Nashik News : काळा पैसा गेला कुठे? नाशिकमध्ये युवक राष्ट्रवादीकडून नोटबंदीला श्रद्धांजली,
Nashik News : नोटबंदी करण्याच्या निर्णयाला 06 वर्षे होत असून यामुळे नाशिक राष्ट्रवादीकडून (NCP) नोटबंदीला श्रद्धांजली वाहत निषेध नोंदवला.
Nashik News : नोटबंदीने (Demonetization) जुन्या नोटा जमा करण्यासाठी आणि नवीन नोटा घेण्यासाठी संपूर्ण देशाला रांगेत उभे करून अनेकांचा बळी घेतला. नोटबंदी नंतर जवळपास 99 टक्के नोटा परत आल्या. यामुळे काळा पैसा गेला कुठे असा सवाल जनतेत आहे. पंतप्रधान नरेंद्र मोदी (PM Narendra Modi) यांनी 08 नोव्हेबर 2016 रोजी नोटबंदी करण्याच्या निर्णयाला 06 वर्षे होत असून यामुळे राष्ट्रवादी युवक काँग्रेसकडून (NCP) नोटबंदीला श्रद्धांजली वाहत निषेध नोंदवला.
नाशिक (Nashik) शहरातील राष्ट्रवादी काँग्रेसने आज 08 नोव्हेंबर ला केलेल्या नोटबंदीच्या निषेधार्थ श्रद्धांजली आंदोलन केले. राष्ट्रवादी भवन परिसरात हे आंदोलन करण्यात आले. सन 2016 मध्ये पंतप्रधानांनी नोटबंदी करण्याचा निर्णय घेतला, पंरतु या नोटबंदीच्या निर्णयाचा विसर सर्वत्र पडलेला दिसतो. भाजप सुद्धा या निर्णयावर मौन बाळगून असून जनतेने हा निर्णय विसरावा असे प्रयत्न सतत होत असतात. नोटबंदी स्वातंत्र्योत्तर भारताच्या इतिहासातील एक मोठी घोडचूक होती. या निर्णयाने भारताची अर्थव्यवस्था अपंग झाली असून अर्थव्यवस्थेचा कणा या निर्णयामुळे मोडला. काळ्या पैशावर कारवाई, बनावट नोटा चलनातून हद्दपार करणे, दहशतवादी व नक्षलवाद्यांच्या कारवाया रोखणे व कॅशलेस व्यवहार करणे हे यामागे उद्देश होते. परंतु यातील कॅशलेस व्यवहार या मुद्दा सोडला तर वरील एकही मुद्दा यशस्वी झाल्याचे निदर्शनास आले नाही. यापुढील काळातही कॅशलेस व्यवहारावर कर लावण्याच्या तयारीत असल्याचे केंद्र सरकार दिसत आहे.
नोटबंदीने जुन्या नोटा जमा करण्यासाठी आणि नवीन नोटा घेण्यासाठी संपूर्ण देशाला रांगेत उभे करून अनेकांचा बळी घेतला. नोटबंदी नंतर जवळपास ९९ टक्के नोटा परत आल्या. यामुळे काळापैसा गेला कुठे असा सवाल जनतेत आहे. नोटाबंदीचा सर्वात मोठा परिणाम लघु उद्योगांवर झाला, नोटबंदीपुर्वी बहुतांशी उद्योगांमध्ये रोखीने व्यवहार होत होते. नोटाबंदीच्या काळात या उद्योगांमध्ये रोखीने व्यवहार होणे बंद झाले, रोख रकमेचा तुटवडा निर्माण झाल्याने अनेकांचे उद्योग ठ्प्प झाले. दहशतवादी व नक्षलवाद्यांच्या कारवाया अजूनही सुरुच असून त्यांच्या माध्यमातून बनावट चलनी नोटा बाजारपेठात आल्या आहेत. एकंदरीत सर्व प्रकरण बघता रांगेत बलिदान दिलेले नागरिक, अर्थव्यवस्था खिळखिळी झाल्याने कर्जात बुडालेली जनता व लघु उद्योग बंद पडल्याने आत्महत्या करणारे मजूर यांना श्रद्धांजली वाहण्यात आल्याचे युवक शहराध्यक्ष अंबादास खैरे यांनी सांगितले.
थिएटर चालकांना निवेदन
छत्रपती शिवाजी महाराज हे महाराष्ट्र राज्याचे आराध्य दैवत असून त्यांच्या बाबतीत चुकीचा इतिहास 'हर हर महादेव' चित्रपटाच्या माध्यमातून दाखविण्यात आल्याने सदरच्या चित्रपटाचा शो पुन्हा दाखविण्यात येऊ नये असा इशारा युवक राष्ट्रवादीच्या वतीने पी.व्ही.आर. सिनेमाचे व्यवस्थापक यांना देण्यात आला. 'हर हर महादेव' या चित्रपटाच्या माध्यमातून इतिहासाचा विपर्यास करण्यात आला असून हे कदापि सहन करण्यासारखे नाही. त्यामुळे हर हर महादेव चित्रपट पुन्हा दाखविण्यात येऊ नये असा इशारा निवेदनाद्वारे देण्यात आला.
महत्त्वाच्या बातम्या
ट्रेंडिंग न्यूज
