Sharad Pawar EXCLUSIVE: संसदीय राजकारणात भाजपला मदत? मोदींकडून कौतुक, शरद पवारांनी स्पष्ट सांगितले
Sharad Pawar EXCLUSIVE: पंतप्रधान मोदी यांच्याकडून शरद पवार यांचे कौतुक केले जाते. राष्ट्रवादीकडूनदेखील संसदेत काही प्रमाणात मवाळ भूमिका घेतली जाते. यावर पवार यांनी आपली भूमिका स्पष्ट केली.
Sharad Pawar EXCLUSIVE: संसदेत राष्ट्रवादी काँग्रेसकडून (NCP) भाजपला (BJP) पूरक अशी भूमिका घेतली जात असल्याचा आरोप करण्यात येतो. तर, दुसरीकडे राज्यातील भाजपचे नेते शरद पवार (Sharad Pawar), अजित पवार (Ajit Pawar) आणि राष्ट्रवादी काँग्रेसच्या नेत्यांवर टीकेची झोड उठवत असताना पंतप्रधान नरेंद्र मोदी (PM Modi) हे शरद पवार यांचे कौतुक करतात. एबीपी माझा दिलेल्या विशेष मुलाखतीत शरद पवार यांनी यावर मनमोकळेपणाने भाष्य केले,
शरद पवार यांनी म्हटले की, एखाद वेळेस आम्ही सभागृहात वेगळी भूमिका घेतली असेल, हे मान्य आहे. काही बाबतीत मतभिन्नता असू शकेल. याचा अर्थ मतभेद नव्हे. मत मांडण्याचे, व्यक्त करण्याचा अधिकार सगळ्यांना आहे. तो सभागृहात व्यक्तदेखील केला जातो. विरोधकांना एकत्र ठेवण्यासाठी विधेयकाच्या बाजूने मतदान करण्याऐवजी सभागृहातून सभा त्याग करणे हे पाऊल चांगले आहे असे पवार यांनी म्हटले. अनेक मुद्यांवर अनेकांची मते, भूमिका वेगवेगळी असतात याकडेही पवार यांनी लक्ष वेधले.
लोकसभा, राज्यसभा, विधानसभा, विधान परिषद या संसदीय राजकारणात मला 54 वर्ष झाले. देशात एवढी वर्ष काम केलेला दुसरा नेता नाही. इतकी वर्ष संसद-विधीमंडळात काम केल्यानंतर काही प्रमाणात आम्हालादेखील अनुभव असेल. माझा दृष्टीकोण असा आहे की, सत्ताधारी-विरोधी पक्षाचा नेता, पंतप्रधान या एक संस्था आहेत. त्यांच्यावर धोरणाच्या अनुषंगाने टीका व्हावी, त्यांच्यावर वैयक्तिक टीका होता कामा नये असे शरद पवार यांनी स्पष्ट केले.
मविआत जागा वाटपाचे काय?
लोकसभेच्या निवडणुकीसाठी वर्षभराचा काळ उरला आहे. महाविकास आघाडीमध्ये तिन्ही पक्षातील जागा वाटपांबाबत चर्चा अद्याप सुरू झाली नसल्याचे चित्र आहे. महाविकास आघाडीतील जागा वाटपाबाबत शरद पवार यांनी म्हटले की, आघाडीच्या राजकारणात जागा वाटप, खाते वाटप या सहजपणे होत नाही. त्यात दावे होतात. मात्र, चर्चेच्या माध्यमातून प्रश्न सोडवले जातील आणि जागा वाटप होईल. जागा वाटप करताना काही जागा सोडाव्या लागतील तर काही जागा या घ्याव्या लागतील. त्याला आघाडीतील लोकांची तयारी असल्याचे पवार यांनी स्पष्ट केले.
फडतूस-काडतूसवर पवारांनी कान टोचले
राज्यात फडतूस शब्दावरुन माजी मुख्यमंत्री उद्धव ठाकरे आणि विद्यमान उपमुख्यमंत्री देवेंद्र फडणवीस यांच्यात जोरदार सामना पाहायला मिळाला. परंतु फडतूस आणि काडतूस शब्दावरुन शरद पवार यांनी सर्वच नेत्यांचे कान टोचले. वैयक्तिक टीकाटिप्पणी करु नका, असे खडेबोल शरद पवार यांनी उद्धव ठाकरे आणि देवेंद्र फडणवीस यांना सुनावले. "मला जो महाराष्ट्र माहित आहे, जी संस्कृती माहित आहे, जनतेची मानसिकता माहित आहे, अशा गोष्टी शक्यतो टाळा. वैयक्तिक हल्ला नको, राजकीय विषय घ्या, लोकांचे विषय घ्या, त्यावर आक्रमक व्हा, परंतु वैयक्तिक हल्ला, चिखलफेक ही स्थिती येता कामा नये. हे टाळण्याचं काम जाणीवपूर्व केलं पाहिजे, असं शरद पवार म्हणाले.
इतर महत्त्वाच्या बातम्या:
महत्त्वाच्या बातम्या
