CIDCO : साडेबारा टक्केचा भूखंड मिळविण्यासाठी शेतकऱ्याचा सिडको कार्यालयात किटकनाशक पिऊन आत्महत्येचा प्रयत्न 

दत्तू भिवा ठाकुर (78) हे शेतकरी उरणच्या धुतूम गावातील रहिवासी असून सिडकोने त्यांची जमीन 1984 मध्ये संपादित केली आहे.

image0

नवी मुंबई : संपादित जमिनीच्या मोबदल्यात साडेबारा टक्के योजनेतील भूखंड देण्यास सिडकोकडून चाल ढकल करण्यात येत असल्याने उरणच्या धुतूम गावातील एका शेतकयाने सिडको कार्यालयात जाऊन किटकनाशक घेऊन आत्महत्या करण्याचा प्रयत्न केल्याची खळबळजनक घटना सोमवारी दुपारी घडली. दत्तूम भिवा ठाकुर (78) असे या शेतकऱ्याचे नाव असून त्यांना एमजीएम रुग्णालयात अतिदक्षता विभागात दाखल करण्यात आले आहे.

या घटनेतील शेतकरी दत्तू भिवा ठाकुर हे उरणच्या धुतूम गावातील रहिवासी असून सिडकोने त्यांची जमीन 1984 मध्ये संपादित केली आहे. त्यामुळे सिडकोकडून साडेबारा टक्के योजनेअंर्गत भूखंड मिळविण्यासाठी दत्तू ठाकुर हे गेल्या अनेक वर्षापासून सिडकोमध्ये हेलपाटे घालत आहे. सिडकोकडून साडेबारा टक्के योजनेतील भीखंड मिळत नसल्याने गत 18 ऑक्टोबर रोजी दत्तू ठाकुर हे सिडकोच्या कार्यालयात गेले होते, त्यावेळी त्यांनी आत्मदहन करण्याचा प्रयत्न केला होता. त्यावेळी त्यांची जमीन नियाज खात्यात येत असल्याने आणि नियाज खात्यातील जमिनींना साडेबारा टक्के योजनेचा लाभ देण्यासंदर्भातील विषय शासनाकडे प्रलंबित असल्याचे सिडकोच्या अधिकाऱ्यांकडून सांगण्यात आले होते. त्यावेळी दत्तू ठाकुर आपल्या घरी निघून गेले होते.   

सोमवारी दत्तू ठाकुर हे पुन्हा सिडकोच्या कार्यालयात पहिल्या मजल्यावर गेले होते. यावेळी ते सिडकोतील पहिल्या मजल्यावरील अप्पर जिल्हाधिकारी तथा मुख्य भूमी व भूमापन अधिकारी (भूसंपादन ) सतीश खडके यांच्या दालनात गेल्यानंतर त्यांनी सोबत आणलेले किटकनाशक सदृश्य द्रव्य प्राशन केले. हा प्रकार तेथील अधिकाऱ्यांच्या  लक्षात आल्यानंतर त्यांनी तत्काळ दत्तू ठाकुर यांना एमजीएम रुग्णालयात दाखल केले. अचानक घडलेल्या या प्रकारानंतर एकच खळबळ उडाली. 

सध्या ठाकुर यांच्यावर एमजीएम हॉस्पिटलच्या अतिदक्षता विभागात उपचार सुरु असून त्यांची प्रकृती स्थिर आहे. या प्रकरणाची पोलीस स्टेशनमध्ये नोंद करण्यात आली असून पुढील चौकशी सुरु असल्याची माहिती सीबीडी पोलिस ठाण्याचे वरिष्ठ पोलीस निरीक्षक अनिल पाटील यांनी दिली. तर या घटनेची दखल घेतली असून त्याच्या निवेदनावर कारवाई करणार आहोत असं सिडकोकडून सांगण्यात आलं आहे. दत्तू भिवा ठाकूर यांच्याशी संबंधित विषय हा शासन दरबारी विचाराधीन असून त्याबाबतचा पाठपुरावा सिडकोतर्फे वेळोवेळी करण्यात येत असल्याचे सिडकोकडून स्पष्ट करण्यात आले आहे. दरम्यान, रूग्णालयातील उपचाराचा खर्च सिडको उचलणार आहे.

महत्वाच्या बातम्या :