साहित्यिक, डॉक्टर, पत्रकार, सामाजिक कार्यकर्ते... एक अष्टपैलू व्यक्तिमत्त्व डॉ. अनिल अवचट!
Dr. Anil Awachat Passed Away : ज्येष्ठ साहित्यिक आणि सामाजिक कार्यकर्ते अनिल अवचट यांचं आज सकाळी निधन झालं. वयाच्या 78व्या वर्षी पुण्यातील राहत्या घरी त्यांनी अखेरचा श्वास घेतला.
Dr. Anil Awachat Passed Away : साहित्यिक, डॉक्टर, सामाजिक कार्यकर्ते डॉ. अनिल अवचट यांचं आज वयाच्या 78व्या वर्षी निधन झालं. पुण्यातील राहत्या घरी त्यांनी अखेरचा श्वास घेतला. केवळ साहित्य विश्वताच नाही तर समाजातही त्यांनी आपली एक वेगळी ओळख निर्माण केली. पत्रकार म्हणून त्यांनी अनेक विषयांवर आपली मतं मांडली, त्यांच्या लेखणीतून, पुस्तकांद्वारे त्यांचे विचार आपल्यापर्यंत पोहोचले.
पत्रकार म्हणून समाजाशी अनिल अवचट यांची जवळीक आणखी वाढली, ते स्वतः पत्रकार असले तरी त्यांनी पत्रकारितेतील व्यावसायिकतेला नेहमीच नकार दिला. त्यांनी आपल्या पत्रकारितेने समाजातील दुर्बल घटकांना मदत होईल असे कायम प्रयत्न केले. गरिबी, अन्याय आणि भ्रष्टाचाराचे बळी असलेल्या असहाय्य जनतेच्या हितासाठी त्यांनी कार्य केलं. अनिल अवचट यांनी मजूर, दलित, भटक्या जमाती, वेश्या यांच्या प्रश्नांविषयी अनेक पुस्तकं लिहिली.
व्यसनमुक्ती क्षेत्रातील त्यांच्या कार्यासाठी भारताचे तत्कालीन राष्ट्रपती प्रणव मुखर्जी यांच्या हस्ते राष्ट्रीय पुरस्कार अनिल यांना सन्मानित करण्यात आलं. केवळ भारतातच नाही तर आंतरराष्ट्रीय स्तरावर त्यांच्या कामाचं कौतुक केलं गेलं. अमेरिकेतील महाराष्ट्र फाऊंडेशनचा जीवनगौरव पुरस्कार त्यांना दिला गेला. पुढे महाराष्ट्र राज्य वाङ्मय पुरस्कार, फर्ग्युसन गौरव पुरस्कार अशा अनेक पुरस्कारांनी त्यांना गौरवण्यात आलं.
सामाजिक अडचणींसोबत बालसाहित्यावरही डॉ. अनिल अवचट यांनी मोठ्या प्रमाणात लिखाण केलं. "सृष्टीत.. गोष्टीत" या त्यांच्या पुस्तकाला साहित्य अकादमीतर्फे उत्कृष्ट बालसाहित्याचा पुरस्कार देण्यात आला. इतकंच नाही तर अनिल अवचट यांची पुस्तकं सलग तीन वर्षे महाराष्ट्र शासनाने "सर्वोत्कृष्ट पुस्तके" म्हणून जाहीर केली.
पाहा व्हिडीओ : ज्येष्ठ साहित्यिक आणि सामाजिक कार्यकर्ते अनिल अवचट यांचं निधन
महाराष्ट्र साहित्य परिषदेचा जीवनगौरव पुरस्कार मिळाल्यानंतर डॉ. अनिल अवचट यांनी एबीपी माझाचा विशेष कार्यक्रम माझा कट्टावर बातचित केली होती. त्यावेळी त्यांनी आपल्या आयुष्यातील अनेक आठवणींना उजाळा दिला. आपल्या बालपणाबद्दल सांगताना त्यांनी एक खंत व्यक्त केली होती, ती म्हणजे त्यांच्या बालपणी ग्रंथालयं नव्हती. काही वाचायचं झालं तर ते साहित्य सहजरित्या उपलब्ध होत नसे. आताच्या युगातील लहानग्यांकडे वाचनाची साधनं असून देखील त्यांना वाचनात रस नाही. सतत मोबाईलमध्ये गुंतलेल्या, गेमिंगमध्ये समोर दिसणाऱ्या प्रत्येक व्यक्तीला शत्रू समजणाऱ्या या तरुणपिढीचं नवल वाटतं, असंही ते म्हणाले होते.
लेखक, डॉक्टर, पत्रकार, सामाजिक कार्यकर्ते अशा अनेक ओळखी असताना त्यापैकी कोणती ओळख त्यांना जास्त भावते, असं विचारल्यानंतर डॉक्टर म्हणाले होते की, येणाऱ्या पिढीनं मला एक चांगला माणूस म्हणून ओळखावं, असं म्हटलं होतं. त्यांच्या या उत्तरातच त्यांचा नि:स्वार्थीपणा दिसून येतो. साहित्यिक, डॉक्टर, समाजासाठी झटणारा कार्यकर्ता आणि पत्रकार असणाऱ्या अनिल अवचट यांनी महाराष्ट्राचं नाव आणखी उंचावलं.
महत्त्वाच्या इतर बातम्या :
Dr. Anil Awachat Passed Away : ज्येष्ठ साहित्यिक आणि सामाजिक कार्यकर्ते डॉ. अनिल अवचट यांचं निधन
महत्त्वाच्या बातम्या
ट्रेंडिंग न्यूज
