'भाऊ तुम्ही बांधाल ते तोरण...', भाजपचं चिन्ह हटवत एकनाथ खडसे समर्थकांची बॅनरबाजी

एकनाथ खडसे यांच्या पक्षांतरासाठी 17 ऑक्टोबरचा मुहूर्त मानला जात होता. मात्र हा मुहूर्त टळल्यानंतर आता 22 तारखेचा मुहूर्त असल्याच्या चर्चा पुन्हा जोर धरू लागल्या आहेत.

जळगाव : भाजपचे ज्येष्ठ नेते एकनाथ खडसे राष्ट्रवादीच्या वाटेवर असल्याचा चर्चा गेल्या काही दिवसांपासून जोरात सुरू आहेत. त्यांच्या कार्यकर्त्यांनी तर आता एक पाऊल पुढे टाकत, भाजपचे चिन्ह हटवत, 'भाऊ तुम्ही बांधाल तेच तोरण...' अशा स्वरूपाची बॅनरबाजी करण्यास सुरुवात केली आहे. त्यामुळे एकनाथ खडसे यांच्या पक्षांतराच्या चर्चा अधिक जोरात होऊ लागल्या आहेत.

एकनाथ खडसे यांच्या पक्षांतरासाठी 17 ऑक्टोबरचा मुहूर्त मानला जात होता. मात्र हा मुहूर्त टळल्यानंतर आता 22 तारखेचा मुहूर्त असल्याच्या चर्चा पुन्हा जोर धरू लागल्या आहेत. स्वतः एकनाथ खडसे यांनी मात्र या सर्व विषयावर मौन बाळगले आहे. कोणताही निर्णय झाल्यास तो आपण स्वतः कळवू असं सांगत त्यांनी चर्चांना पूर्णविराम देण्याचा प्रयत्न केला आहे. मात्र खडसे मुंबईत जाऊन राष्ट्रवादीत प्रवेश करतील अशा प्रकारच्या शक्यता पाहता त्यांच्या कार्यकर्त्यांनी भाजपचे चिन्ह हटवत खडसे यांचे बॅनर आपल्या वाहनावर आणि रस्त्याच्या कडेला उभे केले आहेत. 'भाऊ तुम्ही बांधाल तेच तोरण, तुम्ही ठरवाल तेच धोरण', 'भाऊ आम्ही सदैव आपल्या सोबत' असं बॅनरवर लिहिण्यात आलं आहे. त्यामुळे समर्थकांची बॅनरबाजी राजकीय वर्तुळात चर्चेचा विषय बनली आहे.

काही दिवसांपूर्वी खडसेंना पक्षांतराबाबत विचारलं असता त्यांनी म्हटलं होतं की, 'राष्ट्रवादी प्रवेशाबाबत मला या विषयावर काहीच बोलायचे नाही. नो कमेंट्स'. 'माझ्या राष्ट्रवादी प्रवेशाबाबतचे सारे मुहूर्त तुमचेच आहेत', असेही त्यांनी त्यावेळी म्हटलं होतं.

एकनाथ खडसे मोठ्या काळापासून भाजपवर नाराज आहेत. भाजपमध्ये आपल्याला सातत्यानं डावललं जात असल्याची एकनाथ खडसे यांची भावना आहे. त्यातून ते गेल्या अनेक दिवसांपासून अस्वस्थ आहेत. एकनाथ खडसे यांनी आपली नाराजी अनेकदा जाहीर कार्यक्रमात बोलून दाखवली आहे. मात्र, पक्षाच्या नेत्यांकडून कुठल्याही पद्धतीने विचारणा केली नाही किंवा कारवाई देखील केली नाही. गेल्या काही दिवसांपासून ते देवेंद्र फडणवीस यांच्यावर थेट हल्ले चढवत आहेत.

• संबंधित बातम्या

Eknath Khadse | स्पेशल रिपोर्ट | नाराज एकनाथ खडसे हाती घड्याळ बांधणार का?