Shivsena : आता खासदारांचेही बंड? शिवसेनेच्या 11 खासदारांनी घेतली अमित शाह यांची भेट?

ज्या दिवशी मुख्यमंत्री एकनाथ शिंदे यांनी केंद्रीय गृहमंत्री अमित शाह यांची भेट घेतली त्याचदिवशी शिवसेनेच्या 11 खासदारांनीही त्यांची भेट घेतल्याची माहिती आहे. 

अमित शाह

मुंबई: आमदारांपाठोपाठ आता शिवसेनेचे खासदारही बंड करण्याच्या तयारीत असून 11 खासदारांनी केंद्रीय गृहमंत्री अमित शाह यांची भेट घेतल्याची माहिती समोर आली आहे. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी अमित शाह यांची भेट घेतल्याच्या दिवशीच या खासदारांनी भेट घेतल्याचं आता समोर येत आहे. 

गेल्या आठवड्यात केंद्रीय गृहमंत्री अमित शाह आणि मुख्यमंत्री एकनाथ शिंदे यांची भेट घेतली होती. त्यावेळी उपमुख्यमंत्री देवेंद्र हे देखील उपस्थित होते. त्याच दिवशी शिवसेनेचे 11 खासदार अमित शाह यांच्या भेटीला आल्याची माहिती आहे. अमित शाह आणि या 11 खासदारांची तब्बल साडे पाच तास चर्चा झाल्याची माहिती समोर येत आहे. 

शिवसेनेच्या एका खासदाराने याबाबत माहिती दिली. अमित शाह यांच्या निवासस्थानी ही भेट झाल्याची माहिती असून या पुढे काय करायचं, काय भूमिका घ्यायची यावर चर्चा झाल्याची माहिती आहे. राष्ट्रपतीपदाच्या निवडणुकीबाबत काय रणनीती असावी, किंवा द्रौपदी मुर्मू यांना मतदान करण्यासाठी लोकसभेत वेगळा गट तयार करुन लोकसभा अध्यक्ष ओम बिर्ला यांच्याकडे तशी मागणी करण्याविषयी यामध्ये चर्चा झाल्याची माहिती आहे.

द हिंदूने या बाबत सविस्तर वृत्त प्रकाशित केलं असून 14 तारखेला शिवसेनेचे खासदार बंड करतील, लोकसभेत वेगळा गट करण्याची तयारी करतील असं त्यामध्ये म्हटलं आहे. 

शिवसेनेच्या खासदारांनी भाजप आणि शिंदे गटासोबत जुळवून घेण्यासाठी पक्ष प्रमुखांवर दबाव निर्माण केल्याचं चित्र आहे. या खासदारांपैकी अनेकजण मोदींच्या करिश्म्यावर निवडून आल्याची भावना आहे. त्यामुळे 2024 सालच्या लोकसभेवेळी जर निवडून यायचं असेल तर भाजपची साथ आवश्यक असल्याचं मत या खासदारांचं असल्याची माहिती आहे. 

महत्त्वाच्या बातम्या: