Ganeshotsav 2023: यंदा गणेशोत्सवाच्या नियमांत शिथिलता? नेमक्या कोणत्या मागण्यांबाबत शिफारसी?
Ganeshotsav 2023: बृहन्मुंबई सार्वजनिक गणेशोत्सव समन्वय समितीची नुकतीच एक बैठक पार पडली आहे, या बैठकीत विविध गाईडलाईन्सवर चर्चा झाली.
Ganeshotsav 2023: गणेशोत्सव (Ganesh Chaturthi) आता अवघ्या काही दिवसांवर येऊन ठेपला आहे. बाप्पांच्या आगमनाची सर्वच जण आतुरतेने वाट पाहत आहेत. गणेशोत्सवाच्या पार्श्वभूमीवर बृहन्मुंबई सार्वजनिक गणेशोत्सव समन्वय समितीची बैठक पार पडली. या बैठकीत गणेशोत्सव मंडळांशी चर्चा करण्यात आली आणि विविध मागण्यांबाबत विचारणा करण्यात येऊन प्रस्ताव ठेवण्यात आला. या संदर्भात बृहन्मुंबई सार्वजनिक गणेशोत्सव समन्वय समिती प्रशासनासोबत चर्चा करणार आहे.
काय आहेत गणेशोत्सव मंडळांच्या मागण्या?
1) गणपती मूर्तीच्या उंचीचा नियम शिथिल करावा.
2) ध्वनी प्रदुषणाबाबत जे खटले भरवण्यात आले आहेत ते मागे घ्यावेत.
3) तीन दिवसांऐवजी चार दिवस रात्री बारापर्यंत स्पीकरसाठी परवानगी द्यावी आणि रात्री बारा वाजल्यानंतर पारंपारिक वाद्य वाजवण्यासाठी परवानगी द्यावी.
4) बाप्पाच्या आगमनापूर्वी रस्त्यावर पडलेले खड्डे बुजवण्यात यावे.
5) गणेशोत्सव काळात वस्तूंचे भाव नियंत्रणात ठेवावे.
6) गणेशोत्सवासाठी लागणाऱ्या सर्व परवानग्या ऑनलाईन मिळाव्या.
या सर्व मागण्यांसंदर्भात बृहन्मुंबई सार्वजनिक गणेशोत्सव समन्वय समितीने महापालिका प्रशासन आणि इतर प्रशासनाबरोबर 26 जुलै रोजी बैठक आयोजित केली आहे. या बैठकीत मुंबई पालिका प्रशासनासमोर या मागण्या ठेवण्यात येणार आहेत.
पीओपीच्या नियमांबाबत मोठा दिलासा
गणेशमंडळांना पीओपीच्या नियमांबाबत मोठा दिलासा मिळाला आहे. पीओपीला पर्याय सुचवण्याबाबतची मार्गदर्शक तत्व महाराष्ट्र प्रदूषण नियंत्रण मंडळाकडून अद्यापही जाहीर करण्यात आलेली नाहीत, त्यामुळे 4 फुटांवरील मूर्तींसाठी पीओपीचा वापर करता येणार आहे. मात्र चार फुटांपेक्षा कमी उंच मुर्तींसाठी शाडूची माती बंधनकारक असणार आहे. दरम्यान, मूर्तीकार आणि मूर्ती विक्रेते-साठवणूकदारांना 'एक खिडकी' पद्धतीनं ऑनलाईन नोंदणीची सुविधा उपलब्ध करुन देण्यात आली आहे.
बाप्पाच्या मूर्तींची 'एक खिडकी' पद्धतीनं ऑनलाईन नोंदणी
गणेशोत्सवाला अवघे काही दिवस शिल्लक आहेत. आता मुंबई महानगरपालिकेकडून मूर्तीकार आणि मूर्ती विक्रेत्यांसाठी 'एक खिडकी' पद्धतीनं ऑनलाईन नोंदणीची सुविधा उपलब्ध करुन देण्यात आली आहे.
पोओपीच्या मूर्तींमुळे मोठ्या प्रमाणावर पर्यावरणाची हानी होते आणि त्यामुळेच गेल्या अनेक वर्षांपासून पीओपीच्या गणेश मूर्तींवर बंदी घालण्याची मागणी सर्वच स्तरांतून होत आहे. त्यामुळे उंच गणेश मूर्तींची प्रतिष्ठापना करणाऱ्या मंडळांसमोर प्रश्नचिन्ह निर्माण झाला असून मंडळांकडून सरकारकडे 'पीओपी'ला पर्याय देण्याची मागणी करण्यात येत आहे. तसेच, जरी मार्गदर्शक सूचना जारी केल्या, तरी या निर्णयाची अंमलबजावणी तातडीनं आणि सरसकट करता येणार नसल्याचं मूर्तिकारांचं म्हणणं आहे.
हेही वाचा:
महत्त्वाच्या बातम्या
