Jejuri | कोरोना संकटामुळं जेजुरीच्या खंडेरायाच्या दर्शन वेळांमध्ये बदल
अनेक ठिकाणी नागरिकांची ये-जा सुरु झाली. पण, यामध्ये नियमांचं मात्र सर्रास उल्लंघन होताना दिसलं.
जेजुरी : कोरोना विषाणूचा संसर्ग फोफावू लागल्यानंतर महाराष्ट्रात मंदिरंही बंद करण्यात आली होती. लॉकडाऊनअंतर्गत हे पाऊल उचलण्यात आलं होतं. पण, काही काळानंतर नियमांमध्ये शिथिलता आणण्यास सुरुवात झाली आणि नागरिकांना मोकळीक मिळाली. अनेक ठिकाणी नागरिकांची ये-जा सुरु झाली. पण, यामध्ये नियमांचं मात्र सर्रास उल्लंघन होताना दिसलं. ज्यामुळं आता पुन्हा एकदा कोरोना निर्बंध लागू करण्यासाठी प्रशासन पावलं उचलताना दिसत आहे.
राज्यातील अनेक मंदिरांमध्ये होणारी गर्दी पाहता आता त्या मंदिरांमध्ये दर्शन वेळांमध्ये बदल करण्यात आले आहेत. शिर्डीतील साईबाबा मंदिरामागोमाग, आता जेजुरीच्या खंडोबा मंदिरामध्ये दर्शन वेळांमध्ये बदल करण्यात आला आहे.
जेजुरीच्या खंडेरायाचं मंदिर आता सकाळी 7 वाजल्यापासून रात्री 8 वाजेपर्यंत दर्शनासाठी खुलं राहणार आहे. कोरोनाचा वाढता प्रादुर्भाव लक्षात घेता राज्य शासनाने 28 मार्च 2021 च्या कोविड- 19 संदर्भातील नवीन मार्गदर्शक सूचना लागू केल्या. त्यानुसार आता जेजुरीत खंडोबाच्या दर्शन वेळेत बदल करण्यात आले आहेत. भाविकांना दर्शनासाठी मंदिर सकाळी 7 ते संध्याकाळी 8 या वेळेत खुले राहणार आहे. या आधी दर्शनाची वेळ ही पहाटे 5 ते रात्री 9 वाजेपर्यंत होती. मात्र आता त्यात बदल करण्यात आला आहे अशी माहिती मार्तंड देवस्थानकडून देण्यात आली आहे.
महत्त्वाच्या बातम्या
ट्रेंडिंग न्यूज
