Latur : अखेर 45 दिवसांनंतर लातूरला स्वच्छ पाणीपुरवठा सुरू, नागरिकांतून समाधान व्यक्त

गेल्या काही दिवसांपासून लातूरकरांना पिवळसर पाण्याचा पुरवठा होत होता. त्यामुळे नागरिकांमध्ये मोठा असंतोष निर्माण झाला होता. 

Latur News

लातूर: ऐन उन्हाळ्याच्या तडाख्यामध्ये पिवळसर पाणी पिण्याची वेळ आलेल्या लातूरकरांना अखेर स्वच्छ पाणी पुरवठा सुरू झाला आहे. शहरात मागील 45 दिवसांपासून पिवळसर पाणी पुरवठा होत होता. यामुळे सर्वसामान्य लातूरकरांना याचा त्रास सहन करावा लागत होता. मनपाच्या पाणीपुरवठा विभागाने अनेक दिवसांच्या प्रयासानंतर पाण्यातील पिवळसर रंग नाहीसा करण्यात यश मिळवले आहे. त्यामुळे आता शहराला स्वच्छ पाणी पुरवठा केला जात आहे. 

लातूर शहराला मागील 45 दिवसापासून पिवळसर रंगाचा दूषित पाणी पुरवठा केला जात होता. यामुळे लातूरकर मोठ्या प्रमाणावर संतप्त झाले होते. वेगवेगळे पक्ष, संघटना यांनी यावर आंदोलनंही केली. मात्र मनपाला पाण्यातील पिवळसर रंग काढून टाकण्यात यश आलं नव्हतं. पाणी तपासणी करण्यात आल्यानंतर मनपा प्रशासनाने ते पाणी पिण्यालायक आहे अशी खात्री दिल्यानंतरही लातूरकर त्यावर समाधानी नव्हते. आता जलशुद्धीकरण प्रकल्पाची डागडुजी करण्यात आली आहे. मांजरा धरणातील पाणी पुरवठा केंद्रातील जॅकवेलवरील दारे उघडण्यात आली. त्यानंतर पाणी स्वच्छ स्वरूपात आले आणि मनपाच्या प्रशासनाने सुटकेचा निश्वास सोडला. 

लातूर मनपाची मुदत या महिन्यात संपणार आहे. काही महिन्यात मनपाच्या निवडणुका लागणार आहेत. अशा पार्श्वभूमीवर शहरात येणारे पिवळे पाणी सत्ताधारी काँग्रेससाठी डोकेदुखी ठरले होते. शहरातील विविध भागात रोज पाणी पुरवठा केला जातो. प्रत्येक भागात 10 दिवसाआड पाणी पुरवठा केला जातो. मागील पाच वेळेस पाणी अशुद्ध आणि पिवळसर आले आहे. मात्र रविवारी पहिल्यांदा प्रयोगिक तत्वावर पाणी सोडून पाहिले असता ते स्वच्छ असल्याचं दिसून आलं. आजपासून शहरात नियमित स्वच्छ पाणी पुरवठा सुरू करण्यात आला आहे. यामुळे लातूरकरातून समाधान व्यक्त केले जात आहे.

पाणी पिवळे येत होते, यामुळे पाणीपुरवठा बंद करण्यात आला होता. आज 17 दिवसानंतर इंडिया नगर, शाम नगर, पंचशील चौक भागात, केशव नगर जाफर नगर, सुळ गल्ली भागात स्वच्छ पाणी पुरवठा करण्यात आला आहे. 

महत्त्वाच्या बातम्या :