मुख्यमंत्र्यांच्या आश्वासनानंतर ओला-उबर चालकांचा संप स्थगित

विधीमंडळाच्या अधिवेशनानंतर पहिल्या आठवड्यात ओला-उबर चालक संघटना प्रतिनिधी, ओला-उबर कंपनी व्यवस्थापक, परिवहन सचिव यांच्यासोबत संयुक्त बैठक घेऊन या विषयी तोडगा काढण्याचं आश्वासन मुख्यमंत्र्यांनी दिलं.

मुंबई : ओला-उबर चालकांनी पुकारलेला संप स्थगित केला आहे. ओल-उबर चालकांच्या विविध मागण्यांवर मुख्यमंत्र्यांनी लक्ष घालण्याचं आश्वासन दिल्यानंतर आंदोलकांनी हा संप मागे घेतला. मुंबई, ठाणे, नवी मुंबई, क्षेत्रातील ओला-उबेर चालक आज पुन्हा एकदा संपावर गेले होते.

विधीमंडळाच्या अधिवेशनानंतर पहिल्या आठवड्यात ओला-उबर चालक संघटना प्रतिनिधी, ओला-उबर कंपनी व्यवस्थापक, परिवहन सचिव यांच्यासोबत संयुक्त बैठक घेऊन या विषयी तोडगा काढण्याचं आश्वासन मुख्यमंत्र्यांनी दिलं. मुख्यमंत्र्यांच्या आश्वासनानंतर ओला-उबर चालकांनी आपला संप स्थगित केला. अधिवेशनाच्या पहिल्या दिवशी दिवाळीची डेडलाइन उलटून गेल्यानं ओला-उबर चालकांनी संप पुकारलाहोता. या संपाविषयी आमदार विद्या चव्हाण यांनी परिवहन मंत्री दिवाकर रावते यांना धारेवर धरलं. या संपामुळे सामान्यांचे नव्हे तर आमदारांचेही हाल होत असल्याचं चव्हाणांनी रावतेंना सांगितलं. यावर रावतेंनी त्यांच्या नेहमीच्या शैलीत चिडून कोण ओला-उबर? कोणी दिली त्यांना परवानगी असा उलट प्रश्न विचारला. तसेच दळणवळणासाठी लोकल, बस, मेट्रोचे असे इतर पर्याय आहेत, असंही दिवाकर रावते यांनी स्पष्ट केलं. हा वाद कोर्टातला असून मी काय करु, असं म्हणत त्यांनी  काढता पाय घेतला होता.

ओला-उबर चालकांच्या मागण्या

- मिनी, मायक्रो, गो प्रती किलोमीटर 12 रुपये, बेस फेअर 50रुपये, वेटिंग टाईम 2 रुपये मिळावा - प्राईम, सिडान प्रती किलोमीटर 15 रुपये, बेस फेअर 75 रुपये, वेटिंग टाईम 3 रुपये मिळावा - xuv, xl, प्रती किलोमीटर 19रु, बेस फेअर 100रु, वेटिंग टाईम 4 रुपये मिळावा - शेअर, पूल, मायक्रो, या सर्व बुकिंग मिनी आणि गोचा हिशेब (प्रती किलोमीटर 12 रुपये, बेस फेअर 50 रुपये, वेटिंग टाईम 2 रुपये) हा मिळावा - रेंटल, हायर प्रती तासाला 250रु व 10 किलोमीटर हा मिळावा - आऊटसाईड बुकिंग 150 किलोमीटरला 2000 रु 150 वरील किलोमीटर मिनी, गो 12 रु. प्राईम, सिडान 15 रु. Xuv, xl 19 किलोमीटर ने धावेल - दोन (2)किलोमीटर वरील पिकअप फेअर मधे ऐड झाला पाहीजे. त्यामुळे बुकीग कॅन्सल होनार नाही. कंपनीचा व गाडी मालकाचा फायदा होईल - गाडी पिकअप करण्यासाठी 500 मिटर जरी गेली व पिकअप आल्यावर 5 मिनिटा नंतर बुकीग कॅन्सल झाली तर कॅन्सल फी बेस फेअर च्या स्वरुपात मिळावी - कंपनीने आपले कमिशन 15%+टॅक्स हा कट करावा - हे सर्व रेट 24 तास लागू राहतील