दिवसभर प्रयत्न करुनही 'मिशन बिबट्या' फेल; एक फायर चुकवत नरभक्षक पसार

करमाळा तालुक्यात तीन बळी घेणाऱ्या बिबट्याला मारायचे आजचे सर्व प्रयत्न फेल झाले आहेत.त्यामुळे परिसरातील नागरीकांनी काळजी घेण्याचे आवाहन वनविभागाकडून करण्यात आले आहे.

करमाळा : करमाळा तालुक्यात तीन बळी घेणाऱ्या बिबट्याला मारायचे आजचे सर्व प्रयत्न फेल गेल्याने बिबट्याचे वास्तव्य असलेल्या चिखलठाण परिसरात मोठी दहशत पसरली आहे. आज सकाळी साडेअकरा वाजता याच ठिकाणी एक 9 वर्षांच्या ऊसतोड मजुरांच्या मुलीवर हल्ला केला होता. मुलीचा आवाज ऐकताच इतर ग्रामस्थ काठ्या घेऊन आल्यावर त्याने मुलीला सोडून शेजारील उसात पळ काढला होता. यानंतर मोठ्या संख्येने वन विभाग व पोलिसांचा सशस्त्र फौजफाटा घटनास्थळी दाखल झाला आणि सुरू झाले मिशन बिबट्या.

या ऊस फडाशेजारी वागर (जाळं) लावून वन विभागाचे गन मॅन, शार्प शूटर व पोलीस अधिकारी उसात जाऊन तपास करीत होते. त्यामुळे बिबट्याने मोर्चा शेजारील केळीच्या बागेत वळवला. येथे शार्प शूटरने फायर केले. मात्र, ते चुकवत बिबट्याने परत उसात धूम ठोकली. यानंतर वन अधिकाऱ्यांनी सर्व ऊस चारी बाजूने पेटवताच बिबट्या एका बाजूने दुसऱ्या केळीच्या बागेत निसटल्याने हे मिशन फेल झाले. या सर्व नाट्यमय घडामोडी घडत असताना करमाळा आमदार संजय शिंदे हे आपले पिस्तूल घेऊन ग्रामस्थांच्या सोबत थांबले होते. आता रात्री नव्याने सर्च लाईटमध्ये पुन्हा वन विभाग सर्च ऑपरेशन राबवणार आहे.

एक डिसेंबरपासून हा बिबट्या करमाळा तालुक्यातील लिंबेवाडी, अंजनडोह आणि आज शेटफळ चिखलठाण परिसरात आपली दहशत ठेऊन आहे. आजपर्यंत तीन जणांचा बळी ह्या बिबट्याने घेतला आहे. आज चिखलठाण परिसरातील बारकूंड यांच्या शेतात तो दिसला होता. शार्प शूटर डॉ. चंद्रकांत मंडलिक यांच्यासह पाच गनमॅन ट्रॅप लावून बसले होते. बिबट्याला घेरण्यासाठी ऊस चारही बाजूने पेटवून दिला. पण त्याला अंदाज आल्याने बिबट्या सर्वांना गुंगारा देऊन निसटला आहे.

साडे चार वर्षे त्याचे वय असावे असा अंदाज डॉ. मंडलिक यांनी व्यक्त केलं आहे. शेटफळ परिसरातील लोकांनी सायंकाळी पाच ते सात आणि सकाळी दहा ते बारापर्यंत काळजी घ्यावी, कारण हा त्याचा हल्ला करण्याची वेळ आहे. हा बिबट्या जनावरांवर हल्ला करत नाही. तो फक्त माणसांवर हल्ला करतो. कदाचित माणसामुळे तो डिस्टर्ब झाला असावा, असा अंदाज मंडलिक यांनी व्यक्त केला. पण आज रात्री पेट्रोलिंग करून बिबट्याला मारू असा विश्वास त्यांना आहे.