एक येथे या गाडीला दुहेरी थांबा दिला जाईल आणि रोहा येथे 10 ते 15 मिनिटे उशिराने पोहोचेल.

11058 अमृतसर- छत्रपती शिवाजी महाराज टर्मिनस  एक्सप्रेस, 11020 भुवनेश्वर- छत्रपती शिवाजी महाराज टर्मिनस  कोणार्क एक्सप्रेस आणि 12810  हावडा- छत्रपती शिवाजी महाराज टर्मिनस नागपूर मार्गे मेल, माटुंगा आणि भायखळा स्थानकांदरम्यान अप धीम्या मार्गावर वळवण्यात येतील. या गाड्यांना दादर प्लॅटफॉर्म क्रमांक 3 वर दोनदा  थांबा दिला जाईल आणि गंतव्यस्थानी 10 ते 15 मिनिटे  उशीराने पोहोचेल.   

हार्बर मार्ग -

 छत्रपती शिवाजी महाराज टर्मिनस - चुनाभट्टी/वांद्रे डाउन हार्बर मार्गावर सकाळी 11.40 ते सायंकाळी 4.40 पर्यंत आणि चुनाभट्टी/वांद्रे- छत्रपती शिवाजी महाराज टर्मिनस अप हार्बर मार्गावर सकाळी 11.10 ते सायंकाळी 4.10 पर्यंत छत्रपती शिवाजी महाराज टर्मिनस मुंबई/वडाळा रोड येथून सकाळी 11.16 ते सायंकाळी  4.47 या वेळेत वाशी/बेलापूर/पनवेल करीता सुटणाऱ्या डाउन हार्बर मार्गावरील सेवा आणि छत्रपती शिवाजी महाराज टर्मिनस मुंबई येथून सकाळी 10.48 ते सायंकाळी 4.43 वाजेपर्यंत वांद्रे/गोरेगाव करीता सुटणाऱ्या डाउन हार्बर मार्गावरील सेवा रद्द राहतील.

पनवेल/बेलापूर/वाशी येथून सकाळी 9.53 ते दुपारी 3.20 पर्यंत छत्रपती शिवाजी महाराज टर्मिनस मुंबई करीता सुटणाऱ्या अप हार्बर मार्गावरील सेवा आणि गोरेगाव/वांद्रे येथून सकाळी 10.45 ते सायंकाळी 5.13 पर्यंत छत्रपती शिवाजी महाराज टर्मिनस मुंबईसाठी सुटणाऱ्या अप हार्बर मार्गावरील सेवा रद्द राहतील.

 ब्लॉक कालावधीत पनवेल - कुर्ला (प्लॅटफॉर्म क्र. 8) विभागात विशेष लोकल अंदाजे 20 मिनिटांच्या वारंवारतेने धावतील.

 हार्बर मार्गावरील प्रवाशांना ब्लॉक कालावधीत सकाळी 10.00 ते सायंकाळी 6.00 वाजेपर्यंत मेन लाइन आणि पश्चिम रेल्वेवरून प्रवास करण्याची परवानगी असेल.