जोपर्यंत नाना पटोलेंवर गुन्हा दाखल होत नाही तोपर्यंत पोलीस स्टेशन सोडणार नाही, नागपूरमध्ये भाजप आक्रमक 

भंडारा, नाशिक यानंतर आता नागपूरमध्ये नाना पटोले यांच्याविरोधात तक्रार दाखल करण्यात आली आहे. भाजपचे आमदार चंद्रशेखर बावनकुळे यांच्या नेतृत्वात भाजपचे कार्यकर्ते पोलीस स्टेशनमध्ये दाखल झाले आहेत.

BJP

नागपूर : काँग्रसचे प्रदेशाध्यक्ष नाना पटोले यांनी पंतप्रधान नरेंद्र मोदी यांच्याविषयी केलेल्या वक्तव्याने वादंग निर्माण झाले आहे. याविरोधात भाजप चांगलीच आक्रमक झाली आहे. ठिकठिकाणी नाना पटोले यांच्याविरोधात तक्रारी दाखल करण्यात आल्या आहेत. भंडारा, नाशिक यानंतर आता नागपूरमध्ये देखील नाना पटोले यांच्याविरोधात तक्रार दाखल करण्यात आली आहे. नागपूरच्या कोराडी पोलीस स्टेसनमध्ये ही तक्रार दाखल करण्यात आली आहे. यावेळी भाजपचे आमदार चंद्रशेखर बावनकुळे यांच्या नेतृत्वात भाजपचे कार्यकर्ते पोलीस स्टेशनमध्ये दाखल झाले आहेत. यावेळी त्यांनी नाना पटोले यांच्यावर 7 गुन्हे दाखल करावे अशी मागणी केली आहे. जोपर्यंत त्यांच्यावर गुन्हा दाखल होत नाही आणि एफआयर (FIR) ची प्रत आम्हाला मिळत नाही तोपर्यंत आम्ही पोलीस स्टेशनमधून जाणार नसल्याची भूमिका चंद्रशेखर बावनकुळे यांनी घेतलीय. यावेळी नाना पटोलेंच्या विरोधात जोरदार घोषणाबाजी देखील देण्यात आली.

या अंतर्गत गुन्हे दाखल करा

नाना पटोले यांनी मोदी यांच्याविरोधात भडकावू वक्तव्य केले असल्याचे बावनकुळे म्हणाले. पंतप्रधान नरेंद्र मोदीं यांच्या जीवाला धोका निर्माण करणे, मोदी यांच्या जीवाला धोका निर्माण करणाऱ्यांना पाठबळ देणे, आदर्श आचारसंहितेचे उल्लंघन करणे, जमावबंदी असताना जमाव तयार करणे,  समाजामध्ये तेढ निर्माण करणे, कोरोना नियमांचे पालन न करणे, देशात दंगे होती असे कृत्य करणे, आणि मोदी यांना जीवे मारण्याकरता षडयंत्र तयार करणे  या मुद्यातंगर्त  नाना पटोले यांच्यावर 7 गुन्हे दाखल करावे अशी मागणी बावनकुळे यांनी केली आहे.

यावेळी पोलीस स्टेशनमध्ये मोठ्या संख्येन भाजपचे कार्यकर्ते आले आहेत. तसेच नाना पटोले यांच्या विरोधात ते घोषणाबाजी देखील देत आहेत. जोपर्यंत नाना पटोले यांच्या विरोधात गुन्हा दाखल होत नाही आणि एफआयरची प्रत मिळत नाही, तोपर्यंत आम्ही पोलीस स्टेशनमधून जाणार नसल्याचे बावनकुळे यांनी सांगितले आहे. त्यामुळे पटोले यांच्यावर गुन्हा दाखल होणार का? पोलीस त्यांना अटक करणार का हे आता पाहावे लागेल.

नेमकं काय म्हणाले होते नाना पटोले

भंडारा जिल्ह्यात रविवारी जिल्हा परिषद आणि पंचायत समितीचा निवडणूक प्रचार करण्याचा शेवटचा दिवस होता. त्यामुळे काँगेस प्रदेशाध्यक्ष नाना पटोले यांनी आपल्या मतदार संघात पक्षाचा पाया मजबूत करण्यासाठी विविध ठिकाणी सभा घेतल्या.रविवारी संध्याकाळी घेण्यात आलेल्या प्रचारसभेच्या दरम्यान नाना पटोले यांनी 'मी मोदीला मारू शकतो व शिव्याही देऊ शकतो' असे वक्तव्य केले होते. या संबंधिचा एक व्हिडीओ आता चांगलाच व्हायरल होताना दिसतोय. 

महत्त्वाच्या बातम्या: