दोन गावांसाठी एक विहीर, भंडाऱ्यात तहान भागवण्यासाठी नागरिकांची पायपीट

भंडारा जिल्ह्याच्या तुमसर तालुक्यातील येदरबुची आणि सुंदरटोला गावातील नागरिकांना पाण्यासाठी भटकंती करावी लागत आहे. पाण्यासाठी गावापासून जवळपास एक किमी लांब असलेल्या विहिरीवर लोकांना जावं लागत आहेत.

भंडारा : भंडारा जिल्ह्याच्या तुमसर तालुक्यातील येदरबुची आणि सुंदरटोला गावातील नागरिकांना सध्या भीषण पाणी टंचाईचा सामना करावा लागत आहे. येथील ग्रामस्थ पहाटे 3 वाजेपासून एक किलो मीटर दूर असलेल्या एका विहरीतून पाणी आणतात. गावालगत बावनथडी धरण असूनदेखील नियोजनाअभावी गावकऱ्यांना धरण उशाला, कोरड घशाला म्हणण्याची वेळ आली आहे.

येदरबुची गावातील विहिरींनी तळ गाठला आहे. गावात पाच ठिकाणी सार्वजनिक हात पंप आहेत, मात्र त्या पंपांनाही पाणी येत नाही. जिल्हा प्रशासनच्या वतीने राष्ट्रीय पेयजल योजनेअंतर्गत 30 हजार लिटरचे जलकुंभ तयार करण्यात आले आहे. मात्र आठवड्यातून फक्त एकदा 30 हजार लिटरचा जलकुंभ अर्धा भरला जातोय.

गावापासून एक किलोमीटर अंतरावर एका शेतात असलेल्या विहिरीला थोड्या प्रमाणात पाणी आहे. त्यामुळे गावातील सर्व नागरिकांना पहाटे 3 वाजेपासून या विहिरीवर पाणी भरण्याकरिता रांगा लावाव्या लागतात. अशारीतीने येदरबुजीतील नागरिकांना पाण्यासाठी भटकंती करावी लागत आहे.

सर्व गावकरी एकत्र पाणी भरत असल्यामुळे या विहिरीचं पाणी गढूळ होत आहे. दुसरा कोणताही पर्याय नसल्याने गावातील लोकांना याच पाण्याचा पिण्याकरिता वापर करावा लागत आहे. अनेकदा नागरिकांना स्वयंपाकासाठीही पाणी मिळत नाही, असं गावकरी सांगतात.

येदरबुची आणि सुंदरटोला गावजवळील तलावातील गढूळ पाणी पाजून ग्रामस्थ जनावरांची तहान भागवत आहेत. तर दुसरीकडे गावात घरकुल योजनेअंतर्गत तयार करण्यात येणाऱ्या अनेक घरांची कामं पाण्याअभावी बंद पडली आहेत. याठिकाणी टँकरद्वारे पाणी पुरवठा करावा, अशी मागणी सामाजिक कार्यकर्ता डॉ. पंकज कारेमोरे यांनी केली आहे.