Maharashtra News Updates 24th February 2023 : कोकणात आजपासूनच होळीची लगबग सुरु, काही गावांमध्ये देव आणि पालखी सजवायला सुरुवात

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

Background

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

खलिस्तान समर्थक अमृतपाल सिंह याची अमित शाहांना थेट धमकी

पंजाबमधील 'वारीस पंजाब दे' (Waris Punjab Ke) संघटनेचा प्रमुख आणि खलिस्तान समर्थक अमृतपाल सिंहने (Amritpal Singh) केंद्रीय गृहमंत्री अमित शाह (Amit Shah) यांना थेट धमकी दिली आहे. खलिस्तानी चळवळीच्या (Khalistan Movement) विरोधात जाल तर इंदिरा गांधी (Indira Gandhi) यांना चुकवावी लागलेली किंमत तुम्हालाही चुकवावी लागेल अशी उघड धमकी त्याने दिली आहे. अमित शाह यांनी हिंदू राष्ट्राची मागणी करणाऱ्यांचं समर्थन केलं तर ते गृहमंत्रीपदावर कसे राहतील हेदेखील पाहून घेऊ असंही तो म्हणाला.

उद्धव ठाकरेंनी विश्वासदर्शक ठरावाला सामोरं जायला हवं होतं, पण... : राहुल नार्वेकर

उद्धव ठाकरेंनी राजीनामा न देता विश्वासदर्शक ठरावाला सामोरं जायला हवं होतं, पण त्यांनी तसा निर्णय का घेतला हे माहिती नाही असं राहुल नार्वेकर म्हणाले. विश्वासदर्शन ठरावाला सामोरं जाणं हे अपेक्षित होतं असंही ते म्हणाले. ते एबीपी माझाच्या माझा कट्टा या कार्यक्रमात बोलत होते. राज्यातील सुरु असलेल्या सत्तासंघर्षाच्या पार्श्वभूमीवर राहुल नार्वेकरांनी अनेक प्रश्नावर संवाद साधला. 

IND W vs AUS W : भारताचं फायनलचं स्वप्न भंगलं, ऑस्ट्रेलियाचा पाच धावांनी विजय

अटीतटीच्या लढतीत ऑस्ट्रेलियाने भारताचा पाच धावांनी पराभव केला. या विजयासह ऑस्ट्रेलियाने टी 20 विश्वचषकाच्या फायनलमध्ये धडक मारली आहे. तर पुन्हा एकदा उपांत्य फेरीत भारताचे आव्हान संपुष्टात आले. ऑस्ट्रेलियाने दिलेल्या 173 धावांच्या आव्हानाचा पाठलाग करताना भारतीय संघ निर्धारित 20 षटकात आठ बाद 167 पर्यंत पोहचू शकला. भारतीय फलंदाजांनी ठरावीक अंतराने आपल्या विकेट फेकल्या. तसेच ऑस्ट्रेलियाच्या फिल्डर्सनी जबरदस्त फिल्डिंग केली. हरमनप्रीत कौर आणि जेमिमा यांचा अपवाद वगळता एकाही फलंदाजाला लौकिकास साजेशी खेळी करता आली नाही. क्षेत्ररक्षण हा दोन्ही संघातील मोठा फरक दिसून आला. भारताने खराब फिल्डिंग केली.. झेल सोडले, धावा वाचवण्यात अपयश आले. दुसरीकडे ऑस्ट्रेलियाने जबरदस्त फिल्डिंग केली.

स्वत:च्या डोक्यात गोळी झाडून पोलिसाने संपवलं जीवन, भायखळा कारागृहाबाहेरची घटना 

मुंबईच्या भायखळा (Byculla) कारागृहाबाहेर तैनात असलेल्या एका पोलिसाने स्वतः च्या डोक्यात गोळी झाडून आत्महत्या (Police committed Suicide) केल्याची धक्कादायक घटना घडली आहे. ही घटना गुरुवारी (23 फेब्रुवारी) रात्री साडेआठ वाजण्याच्या सुमारास घडली. श्याम वरगडे असे या पोलीस हवालदाराचे नाव आहे. ते ताडदेव लोकल आर्म युनिट 2 मध्ये कार्यरत होते.

19:09 PM (IST)  •  24 Feb 2023

अण्णाभाऊ साठे महामंडळाचे माजी अध्यक्ष रमेश कदम यांना न्यायालयीन कोठडी

मोहोळचे राष्ट्रवादीचे माजी आमदार आणि अण्णाभाऊ साठे महामंडळाचे माजी अध्यक्ष रमेश कदम यांना न्यायालयीन कोठडी

अण्णाभाऊ साठे महामंडळाच्या कर्ज योजनेतून आजीच्या नावे पदाचा गैरवापर करून कर्ज घेऊन अपहार केल्याचा त्यांच्यावर आरोप आहे. 

सोलापूर सदर बाजार पोलीस स्टेशनमध्ये रमेश कदम यांच्यावर गुन्हा दाखल आहे.

या अपहाराच्या प्रकरणात पोलिसांनी रमेश कदम यांना अटक केली होती.

त्यानंतर सोलापूर कोर्टाने त्यांना तीन दिवस पोलीस कस्टडी दिली होती.

मात्र आज झालेल्या युक्तिवादात त्यांना न्यायालयीन कोठडी देण्यात आली आहे.

आरोपी माजी आमदार रमेश कदम यांच्या वकिलाने केलेल्या युक्तीवादामुळे पोलिसांनी मागितलेली दोन दिवसांची पोलीस कस्टडी नाकारण्यात आली आहे 

माजी आमदार रमेश कदम यांनी आपल्या पदाचा गैरवापर करून महामंडळाच्या निधीचा अपहार करण्याच्या गैरहेतूने आपली आजी बायमा गणपत यांच्या नावाने दुग्ध व्यवसायाचे कर्ज घेतल्याचा आरोप आहे

18:08 PM (IST)  •  24 Feb 2023

चिंचवडमध्ये 14 लाखांची रोकड जप्त

कसबा आणि चिंचवड येथील प्रचाराच्या तोफा आज थंडावल्या. त्याचवेळी पोलिसांनी चिंचवडमध्ये 14 लाख रुपयांच्या रोकडसह एका कारला ताब्यात घेतले आहे. पैशांबद्दल पोलीस अधिक तपास करत आहेत. 

16:51 PM (IST)  •  24 Feb 2023

Sudhir Mungantiwar : राज्यातील 75 हजार विद्यार्थ्यांना मोफत व्याघ्र सफारी; आगामी बजेटमध्ये होणार घोषणा

Sudhir Mungantiwar : राज्यातील किमान 75 हजार विद्यार्थ्यांना मोफत व्याघ्र सफारी घडविण्याची राज्य सरकारची योजना असून लवकरच याची आगामी बजेटमध्ये घोषणा केली जाणार आहे. राज्याचे वनमंत्री सुधीर मुनगंटीवार यांनी याबाबत माहिती दिली आहे. जंगलव्याप्त क्षेत्रातील नागरिकांनी जंगलांचे संरक्षण केले असून त्यांचा जंगलावर हक्क आहे आणि त्यामुळेच स्वातंत्र्याच्या अमृतमहोत्सवी वर्षांनिमित्त विद्यार्थ्यांना ही जंगल सफारी घडवली जाणार आहे. राज्यातील ताडोबा, नवेगाव-नागझिरा, उमरेड-कऱ्हाडला आणि मेळघाट या व्याघ्र प्रकल्पात विद्यार्थी सफारी करणार आहेत. जंगलाप्रति शाळकरी विद्यार्थ्यांमध्ये यामुळे जनजागृती निर्माण होईल असा विश्वास मुनगंटीवार यांनी व्यक्त केला आहे.

16:44 PM (IST)  •  24 Feb 2023

ठाण्यातील जिल्हाधिकारी कार्यालया बाहेर सेवानिवृत्त कर्मचाऱ्यांचे अर्धनग्न उपोषण

मुंबई, पुणे, नाशिक, नागपूर, अमरावती, औरंगाबाद कार्यालय शासन नियम व निर्णयानुसार अधिक्षक अभियंता सार्वजनिक बांधकाम प्रादेशिक विभाग परिमंडळ  कार्यवाही करीत नसल्याने सेवानिवृत्त स्थापत्य अभियांत्रिकी सहाय्यक कर्मचाऱ्यांनी आज ठाण्यातील जिल्हाधिकारी कार्यालया बाहेर एक दिवशी अर्धनग्न मुक उपोषण केले या या आंदोलनात ६०ते ८५ वयोगटातील पुरुष कर्मचारी मोठ्या संख्येने सहभाग घेत अर्धनग्न होऊन हाताची घडी व तोंडावर बोट ठेवून मुक उपोषण केले या वेळी  महाराष्ट्र नागरी सेवा (वेतन) नियम १९८१ मधील नियम १५ नुसार सर्व तेरा संवर्ग कर्मचान्यांचे पदनामांतर करुन अभियांत्रिका सहाय्यक पदावर समाविष्ट करणे व वेतन निश्चित करणे,अश्वासित वरिष्ठ वेतन श्रेणीचा दुसरा लाभ अनुज्ञेय करावे अशा विविध मागण्या घेऊन हे उपोषण करण्यात आले.

 

16:41 PM (IST)  •  24 Feb 2023

वाशिम मध्ये पार पडला 501 जोडप्याचा सामूहिक विवाह सोहळा

एकीकडे नवरदेवाला नवरी मिळत नाही म्हणून नवरदेव आंदोलन करतांना दिसतात मात्र वाशिम मध्ये सर्वधर्मीय 501 जोडप्याचा सामूहिक विवाह सोहळा पार पडलाय. यात मूकबधिर, अंध, अपंग जोडप्याचाही समावेश होता.  या सामूहिक विवाह सोहळ्यात बऱ्याच जोडप्यांची आधीच लग्न उतकलेलं असतांना सुद्धा  केवळ शासकीय  अनुदानासाठी  याठिकाणी पुन्हा लग्न  केल्याची जोरदार चर्चा होत्या.