'शिवस्वराज्य दिन' रोखण्याची कुणाची ताकद आहे? वकील गुणरत्न सदावर्ते यांच्या विरोधानंतर मंत्री हसन मुश्रीफ आक्रमक

कोणत्याही परिस्थितीत शिवस्वराज्य दिन साजरा होणारच आहे. गुणरत्न सदावर्ते यांना भाजपची फूस असल्याचा देखील हसन मुश्रीफ यांनी आरोप केला आहे. 

Hasan_Mushrif_gunaratna_sadavarte

कोल्हापूर : शिवस्वराज्य दिन रोखण्याची कुणाची ताकद आहे? वकील गुणरत्न सदावर्ते यांनी शिवस्वराज्य दिनाला विरोध केल्यानंतर ग्रामविकास मंत्री हसन मुश्रीफ आक्रमक झाले आहेत. कोणत्याही परिस्थितीत शिवस्वराज्य दिन साजरा होणारच आहे. गुणरत्न सदावर्ते यांना भाजपची फूस असल्याचा देखील हसन मुश्रीफ यांनी आरोप केला आहे. 

गुणरत्न सदावर्ते यांनी काय म्हटलं होतं? 

भगव्या ध्वजाचे ध्वजारोहण करुन राष्ट्रगीत गाणे म्हणजे राष्ट्रद्रोह आहे, या कृतीमुळे देशातील एकता आणि अखंडता धोक्यात येऊ शकते असं मत अॅड. गुणरत्न सदावर्ते यांनी मांडलं आहे. 6 जूनला भगवा ध्वज फडकावून शिवस्वराज्य दिन म्हणून साजरा करण्याचा निर्णय राज्य सरकारने घेतला असून तशा प्रकारचे आदेश सर्व शासकीय कार्यालयांना देण्यात आले आहेत. राज्य सरकारच्या या निर्णयावर अॅड. सदावर्ते यांनी टीका करत मुख्यमंत्र्यांना एक पत्र लिहिलं आहे. 

रविवारी होणारा छत्रपती शिवाजी महाराजांचा राज्याभिषेक दिन संपूर्ण महाराष्ट्रातील ग्रामपंचायती, पंचायत समित्या व जिल्हा परिषद कार्यालयांमध्ये 'शिवस्वराज्य दिन' म्हणून साजरा करण्याचा निर्णय घेण्यात आला आहे. त्यानुसार राज्यात आता 6 जूनला भगवा ध्वज फडकावून शिवस्वराज्य दिन साजरा करण्यात येणार आहे. महाराष्ट्र शासनाच्या सर्व शासकीय  ग्रामपंचायती, पंचायत समित्या आणि जिल्हा परिषद कार्यालयांना 1 जून रोजी तशा प्रकारचा सरकारी आदेश जारी करण्यात आला आहे. त्यामुळे उद्या होणारा शिवस्वराज्य दिन कसा साजरा करायचा यावरुन राज्यातील राजकारण तापण्याची शक्यता आहे.