Raj Thackeray : मनसे आंदोलन अर्धवट सोडतो हा आरोप चुकीचा; शस्त्रक्रियेनंतर राज ठाकरे ॲक्टिव्ह मोडमध्ये! मुंबईत मनसेच्या मेळाव्यात फटकेबाजी

Raj Thackeray : मनसे अध्यक्ष राज ठाकरे (Raj Thackeray) आपल्या हिप बोनच्या शस्त्रक्रियेनंतर ॲक्टिव्ह मोडमध्ये आले आहेत. टोल वसुली, भोंगा आणि इतर महत्वाच्या मुद्द्यावरून त्यांनी हल्लाबोल केला आहे.

Raj Thackeray MNS Melava

Raj Thackeray :  मनसे आंदोलन अर्धवट सोडतो हा आरोप चुकीचा आहे. टोलबाबत भाजपला प्रश्न विचारला पाहिजे. टोल वसुलीबाबत राज ठाकरेंनी हल्लाबोल केला आहे. मनसे अध्यक्ष राज ठाकरे (Raj Thackeray) आपल्या हिप बोनच्या शस्त्रक्रियेनंतर ॲक्टिव्ह मोडमध्ये आले आहेत. मुंबईत आज मनसेच्या (MNS) पदाधिकाऱ्यांचा मेळावा पार पडत आहे. या मेळाव्यात राज ठाकरे बोलत होते. यावेळी राज्यभरातील मनसे पदाधिकारी व कार्यकर्ते मोठ्या प्रमाणात मुंबईत दाखल झाले आहेत. 

शस्त्रक्रियेचा अनुभव भयंकर होता : राज ठाकरे
शस्त्रक्रियेनंतर राज ठाकरे यांची पहिलीच सभा आहे. माझ्या शस्त्रक्रियेला 2 महिने पूर्ण झाले आहे. मात्र शस्त्रक्रियेचा अनुभव भयंकर होता असं राज ठाकरे यावेळी म्हणाले. उद्या पुणे दौऱ्यावर जातोय. कोरोनामुळे हाडांचा त्रास बळावला होता. प्रवास करताना त्रास होतोय का ते बघतो असं ते म्हणाले. 

टोलमुक्त महाराष्ट्राचं काय झालं? शिवसेना-भाजपला प्रश्न विचारा

यावेळी राज ठाकरेंनी टोलच्या मुद्द्यावरून हल्लाबोल केला आहे. ते म्हणाले, मनसे आंदोलन अर्धवट सोडतो हा आरोप चुकीचा आहे. मनसे कुठलंही आंदोलन अपूर्ण सोडत नाही. टोलमुक्तीचे आश्वासन शिवसेना-भाजपचं होतं. मात्र याबाबत आंदोलन मात्र मनसेनी केलं. शिवसेना-भाजपला कोणी प्रश्न का विचारत नाही? या टोलचा पैसा कुठे जातो हा मूळ प्रश्न होता, मात्र हे टोलबाबतच्या प्रश्नांची उत्तरं कोणत्याच सरकारने दिली नाही. म्हणजेच हा टोलचा पैसा सगळ्या पक्षांना जातो, आणि म्हणून नेते टोलबाबत प्रश्न विचारत नाहीत, तसेच मी टोल बंद करून दाखवतो असं राज ठाकरे यावेळी म्हणालेत. 

मनसेच्या आंदोलनानंतर मशिदीवरचे भोंगे बंद झाले : राज ठाकरे

मनसेच्या आंदोलनानंतर मशिदीवरचे भोंगे बंद झाले. यानंतर जवळपास 92 टक्के ठिकाणांवरील भोंगे बंद झाले आहेत. त्यामुळे लोकांपर्यंत कसे पोहचता हे महत्वाचं आहे. असं राज ठाकरे म्हणाले

निवडणुका त्यांच्या डोक्यात आहेत

सध्याचं राजकीय वातावरण राज्यासाठी चांगलं नाही. अडीच वर्षात जे घडलं ते चांगलं नव्हतं. फक्त निवडणुका त्यांच्या डोक्यात आहेत, ज्या मतदारांनी 2019 ला मतदान केलं, त्यांना कळतही नसेल की आपण मतदान कुणाला केलं?कोण कुणासोबत आहे, हे कळतच नाही, आणि ही सत्तेची आणि आर्थिक अॅडजस्टमेंट आहे. असं राज ठाकरे म्हणाले.

माझं बंड नव्हतं म्हणून मी बाहेर पडलो : राज ठाकरे

यावेळी शिवसेना सोडतानाची कहाणी सांगत राज ठाकरे म्हणाले, माझं बंड नव्हतं म्हणून मी बाहेर पडलो, तेव्हा बाळासाहेबांनी मला मिठी मारली. मी मातोश्रीवर गेलो तेव्हा तिथे माझ्यासोबत मनोहर जोशी होते. त्यावेळी बाळासाहेब म्हणाले ‘आता जा’. त्यांना समजलं होतं मी जाणार आहे. त्यामुळे मी दगाफटका करून, गद्दारी करून, पाठीत खंजीर खुपसून बाहेर पडलेलो नाही. कुठल्याही दुसऱ्या पक्षात गेलेलो नाही. तुमच्या विश्वासावर नवा पक्ष उभा केला. असं राज ठाकरे यावेळी म्हणाले. राज ठाकरे यांनी शिवसेनेतील बंडावर भाष्य करताना छगन भुजबळ, नारायण राणे, एकनाथ शिंदे यांच्या बंडासोबत माझ्या त्या निर्णयाशी तुलना करू नका असे राज ठाकरे यांनी सांगितले. छगन भुजबळ, नारायण राणे यांनी शिवसेनेतून बाहेर पडत दुसऱ्या पक्षात सामिल झाले. मात्र, मी बाळासाहेब ठाकरे यांना सांगून मी बाहेर पडलो असल्याचे राज ठाकरे यांनी म्हटले. 

आगामी मुंबई महापालिका निवडणुकीची तयारी, भाजपच्या भूमिकेकडे मनसेचे लक्ष

राज ठाकरे यांच्यावर 20 जून रोजी मुंबईतील लीलावती रुग्णालात हिप बोनची यशस्वी शस्त्रक्रिया पार पडली. राज ठाकरे यांची शस्त्रक्रिया पार पडल्यानंतर डॉक्टरांनी त्यांना सक्तीची विश्रांती घेण्याचा सल्ला दिला होता. त्यानुसार मागील दोन महिने राज ठाकरे विश्रांती घेत असल्याची माहिती होती. मात्र आता पुन्हा एकदा राज ठाकरे राजकारणात ॲक्टिव मोडमध्ये आले आहेत. आगामी मुंबई महापालिका निवडणुकीच्या तयारीला लागले आहेत.  मागच्या काही दिवसांत मनसेची भाजपसोबतची जवळीकता वाढली होती. आता राज ठाकरे ॲक्टिवह मोडमध्ये आल्यानंतर ही जवळीक कायम ठेवणार की 'एकला चलो रे' ची भूमिका घेणार हे पाहणं महत्त्वाचं आहे. कारण दोन महिन्यांपूर्वी राज्यात जी परिस्थिती होती ती आता राहिलेली नाही. मध्यंतरीच्या काळात शिंदे-फडणवीस सरकार सत्तेत आल्यानंतर शिवसेनासोबत नसल्यामुळे निर्माण झालेली मराठी मतांची पोकळी शिंदे सेनेमुळे आता पूर्ण होणार आहे. त्यामुळे भाजपच्या भूमिकेकडे मनसेचे देखील लक्ष असणार आहे.

शिवसेनेने साथ सोडल्यानंतर मनसे-भाजप युती होणार अशीच राज्यात चर्चा होती. याला आणखी खतपाणी मिळालं ते मनसेने भाजपला राज्यसभा, विधान परिषद आणि शिंदे-फडणवीस सरकारची बहुमत चाचणी आणि विधानसभा अध्यक्षपदाच्या निवडणुकीच्या वेळी केलेल्या मदतीमुळे. त्यानंतर पुढे देखील हिच चर्चा कायम असल्याची पाहायला मिळालं होतं. कारण भाजपच्या सांगण्यावरुन शिंदे गट मनसेत विलीन होणार यापासून ते नव्या सरकारमध्ये मनसेला मंत्रिपद मिळणार इथपर्यंत चर्चा सुरुच होत्या.

इतर महत्त्वाच्या बातम्या