Breaking News LIVE : गडचिरोली पोलिसांच्या सी 60 पथकाचं मोठं यश, छत्तीसगडमध्ये नक्षलवाद्यांचा शस्त्रांचा कारखाना उद्ध्वस्त

Breaking News LIVE Updates, 5 March 2021:दिवसभरातील ताज्या घडामोडी, महत्त्वाचे अपडेट्स या लाईव्ह ब्लॉगमध्ये आपल्याला मिळतील. देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

शहरातील जुन्या वास्तूंचा खासगीकरणातून विकास करण्याचा पुणे महानगरपालिकेचा निर्णय
केंद्र सरकारच्या पावलावर पाऊल ठेवत पुणे महापालिकेनेही खासगी गुंतवणूकीची दारं उघडली आहेत. त्यातही पुणेकरांच्या आपुलकीच्या म्हणून ओळखल्या जाणाऱ्या वास्तूंचा पुनर्विकास खासगी सहभागातून केला जाणार आहे. यासाठी महापालिकेच्या अंदाजपत्रकामध्ये तरतूद करण्यात आली आहे. पुण्याची ओळख असलेली ही ठिकाणी आता खासगी विकसकांच्या हवाली केली जाणार असल्याने या स्थळांचे जतन होणार की खासगीकरण होणार असा प्रश्न निर्माण झाला आहे.

 

तापसी पन्नू, अनुराग कश्यप यांच्या घरी आयटी छाप्यानंतर कंगना रनौतचे ट्विट
चित्रपट दिग्दर्शक अनुराग कश्यप आणि अभिनेत्री तापसी पन्नू यांची बुधवारी सकाळपासून इनकम टॅक्स विभागाकडून चौकशी सुरु आहे. अशा परिस्थितीत कंगना रनौतने आपली प्रतिक्रिया देत गंभीर आरोप केले आहे. आज कंगनाने ट्विट करुन दोघांवरील आपला राग व्यक्त केला आहे. कर चुकवण्याबरोबरच काळ्या पैशाच्या व्यवहाराचेही गंभीर आरोप तिने केले. मात्र, तिने कोणाचेही नाव घेतले नाही.

 

"दरेकर असे कसे तुमचे जुने नेते?" मास्क घालत नाही म्हणणाऱ्या राज ठाकरेंना अजित पवारांचा टोला
"काही लोक तर सरळ म्हणतात मी मास्क घालणार नाही. अरं बाबा तुला काही कोरोना होणार नाही. पण तुझ्यामुळे दुसर्‍याला होईल त्याचं काय? दरेकर असे कसे तुमचे जुने नेते?" असे म्हणत उपमुख्यमंत्री अजित पवार यांनी मनसे अध्यक्ष राज ठाकरे यांच्यावर जोरदार टीका केली. राज्यपालांच्या अभिभाषणावर विधानपरिषदेत उत्तर देत होते. "मराठी भाषा दिनानिमित्त मनसेकडून स्वाक्षरी मोहीम आयोजित करण्यात आली होती. त्यावेळी "मी मास्क घालतच नाही, तुम्हालाही सांगतोय", असं उत्तर राज ठाकरेंनी पत्रकारांना दिलं होतं. यावरुन आता उपमुख्यमंत्री अजित पवार यांनी देखील विधानपरिषदेत राज ठाकरे यांना टोला लगावला.

 

OPEC चा कच्च्या तेलाचे उत्पादन न वाढवण्याचा निर्णय, इंधनाच्या किंमती वाढणार?
जगातल्या तेल उत्पादक देशांची संघटना असलेल्या OPEC देशांनी कच्च्या तेलाच्या उत्पादनात कोणतीही वाढ न करण्याचा निर्णय घेतलाय. सध्या ज्या प्रमाणात उत्पादन घेण्यात येतंय तेवढाच उत्पादनाचा स्तर राखण्याचा निर्णय घेण्यात आला आहे. त्यामुळे आंतरराष्ट्रीय स्तरावर कच्चा तेलाच्या किंमती लवकरच कमी होतील हा आशाही धुसर झाली आहे. सौदी अरबच्या नेतृत्वाखाली ओपेक देशांची गुरुवारी ऑनलाईन बैठक झाली. त्यामध्ये ओपेकचा सदस्य नसलेला पण प्रमुख तेल उत्पादक असलेला देश रशियाही सामिल झाला होता. जगाची अर्थव्यवस्था कोरोनामुळे मंदीच्या खाईत गेली असताना या पार्श्वभूमीवर ओपेकने हा निर्णय घेतला आहे. त्यामुळे कच्च्या तेलाची निर्यात करणाऱ्या अनेक देशांना याचा फटका बसणार असून त्या देशांची अर्थव्यवस्था बिघडण्याची शक्यता वर्तवण्यात येत आहेत.

23:34 PM (IST)  •  05 Mar 2021

चंद्रपूर शहरातील ऐतिहासिक रामाळा तलाव संवर्धनासाठी सुरू असलेल्या अन्नत्याग आंदोलनाची अखेर आज 12 व्या दिवशी यशस्वी सांगता झाली. इको प्रो संस्थेचे अध्यक्ष बंडू धोतरे यांनी 12 दिवसापूर्वी हे आंदोलन सुरू केले होते. जिल्हाधिकाऱ्यांनी आज लेखी आश्वासनासह निधी तरतूद करण्याचे पत्र दिल्यावर या आंदोलनाची समाप्ती करण्यात आली. प्रशासन यासाठी खनिज विकास निधीतून रकमेची तरतूद करणार असून निधीची अडचण भासल्यास अन्य स्रोतातून निधी दिला जाणार आहे. राज्याचे पर्यटनमंत्री आदित्य ठाकरे यांनी याविषयी घेतलेल्या व्हिडिओ कॉनफरेसिंग मध्ये या कामाचे खोलीकरण आणि सौंदर्यीकरण असे 2 टप्पे सुचवित निधी उपलब्ध करून दिला होता. सोबतच पुरातत्व विभागाच्या परवानगी साठी विहित नमुन्यात सादरीकरण करण्याचे प्रशासनाला निर्देश दिले होते. हे निर्णय झाल्यावर पालकमंत्री विजय वडेट्टीवार यांच्याशी चर्चा करुन प्रशासनाच्या वतीने तहसीलदार निलेश गौड यांनी आंदोलन मंडपात पोचून धोत्रे यांना आंदोलन समाप्त करण्याची विनंती केली आणि त्यानंतर बंडू धोत्रे यांनी आपले आंदोलन समाप्त केले.

23:33 PM (IST)  •  05 Mar 2021

बारामती शहरातील बुरुड गल्ली आणि दुर्गा थेटर जवळ चेन स्नॅचिंगचा प्रकार घडलाय. एकाच दिवशी बारामती शहरात 2 ठिकाणी चैन स्नॅचिंगचे प्रकार घडले आहेत. सदरची चोरी सीसीटीव्ही कॅमेरात कैद झालीत. या चोरीत चोरट्यांनी एका ठिकाणी मंगळसूत्र तर दुसऱ्या ठिकाणी सोन्याची चैन लांपस केली आहे. दोन चोरटे शाईन गाडीवरून आले आणि महिलेच्या गळ्यातील मंगळसूत्र आणि साखळी चोरून पोबारा केलाय. दोन अज्ञात चोरट्याविरोधात बारामती शहर पोलीस ठाण्यात गुन्हा नोंद करण्यात आलाय. गेल्या काही दिवसांपासून बारामती शहरासह तालुक्यात चोरीच्या प्रकरणात वाढ झाली आहे. त्यामुळे पोलीस प्रशासनाच्या कार्यक्षमतेवरवर प्रश्नचिन्ह निर्माण झालं आहे.

18:08 PM (IST)  •  05 Mar 2021

गांजा तस्करी साठी कल्याणात आलेल्या गुजरातच्या गांजा तस्कराला कल्याण महात्मा फुले पोलिसांनी अटक केलीय .विजय पटेल असे या गांजा तस्कराचे नाव असून त्याच्याकडून 100 किलो गांजा व त्याची गाडी असा सुमारे 18 लाखांचा मुद्देमाल हस्तगत करन्यात आलाय .गुजरात येथील गांजा तस्कर कल्याणात गांजा घेऊन येणार असल्याची माहिती महात्मा फुले पोलीसांना मिळाली होती .या माहितीच्या आधारे पोलिसांनी सापळा रचत विजय पटेल याला त्याला ताब्यात घेतलं ,त्याची झडती घेतली असता त्यांच्याकडे 100 किलो गांजा आढळून आला या गांजाची किंमत सुमारे 14 लाख असल्याची माहिती पोलिसांनी दिली .त्याने गांजा कुठुन व कुणाला विकण्यासाठी आणला याचा शोध घेत आहेत.

20:51 PM (IST)  •  05 Mar 2021

दहावी, बारावी बोर्ड परीक्षेच्या आयोजन व उपयोजनाबाबत तयार करण्यात आलेल्या सल्लागार समितीची बैठक पुणे बोर्ड कार्यलयात पार पडली. दहावी-बारावी बोर्ड परीक्षा ऑफलाईनच होणार असल्याच शालेय शिक्षणमंत्री वर्षा गायकवाड यांनी जाहीर केल्यानंतर आज बोर्डाची परीक्षा नेमकी कशी घ्यायची? त्याचे आयोजन नेमके कसे करावे यासाठी सल्लागार समिती स्थापन करण्यात आली आहे. कोविड-19 च्या पार्श्वभूमीवर उच्च माध्यमिक प्रमाणपत्र (इ. बारावी) आणि माध्यमिक शालांत प्रमाणपत्र (इ. दहावी) परीक्षांचे आयोजन करताना आवश्यक उपाययोजना निश्चितीसाठी सल्लागार समिती स्थापन करण्यात आली आहे. या समितीची प्रथम बैठक आज राज्यमंडळ, पुणे येथे घेण्यात आली. यामध्ये अनेक बोर्डाच्या परीक्षेच्या आयोजनाच्या प्रश्नावर ही समिती चर्चा करुन आयोजनाबाबात उपाययोजना करणार आहे. यामध्ये बोर्डाचे अध्यक्ष दिनकर पाटील, माजी शिक्षण संचालक डॉ. वसंत काळपांडे, बोर्डाचे सेवानिवृत्त अध्यक्ष आणि विभागाचे सचिव उपस्थित होते. एप्रिल-मे महिन्यात परीक्षा घेतली जाणार याबाबत वेळापत्रक जाहीर झाल्यानंतर त्याच्या आयोजन व उपाययोजना साठी ही समिती सल्लागार म्हणून काम करणार आहे.

22:38 PM (IST)  •  05 Mar 2021

गडचिरोली-छत्तीसगड सीमेवर गडचिरोली पोलिसांच्या सी 60 पथकाला मोठं यश आलं आहे. छत्तीसगड सीमेपासून 4 ते 5 किमी आत छत्तीसगडमध्ये नक्षलवाद्यांचा शस्त्र कारखाना उद्ध्वस्त केला आहे. विशेष म्हणजे नक्षलींचा हा शस्त्र कारखाना नक्षलींचा गड मानल्या जाणाऱ्या अबुझमाड भागात होता. त्यामुळे एकाप्रकारे वाघाच्या जबड्यात घुसून गडचिरोली पोलिसांच्या सी 60 दलाने त्याचे दात पाडले आहे, असा पोलीस अधिकाऱ्यांचा दावा आहे. दरम्यान या घटनेत सी 60 दलाचा एक जवान जखमी झाला आहे, इतर जवान सुरक्षित आहेत. मार्च ते मे महिन्यादरम्यान नक्षलींचा टीसीओसी म्हणजेच टेक्टिकल काऊंटर ऑफेन्सिव्ह कॅम्पेन असते. त्याकाळात नक्षली सीमा ओलांडून महाराष्ट्रात येतात. त्यामुळे यंदा सी 60 पथकाने अॅडिशनल एसपीच्या नेतृत्वात नक्षलींचा टीसीओसीला आळा घालण्यासाठी काऊंटर ऑपरेशन राबवले होते. त्याच दरम्यान नक्षलींचा शस्त्र कारखाना अबुझमाड परिसरात असल्याची माहिती मिळाली होती.