धक्कादायक! बेपत्ता बालकाचा विहिरीत आढळला मृतदेह, बीड जिल्ह्यात खळबळ, चिंचा खाण्याच्या नादात दुर्घटना घडल्याचा संशय
बीडच्या धारुर तालुक्यातील जवळा येथे सोमवारपासून बेपत्ता असलेल्या चार वर्षीय बालकाचा मृतदेह विहिरीत आढळून आल्याने खळबळ उडाली आहे.
Beed News : बीडच्या धारुर तालुक्यातील जवळा येथे सोमवारपासून बेपत्ता असलेल्या चार वर्षीय बालकाचा मृतदेह विहिरीत आढळून आल्याने खळबळ उडाली आहे. असेफ समद शेख हा चार वर्षीय बालक सोमवारी सायंकाळ पासून बेपत्ता होता. नातेवाईक ग्रामस्थ पोलिसांनी रात्रभर त्याचा सर्वत्र शोध घेतला. मात्र तो सापडला नाही. आज पुन्हा एकदा ग्रामस्थांनी शोधमोहीम सुरू केली असता त्याच्या घरापासून जवळ असलेल्या मिसाळ यांच्या शेतातील विहिरीत त्याचा मृतदेह आढळून आला.
विहिरीच्या बाजूला असलेल्या फिरंगी झाडाच्या चिंचा खाण्याच्या नादात हा बालक विहिरीत पडल्याचा संशय ग्रामस्थांनी व्यक्त केला आहे. शवविच्छेदन अहवालात मृत्यूचे नेमके कारण समोर येणार आहे. धारूर येथील ग्रामीण रुग्णालयात शवविच्छेदनानंतर दफन विधी करण्यात आला. दरम्यान या घटनेनंतर जवळा गावावर शोककळा पसरली आहे.
हॉटेलमध्ये चहा पीत बसलेल्या दोघांचा जागीच मृत्यू
चारचाकी गाडीचा धाराशिव जिल्ह्यात भीषण अपघात झालाय. यामध्ये दोन जणांचा जागीच मृत्यू झाला आहे. गाडी थेट हॉटेलमध्येच घुसली. यामध्ये हॉटेलमध्ये चहा पीत बसलेल्या दोघांचा जागेवरच मृत्यू झाला आहे. सोलापूरकडून हैदराबादला जाणाऱ्या कारचे टायर फुटून उमरगा चौरस्ता येथे ही घटना घडली आहे.
गडचिरोली अनियंत्रित ट्रकची तीन वाहनांना धडक, 4 जण गंभीर जखमी
गडचिरोली-चामोर्शी मार्गावरील कुनघाडा बस थांब्यावर मंगळवारी दुपारी भीषण अपघात घडला. अनियंत्रित ट्रकने थांब्यावर उभ्या असलेल्या ऑटो, पिकअप व्हॅन आणि दुचाकी अशा तीन वाहनांना जोरदार धडक दिली. यात ऑटोत बसलेले चार प्रवासी गंभीर जखमी झाले आहेत. या अपघाताचा धडकी भरवणारा सीसीटीव्ही समोर आलाय. अपघातानंतर स्थानिक नागरिकांनी तातडीने मदतीसाठी धाव घेत सर्व जखमींना कुनघाडा येथील प्राथमिक आरोग्य केंद्रात दाखल केले. त्यांच्यावर उपचार सुरू असून चालकाला पोलिसांनी अटक केली आहे.
बीड शहरात रिक्षा आणि दुचाकीचा विचित्र अपघात, तीन ते चार जण जखमी
बीड शहरात रिक्षा आणि दुचाकीचा विचित्र अपघात समोर आला. शहरातील बालपीर भागात बीड- अहिल्यानगर राष्ट्रीय महामार्गावर भरधाव रिक्षाचे चाक निखळल्याने हा अपघात घडला. या रिक्षाने तीन दुचाकींना धडक दिली. यात तीन ते चार जण जखमी झाले आहेत. तर रिक्षामध्ये बसलेल्या महिला प्रवासी जखमी झाल्या आहेत.. या अपघाताची घटना सीसीटीव्ही कॅमेऱ्यात कैद झाली. रिक्षाचे पुढील चाक हवेमध्ये तर पाठीमागच्या दोन चाकावरच रिक्षा दुचाकींना धडक देताना दिसत आहे.
महत्त्वाच्या बातम्या
