Mahalaxmi Race Course : महालक्ष्मी रेसकोर्सवरील थीम पार्कचा मार्ग मोकळा
थीम पार्कसाठी 120 एकर तर टर्फ क्लबला 91 एकर जागेचे वाटप होईल. मात्र, ही मुंबईकरांच्या हक्काची जागा असल्याचा दावा माजी नगरसेवक मकरंद नार्वेकर यांनी केला आहे.
मुंबई : दक्षिण मुंबईचं फुफ्फुस म्हणून ओळख असणाऱ्या आणि कोट्यवधी रुपयांची किंमत असणाऱ्या महालक्ष्मी रेसकोर्सवर (Mahalaxmi Race Course) थीम पार्क उभारण्याचा मार्ग मोकळा झाला आहे. त्यामुळे, रेसकोर्सच्या भाडेतत्त्वाचे नूतनीकरण करून 226 पैकी 120 एकर जागेवर थीम पार्क उभारता येणार आहे, असं असलं तरी यावरून आरोपांची घोडदौड मात्र जोरात सुरू झालीय. त्यातच आदित्य ठाकरे यांच्या मतदारसघात हे रेसकोर्स येत असल्याने त्याला राजकीय वादाचीही किनार आहे..
रॉयल वेस्टर्न इंडिया टर्फ क्लब (RWITC) ची काल यासंदर्भात आॅनलाइन बैठक पार पडली. या बैठकीत 1800 सदस्यांपैकी 708 सदस्य उपस्थित होते. ज्यातील 540 सदस्यांनी पुनर्विकास प्रस्तावाच्या बाजूने मतदान केले, तर 168 सदस्यांनी विरोधात मतदान केले. हा प्रस्ताव मंजूर झाल्यानंतर आता रेसकोर्सच्या भाडेतत्त्वाचे नूतनीकरण करून रेसकोर्सच्या 226 एकर जागेपैकी 120 एकर जागेवर थीम पार्क उभारता येणार आहे.
रेस कोर्स व्यवस्थापनावर करार करण्यासाठी दबाव
महालक्ष्मी रेसकोर्सचा भूखंड 1914 मध्ये व्यवस्थापनाला भाडेतत्त्वावर देण्यात आला होता, ही भाडेपट्टी 2013 सालात संपली. अलिकडेच, महालक्ष्मी रेसकोर्ससंदर्भात शिवसेना उद्धव बाळासाहेब ठाकरे पक्षाचे आमदार आदित्य ठाकरेंनी थेट मुख्यमंत्री एकनाथ शिंदेंवरच आरोप केले होते. या जागेत व्यावसायिक बांधकामे आणि खासगी टॉवर होणार असल्याचा ठाकरेंचा दावा होता आणि त्यासाठी मुख्यमंत्र्यांच्या जवळचा विकासक रेस कोर्स व्यवस्थापनावर करार करण्यासाठी दबाव आणत आणि धमकावत होता, असा आरोप केला होता.
थीम पार्कसाठी 120 एकर तर टर्फ क्लबला 91 एकर जागेचे वाटप
दरम्यान, आरडब्ल्डूआयटीसीच्या सर्वसाधारण सभेनंतर आता राज्य सरकार, पालिका आणि रॉयल वेस्टर्स इंडिया टर्फ क्लबमध्ये कायदेशीर करार होताना दिसेल. ज्यात थीम पार्कसाठी 120 एकर तर टर्फ क्लबला 91 एकर जागेचे वाटप होईल. मात्र, ही मुंबईकरांच्या हक्काची जागा असल्याचा दावा माजी नगरसेवक मकरंद नार्वेकर यांनी केला आहे. त्यामुळे मुंबईकरांचं देखील मत विचारात घेतलं पाहिजे अशी प्रतिक्रिया दिली आहे.
शिवसेना ठाकरे गट काय भूमीका घेणार?
रेसकोर्सच्या जागेवरुन मागील अनेक दिवसांपासून वाद सुरु आहे. अशात, आता क्लबकडूनच पुर्नविकासावर मोहोर लावली गेली आहे. मात्र, यात देखील अनेक सदस्यांचा विरोध पाहायला मिळतोय. त्यामुळे शिवसेना उद्धव बाळासाहेब पक्षाचे आमदार आदित्य ठाकरे आपल्या मतदारसंघात असलेल्या रेसकोर्सबाबत आता पुढे काय भूमिका घेतात हे बघणं महत्त्वाचे असेल
हे ही वाचा :
महालक्ष्मी रेसकोर्सची जागा बिल्डरकडून बळकावण्याचा प्रयत्न, आदित्य ठाकरेंचा गंभीर आरोप
महत्त्वाच्या बातम्या
