Nashik News : कपडे धुण्याचं निमित्त झालं, आईच्या डोळ्यांदेखत एकुलता एक काळजाचा तुकडा हिरावला
Nashik News :आई कपडे धुवत असताना आदित्य हा पायथ्याशी असलेल्या डोहात आंघोळीसाठी उतरला.
Nashik News : काही दिवसांपासून धरणात, नदीच्या पाण्यात बुडण्याच्या घटनांमध्ये वाढ होत असून नाशिक (Nashik) जिल्ह्यात मागील काही दिवसांत अनेक घटना समोर आल्या आहेत. अशातच इगतपुरी (Igatpuri) तालुक्यात धक्कादायक घटना घडली आहे. आईबरोबर कपडे धुण्यासाठी गेलेल्या मुलाचा दारणा धरणाच्या डोहात बुडून मृत्यू झाला. आईच्या डोळ्यांदेखत मुलगा बुडाल्याची घटना घडल्याने परिसरात हळहळ व्यक्त करण्यात येत आहे.
पुण्यातील (Pune) खडकवासला धरणात बुडून दोन मुली बुडाल्याची घटना घडली होती. त्यानंतर नाशिकमध्ये वाडीवऱ्हे परिसरात धरणांत तरुण बुडाल्याची घटना घडली होती. आता इगतपुरी तालुक्यातील गोंदे दुमाला येथील शिक्षक वसंत बबन नाठे यांचा एकुलता एक मुलगा आदित्य आईसोबत गेला असताना ही घटना घडली आहे. आदित्य हा आईबरोबर कपडे धुण्यासाठी दारणा धरणाकडे गेला होता. आई कपडे धुवत असताना आदित्य हा पायथ्याशी असलेल्या डोहात आंघोळीसाठी उतरला. आंघोळ करत असताना पाण्याचा अंदाज न आल्याने आदित्य नदीत बुडू लागला. त्याच्यासोबत असलेल्या चुलतभावांनी हे दृश्य पाहिले.
दरम्यान त्यांनी कुटुंबियांना आवाज दिला तेव्हा, आदित्य गटांगळ्या खात होता. आईने लागलीच आदित्यकडे धाव घेतली. ते दृश्य पाहून तिच्या पायाखालची वाळू सरकली. तिने आरडाओरडा केला, मात्र त्याठिकाणी कोणीही उपस्थित नव्हते. डोळ्यांदेखत मुलगा नदीत बुडत असल्याचे पाहून आईने हंबरडा फोडला. मात्र, पाण्याच्या प्रवाहात आदित्य खोलवर बुडाला होता. घटनेनंतर मालेगावहून रेस्क्यू टीमला पाचारण करण्यात आले होते. घटनेची माहिती मिळाल्यानंतर गोंदे, अस्वली, नांदगाव येथील नागरिकांनी घटनास्थळी धाव घेतली. बराच वेळ शोध घेतल्यानंतरही पाण्याचा प्रवाह आणि अंधार पडत असल्याने रेस्क्यूत अडचण येत असल्याने शोधमोहीम थांबविण्यात आली. मंगळवारी सकाळी पुन्हा रेस्क्यू सुरू केल्यानंतर सात वाजता आदित्यचा मृतदेह हाती लागला. शोकाकुल वातावरणात आदित्यवर गोंदे दुमाला येथे अंत्यसंस्कार करण्यात आले.
आईने फोडला हंबरडा
दोन दिवसांपूर्वीच मुकणे धरणाचे (Mukne dam) आवर्तन सोडण्यात आले आहे. नदी तुडुंब भरून वाहत असल्याने घरातील कपडे धुण्यासाठी नदीकाठावर महिलांची नेहमीच गर्दी असते. आदित्य हा आईसोबत दारणा धरणाजवळ गेला होता. सोबत असलेल्या चुलत भावांबरोबर तो अंघोळीसाठी गेला होता. कडक उन्हामुळे नदीत आंघोळ करण्याचा मोह त्याला आवरता आला नाही. मात्र डोळ्यांदेखत मुलगा नदीत बुडत असल्याचे पाहून आईने मोठ्याने हंबरडा फोडला.
गंगापूर धरणात एकजण बुडाला...
दरम्यान मित्रांसमवेत गंगापूर धरण (Gangapur Dam) येथील बॅकवॉटर परिसरात फिरण्यासाठी गेलेल्या तरुणाचा धरणाच्या पाण्यात बुडून मृत्यू झाला. यश रमेश चक्रधर असे मृताचे नाव आहे. यश हा घरातून जेवण करुन डान्स क्लाससाठी बाहेर पडला. पण, डान्स क्लासऐवजी भावासह चार-पाच मित्रांसमवेत तो गंगापूर धरणाच्या बॅकवॉटर परिसरात गेला. तिथे दुपारी तीन वाजता ते पाण्यात उतरले. पोहता येत नसल्याने तो पाण्यात बुडाला.
महत्त्वाच्या बातम्या
ट्रेंडिंग न्यूज
