Breaking News LIVE : Maharashtra लातूर शहरासह निलंगा, अहमदपूर, उदगीर आणि औसामध्ये आजपासून पुढील आदेशापर्यंत रात्रीची संचारबंदी लागू

Breaking News LIVE Updates, 3 March 2021: दिवसभरातील ताज्या घडामोडी, महत्त्वाचे अपडेट्स या लाईव्ह ब्लॉगमध्ये आपल्याला मिळतील. देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

आरोपींनी पळ काढलेली इनोव्हा गाडी मुंबईतच? पोलिसांकडून कसून तपास

भारतातील सर्वात श्रीमंत व्यक्ती मुकेश अंबानी यांच्या निवासस्थान असलेल्या अँटिलियापासून हाकेच्या अंतरावर चार दिवसांपूर्वी स्फोटक असलेली गाडी ठेवण्यात आली होती. मात्र यामागे कोण आहे? हे मात्र अद्याप कळू शकलेलं नाही. मुंबई पोलिसांच्या सुत्रांनी दिलेल्या माहितीनुसार, मुकेश अंबानी यांच्या कुटुंबियांच्या सुरक्षा रक्षकांचे जबाबही याप्रकरणी नोंदवण्यात आले आहेत. याप्रकरणी 700 पेक्षा अधिक सीसीटीव्हीची पाहणी करण्यात आली. 10 पोलीस पथकं तयार करण्यात आली आहेत.

 

आज अंगारकी चतुर्थी, जाणून घ्या चंद्रोदयाची वेळ आणि पूजा विधी

गणेश भक्तांसाठी अतिशय महत्वाची असणारी अंगारकी संकष्टी चतुर्थी आज आहे. ही 2021 या नव्या वर्षातील पहिली संकष्टी. अंगारकी संकष्टी चतुर्थी दिवशी गणपतीची आराधना आणि व्रत केल्यास वर्षभरातील संकष्टीचे पुण्य मिळते, अशी भावना आहे. या दिवशी मंदिरांमध्ये गर्दी असते मात्र आज कोरोनामुळं ही गर्दी तुलनेनं कमी पाहायला मिळणार आहे.

 

राज्य सरकारचा सर्वाधिक निधी कर्जफेडीसाठी, पुरवणी मागण्यांमध्ये तब्बल 16,200 कोटींची तरतूद

राज्य सरकारचा सगळ्यात जास्त निधी हा कर्जफेडीसाठी जात असल्याचे चित्र आहे. राज्याच्या अर्थसंकल्पीय अधिवेशनात आज अर्थमंत्री अजित पवार यांनी पुरवणी मागणी मांडल्या. त्यात कर्जफेडीसाठी मोठ्या रकमेची तरतुद केल्याचे चित्र आहे. अर्थमंत्री अजित पवार यांनी विधीमंडळात सादर केलेल्या 21 हजार 076 कोटींच्या पुरवणी मागण्यात कर्जफेडीसाठी तब्बल 16 हजार 200  कोटींची तरतुद केली आहे.

इयत्ता 10 वीची परीक्षा 5 मे तर 12 वीची परीक्षा 8 एप्रिलपासून सुरू होणार

काउंसिल फॉर दी इंडियन स्कूल सर्टिफिकेट एक्झामिनेशनने दहावी (ICSE) आणि बारावी (ISC) परीक्षा 2021 च्या तारखांची घोषणा केली आहे. इयत्ता दहावीची परीक्षा 5 मे पासून आणि इयत्ता 12 वीची परीक्षा 12 एप्रिलपासून सुरू होईल.

23:18 PM (IST)  •  02 Mar 2021

पूजाच्या कुटुंबाकडून माझी हत्या होण्याची शक्यता. शांताबाई राठोड यांचा गंभीर आरोप. पूजाच्या कुटुंबावर केला आरोप. माझ्या जीवाचे बरेवाईट झाल्यास पूजाच्या न्यायासाठी आवाज उठवावा. शांताबाईंचा सामाजिक कार्यकर्त्या तृप्ती देसाईंना आवाहन

23:35 PM (IST)  •  02 Mar 2021

रायगड जिल्ह्यातील कोर्लई येथील जमीन घोटाळ्या प्रकरणी फौजदारी कारवाई करण्याची मागणी. मुख्यमंत्री उद्धव ठाकरे परिवार आणि रवींद्र वायकर यांच्याविरोधात कारवाई करण्याची मागणी. किरीट सोमय्या फौजदारी कारवाई करण्यासंदर्भात तक्रार करणार

21:35 PM (IST)  •  02 Mar 2021

बेळगावचे पालकमंत्री रमेश जारकीहोळी यांनी नोकरीच्या आमिषाने युवतीवर अत्याचार केल्याचा आरोप नागरी हक्क संघर्ष समितीचे अध्यक्ष दिनेश कलहळ्ळी यांनी केला आहे. दिनेश कलहळ्ळी यांनी पालकमंत्री रमेश जारकीहोळी यांच्या अनैतिक संबंधाची सीडी सार्वजनिक केली आहे. जारकीहोळी यांच्या सीडीमुळे कर्नाटकातील विरोधीपक्ष आक्रमक होण्याची शक्यता आहे.

21:28 PM (IST)  •  02 Mar 2021

लातूर जिल्ह्यात मागील काही दिवसांत कोरोनाबाधित रुग्णांमध्ये लक्षणीय वाढ होत आहे. त्यामुळे जिल्हाधिकारी पृथ्वीराज बी.पी. यांनी लातूर शहर महापालिका आणि उदगीर, औसा, निलंगा तसेच अहमदपूर नगरपालिका हद्दीत आजपासून पुढील आदेश येईपर्यंत रात्री 11.00 ते पहाटे 5.00 वाजेपर्यंत रात्रीची संचारबंदी लागू केली आहे. या आदेशात अत्यावश्यक/जीवनावश्यक सेवा (वैद्यकीय सेवा, मेडिकल, सार्वजनिक वाहतूक व्यवस्था) यांना सूट देण्यात आलेली आहे. कोविड-19 प्रतिबंधात्मक आणि सुरक्षा नियम शारीरिक अंतर, मास्कचा वापर, निर्जंतुकीकरण, वैयक्तिक स्वच्छता इत्यादी नियमांचे कोटेकारेपणे पालन करण्याचे आदेशही देण्यात आले आहेत. या आदेशाचे उल्लंघन केल्यास आपत्ती व्यवस्थापन अधिनियम, 2005, साथरोग प्रतिबंधक कायदा, 1897, अन्वये दिलेल्या तरतुदीनुसार भारतीय दंड संहिता, 1860 चे कलम 188 नुसार, फौजदारी प्रक्रिया संहिता, 1973 तसेच महाराष्ट्र कोव्हीड-19 उपाययोजना नियम, 2020 च्या तरतुदीनुसार कारवाई केली जाईल, असंही आदेशात म्हटलं आहे.

20:05 PM (IST)  •  02 Mar 2021

नाशिकच्या सिन्नर तालुक्यातील उजणी शिवारात तोडणीला आलेला ऊस जळून खाक झालाय. यात शेतकऱ्यांच 60 ते 70 हजार रुपयांच नुकसान झालाय. उजणी शिवारात हजारे आणि सापनर कुटुंबियांची शेती आहे, त्यात त्यांनी 60 गुंठ्यावर ऊसाची लागवड केली आहे. साखर कारखानामध्ये जाण्यासाठी पुढील दोन चार दिवसांत ऊसाची तोडणी केली जाणार होती, परन्तु रात्री अचानक ऊसाने पेट घेतला, आजूबाजूचया शेतकऱ्यांनी तत्काळ धाव घेऊन पाण्याचा मारा करत आग विझवल्यानं पुढील नुकसान टळलं आहे, 60 गुंठे पैकी 30 गुंठ्यावरील शेतीच नुकसान झालंय.