पंकजा मुंडे गप्प का? अंजली दमानियांचा संताप अनावर; आता बीडमध्ये जाणार, काळे कारनामे उघड करणार
संतोष देशमुख यांची लहान मुलगी रडताना दिसते, बोलताना दिसते तेव्हा आपण नागरिक म्हणून काय करतो याची मला खंत वाटते.
नाशिक : बीड जिल्ह्यातील सरपंच संतोष देशमुख यांच्या हत्येप्रकरणावरुन आता बीडमधील (Beed) जनता रस्त्यावर उतरत आहे. बीड जिल्ह्यातील सर्वपक्षीय नेत्यांनी एकत्र 28 डिसेंबर रोजी आंदोलन करण्यात येणार असल्याचे सांगितले. तर, या आंदोलनात राज्यातील अनेक भागातून नागरिक सहभागी होणार आहे. काही वारकरी मंडळीही या आंदोलनात सहभागी होत बीडमधील दहशतीविरुद्ध आवाज उठवत आहेत. तसेच, संतोष देशमुख यांच्या खूनप्रकरणातील मास्टरमाईंडला अटक करण्याची मागणी देखील करणार आहेत. त्याच, पार्श्वभूमीवर आता सामाजिक कार्यकर्त्या अंजली दमानिया (Anjali Damania) याही बीडमध्ये जाऊन ठिय्या आंदोलनात सहभागी होत आहेत. एबीपी माझाशी बोलताना दमानिया यांनी पुन्हा एकदा वाल्मिक कराडला (Walmik Karad) अटक करण्याची मागणी केलीय. तसेच, या हत्याप्रकरणावर पंकजा मुंडे गप्प का? असा सवालही त्यांनी उपस्थित केलाय.
संतोष देशमुख यांची लहान मुलगी रडताना दिसते, बोलताना दिसते तेव्हा आपण नागरिक म्हणून काय करतो याची मला खंत वाटते. चांगल्या लोकांनी जर घरात बसून राहिलं तर अशी दहशत निर्माण करणाऱ्या लोकांविरुद्ध कुणीच कसं बोलणार नाही. त्यामुळे, मी ठरवलंय की, 28 डिसेंबरला मी बीडमध्ये जाणार आहे, तिथं जी पदयात्रा आहे, त्यामध्ये वारकरी मंडळीही येणार आहे. मी पदयात्रेत जाऊन यांचे जे जे काळे कारनामे आहेत, त्यांविरुद्ध आवाज उठवणार आहे. जोपर्यंत वाल्मिक कराडला अटक होत नाही, तोपर्यंत ठिय्या आंदोलन करुन लढा उभा करणं हे मी माझं कर्तव्य समजते, असे अंजली दमानिया यांनी म्हटलं आहे.
पंकजा मुंडे गप्प का?
मी पंकजा मुंडेंना मेसेज पाठवण्याचा प्रयत्न केला, तुम्ही गप्प का? तुम्ही बीडच्या मंत्री आहात. ज्या व्यक्तीविरुद्ध तुम्ही भगवान गडावरुन बोलला होतात. त्या व्यक्तीचा खंडणीच्या गुन्ह्यात सरळ सरळ सहभाग आहे. याशिवाय संतोष देशमुख खूनप्रकरणातही त्याचा हात आहे की नाही, यावर तुम्ही चकार शब्दही बोलत नाहीत. बीडच्या जनतेला तुमच्याकडून अपेक्षा आहे, तुम्ही यावर भूमिका घ्यायला हवी, असेही अंजली दमानिया यांनी म्हटलं. संतोष देशमुख यांच्या शवविच्छदेनाच्या अहवालानंतर त्यांचे फोटोही समोर आले, ते फोटो पाहून थरकाप उडाला. त्यामुळे, प्रत्येक जिल्ह्यात हे घाणीचं राजकारण, दहशतीचं राजकारण होत आहे ते थांबायला हवं. धनंजय मुंडे आणि वाल्मिक कराड यांचं सख्य कसं आहे समोर आलंय. वाल्मिक कराड यांचे फडणवीसांपासून ते रोहित पवारांसोबत फोटो आले आहेत. या वाल्मिक कराडची बीडमध्ये दहशत आहे हे सगळेच सांगतात. मग, ही कसली दगडाची लोकशाही का? असा सवालही अंजली दमानिया यांनी उपस्थित केला आहे.
भुजबळ भाजपात प्रवेश करणार
भुजबळ हे भाजपमध्ये जाणार हे मी आज नाही, तर फेब्रुवारी महिन्यातच मी सांगितलं होतं. आता, ते मस्त नाटक रंगवलं आहे, त्यानुसार भुजबळांना मंत्रिपद न देणं. मग त्यांनी थोडंसं चिडल्यासारखं करणं, विशेष म्हणजे अजित पवार व सुनील तटकरे यांनी देखील भुजबळांची भेट घेतली नाही. मग भुजबळांनी एक मेळावा घेऊन पुन्हा फडणवीसांना भेटायला गेले हे सगळं रंगवलेलं आहे. तेव्हा मी ट्विट केल्यामुळे हे लांबणीवर पडलं होतं. मात्र, हे आता भाजपमध्ये जात आहेत, कारण भाजपलाही एक ओबीसी चेहरा त्यानिमित्ताने मिळेल, असेही अंजली दमानिया यांनी म्हटलं.
महत्त्वाच्या बातम्या
ट्रेंडिंग न्यूज
