![ABP Premium](https://cdn.abplive.com/imagebank/Premium-ad-Icon.png)
बारामतीत दारुचा ट्रक पलटी झाल्याचा बनाव करून दारु चोरली, दोघांना अटक
दोन दिवसांपूर्वी बारामती तालुक्यातील उंडवडी येथे दारु वाहतूक करणारा ट्रक पलटी झाल्याची घटना घडली होती.
![बारामतीत दारुचा ट्रक पलटी झाल्याचा बनाव करून दारु चोरली, दोघांना अटक Baramati alcohol loot two arrested for stealing liquor in Baramati बारामतीत दारुचा ट्रक पलटी झाल्याचा बनाव करून दारु चोरली, दोघांना अटक](https://feeds.abplive.com/onecms/images/uploaded-images/2021/11/03/d52f1581059222c06ac9d502c9861ee1_original.jpeg?impolicy=abp_cdn&imwidth=1200&height=675)
बारामती : दारुची वाहतूक करणाऱ्या ट्रकचा अपघात झाल्याचा बनाव करुन सर्व दारु चोरल्याची घटना बारामतीमध्ये घडली आहे. 28 ऑक्टोबरला बारामती तालुका पोलीस ठाण्याच्या हद्दीत ही घटना घडली होती. या प्रकरणी बारामती पोलिसांनी दोघांना अटक केली आहे.
मॅकडॉल कंपनीमधून 28 ऑक्टोबरला दारुच्या बॉक्सचा 65 लाख 87 हजारांचा माल घेऊन एक ट्रक जात होता. उंडवडी कडेपठार या ठिकाणी या ट्रकच्या अपघाताचा बनाव करून ट्रकचा चालक अंकुश बेंद्रे आणि मालक अजिनाथ जराड याने नंदकुमार क्षिरसागर याच्या मदतीने ट्रकमधील दारुचे 500 बॉक्स चोरले. हा सर्व मुद्देमाल 40 लाखांचा आहे. या प्रकरणी चालक अंकुश बेंद्रे व ट्रकचा मालक अजिनाथ जराड या दोघांविरोधात अपघाताचा बनाव करत अपहार केल्याचा गुन्हा दाखल केला आला आहे.
पोलिसांनी दिलेल्या माहितीनुसार, दोन दिवसांपूर्वी बारामती तालुक्यातील उंडवडी येथे दारु वाहतूक करणारा ट्रक पलटी झाल्याची घटना घडली होती. या अनुषंगाने पोलीस निरीक्षक महेश ढवाण यांनी गुन्हे शोध पथकाला तपासाचे आदेश दिले होते. उंडवडी येथे घडलेल्या अपघाताची माहिती घेतली. चालकाला विचारलेल्या प्रश्नांवरून संशय निर्माण झाल्याने गुन्हे शोध पथकाने ट्रक कंपनी मधून निघाल्यापासून रोडचे सीसीटीव्ही फुटेज तपासले. ट्रक हा पहिल्यांदा भवानीनगर या दिशेने गेल्याचे निदर्शनास आले. त्यावरून गुन्हे शोध पथकाने कसून चौकशी केली असता फिर्यादींनी स्वतःच्या आर्थिक फायद्यासाठी अपघाताचा बनाव करत, त्याचा मित्र नंदकुमार क्षीरसागर याच्या गोडाऊनमध्ये तब्बल 500 दारुचे बॉक्स असा 40 लाखांचा माल ठेवण्यात आला आणि उंडवडी मधून जात असताना ट्रॅकला अपघात झाला असे भासवण्याकरीता ट्रॅक पलटी करून गावातील लोकांनी दारुचा मुद्देमाल उचलून नेल्याची फिर्याद दिली होती.
गुन्हे शोध पथकाने सखोल तपास करत अपहार केलेला 40 लाखांचा मुद्देमाल हस्तगत केला असून या गुन्ह्यात दोघांना अटक करण्यात आली आहे.
महत्वाच्या बातम्या :
महत्त्वाच्या बातम्या
ट्रेंडिंग न्यूज
![ABP Premium](https://cdn.abplive.com/imagebank/metaverse-mid.png)
![उमेश अलोणे, एबीपी माझा](https://feeds.abplive.com/onecms/images/author/edf3be0fff591493dbcd992552913783.jpeg?impolicy=abp_cdn&imwidth=70)