Gadchiroli News:  आणि घडले माणुसकीचे दर्शन, ज्यांना मारण्याचा होता कट त्यांनीच वाचवला जीव, नेमकं काय घडलं?

Gadchiroli News:  छत्तीसगढ राज्याच्या कांकेर जिल्ह्यातील बारगाव परिसरात नक्षलवादी आणि BSFच्या जवानांमध्ये शुक्रवारी रात्री चमकमक झाली. यामध्ये एक नक्षली महिला तर दोन जवान जखमी झाले आहेत.

प्रातिनिधीक छायाचित्र

Gadchiroli News:  छत्तीसगढ राज्याच्या कांकेर जिल्ह्यातील बारगाव परिसरात 26 मे रोजी रात्री BSF जवान आणि नक्षलवाद्यांमध्ये (naxalite) मोठी चकमक झाली. या चकमकीत एक महिला नक्षलवादी गंभीर जखमी झाली,  तर दोन लष्कराचे जवान देखील जखमी झाले. मात्र यादरम्यान जखमी झालेल्या त्या नक्षली महिलेचे प्राण लष्कराच्या जवानांनी वाचवले आहेत. लष्कराचे जवान या महिलेसाठी देवदूत बनून गेल्याचं चित्र यावेळी पाहायला मिळालं. ज्यावेळी ती महिला जखमी झाली त्यावेळी तिचा नवरा आणि तिचे साथीदार तिला सोडून गेले. मात्र ज्या जवनांना मारण्याचा कट या नक्षलवाद्यांनी रचला होता त्याच लष्कराच्या जवांनांनी मदतीचा हात पुढे करत माणुसकीचे दर्शन घडवून दिले आहे. 

नेमकं काय घडलं?

पोलिसांकडून मिळालेल्या माहितीनुसार, बीएसएफ जवानांची एक तुकडी नक्षलवाद्यांच्या तळावर गेली होती.  उपंजूर गावाजवळ नक्षलवाद्यांनी जवानांवर हल्ला केला. तेव्हा जवानांनी देखील नक्षलवाद्यांना चोख प्रत्युत्तर दिल्याने नक्षलवाद्यांनी मात्र तेथून पळ काढला. रात्रभर शोधमोहिम केल्यानंतर आणि परिसरात गस्त घातल्यानंतर जवान नक्षलवाद्यांच्या तळावर पोहचले.  तेव्हा डीआरजीने देखील शोधमोहीम राबवली. त्यावेळी एक नक्षलवादी महिला जखमी अवस्थेत आढळून आली. ती जखमी अवस्थेत असल्याने तिच्यावर तात्काळ उपचार करण्याची  गरज होती.  जवानांनी कुठलाही विलंब न करता तिला खाटेच्या साहाय्याने खांद्यावर उचलून घेतले. जंगलातून वाट काढत जवानांनी तिला गाडीपर्यंत आणले. त्यानंतर बीएसएफच्या जवानांनी तिच्यावर गाडीतच उपचार करण्यास सुरुवात केली.

नक्षलवाद्यांनी जवानांवर हल्ला करण्याचा कट रचला. त्यावेळी झालेल्या गोळीबारात ती महिलाच जखमी झाली होती. त्यावेळी तिच्या नवऱ्याने आणि इतर साथीदारांनी देखील तिची साथ सोडली. त्यावेळेस तिला एकटं पाडून या सर्वांनी तिथून पळ काढला. परंतु जवानांनी तिला मदतीचा हात देत तिच्यावर योग्य ते उपचार देखील केले. 

जखमी नक्षली महिलेने पोलिसांना सांगितले की,  नक्षल कमांडर आणि तिचा पती विनोद गावडे हे देखील चकमकीच्या वेळी उपस्थित होते. तिला गोळी लागली तेव्हा तिचा नवरा त्यांच्या साथीदारांसह तिला तिथेच सोडून पळून गेला. त्यांनी तिच्याकडून तिची रायफल देखील हिसकावून घेतली.  पोलीस आता त्या महिलेवर उपचार करत असून, चौकशीदरम्यान पोलिसांना महत्त्वाची माहिती मिळण्याची शक्यता आहे.

या चकमकीदरम्यान दोन जवान देखील जखमी झाले. या जवानांना चांगल्या उपचारांसाठी रायपूरला पाठवण्यात आले आहे. या ठिकाणाहून  मोठ्या प्रमाणात नक्षल साहित्य देखील जप्त करण्यात आले आहे.  पोलीस अधीक्षक शलभ सिन्हा यांनी सांगितले की, 'नक्षल कमांडर विनोदसह दोन ते तीन नक्षलवादी चकमकीत जखमी झाल्याची माहिती आहे. तसेच जवानांचे पथक अजूनही या परिसरात शोध मोहीम करत आहे.  गावाजवळच्या जंगलात ते एका घरात होते आणि त्यांनी घराजवळून जवानांवर हल्ला केला होता.'

महत्त्वाच्या इतर बातम्या :