Winter Assembly Session : सीमावाद आणि महापुरूषांच्या अपमानावरून विरोधक आक्रमक, गदारोळानंतर कामकाज स्थगित, जाणून घ्या अधिवेशनात काय घडलं

Winter Assembly Session : महाराष्ट्र आणि कर्नाटकातील सीमावाद, महापुरुषांचा अपमान आणि राज्यातील उद्योग दुसऱ्या राज्यात जात असल्याच्या मुद्द्यावरून विधानसभेच्या हिवाळी अधिवेशनाच्या पहिल्याच दिवशी विरोधकांनी सत्ताधारी भाजप-शिंदे गटाला धारेवर धरलं.

Winter Assembly Session

Winter Assembly Session : आजपासून राज्याचे हिवाळी अधिवेशन सुरू झालं आहे. विविध मुद्यांवरून विरोधकांनी राज्य सरकारला घेरण्याची तयारी केली आहे. तर, विरोधकांच्या आरोपांना परतवून लावण्याची तयारी सत्ताधाऱ्यांनी केली आहे. या अधिवेशनात महाराष्ट्रातील महापुरुषांच्या अवमानावरून आणि सीमा प्रश्नावरून सरकारला घेरण्याचा इशारा विरोधकांनी दिला आहे. लोकायुक्त कायद्याचं विधेयकदेखील अधिवेशनात मांडण्यात येणार आहे. परंतु, सत्ताधारी आणि विरोधकांच्या गदारोळात विधानसभेचं कामकाज आज दिवसभरासाठी स्थगित करण्यात आलं आहे. 

Winter Assembly Session : दिवसभरासाठी कामकाज स्थगित

महाराष्ट्र आणि कर्नाटकातील सीमावाद, महापुरुषांचा अपमान आणि राज्यातील उद्योग दुसऱ्या राज्यात जात असल्याच्या मुद्द्यावरून विधानसभेच्या हिवाळी अधिवेशनाच्या पहिल्याच दिवशी विरोधकांनी सत्ताधारी भाजप-शिंदे गटाला धारेवर धरलं. विरोधकांच्या आरोपांना मुख्यमंत्री एकनाथ शिंदे यांनी प्रत्युत्तर दिलं. तरी देखील विधानसभेत दोन्ही बाजूच्या आमदारांनी गदारोळ केला. त्यानंतर विधानसभेचे अध्यक्ष राहुल नार्वेकर यांनी सभागृहाचं कामकाज दिवसभरासाठी स्थगित करण्याचा निर्णय घेतला. 

Winter Assembly Session : विधानभवनातील शिवसेना कार्यालय दोन्ही गटांमध्ये विभागणी 

अधिवेशनात आज सर्वात महत्वाचा मुद्दा होता तो म्हणजे शिंदे गट आणि ठाकरे गटाला कार्यलय कसे मिळणार. परंतु, शिवसेना उद्धव बाळासाहेब ठाकरे आणि बाळासाहेबांची शिवसेना या दोन्ही पक्षांसाठी शिवसेनेच्या कार्यालयाची विभागणी करण्यात आली आहे. दोन्हीही कार्यालये आजूबाजूला असणार आहेत. 

Winter Assembly Session : सुषमा अंधारे यांच्याविरोधात शिंदे गट आक्रमक

 शिंदे गटाचे मंत्री आणि आमदार सुषमा अंधारेंच्या विरोधात आक्रमक पवित्र्यात होता. विधानभवनाच्या पायऱ्यांवर सर्व मंत्री आणि आमदारांनी आंदोलन केले. 

Winter Assembly Session : विधीमंडळ अधिवेशनाच्या पायऱ्यांवर विरोधकांचे आंदोलन

विधिमंडळाच्या पायऱ्यांवर विरोधकांकडून देखील सरकारविरोधात घोषणाबाजी करत आंदोलन करण्यात आले. 

Winter Assembly Session : महाराष्ट्र सरकार सीमावासियांच्या पाठिशी, मुख्यमंत्री एकनाथ शिंदे यांनी सभागृहात स्पष्ट केली भूमिका

सीमा प्रश्नाच्या मुद्यावर मुख्यमंत्री एकनाथ शिंदे यांनी आज सभागृहात सरकारची भूमिका स्पष्ट केली. केंद्र सरकारकडून या प्रकरणात पहिल्यांदा हस्तक्षेप करण्यात आला असल्याचे मुख्यमंत्र्यांनी म्हटले. केंद्रीय गृहमंत्री यांनी केंद्र सरकारची भूमिका माध्यमांसमोर मांडली आहे. याचे तुम्ही स्वागत करायला हवे असेही त्यांनी म्हटले. मागील अडीच वर्षात आधीच्या सरकारने निधी आणि योजना बंद केल्या होत्या त्या आम्ही सुरु केल्या असल्याचे देखील मुख्यमंत्र्यांनी यावेळी सांगितले.  

Winter Assembly Session : राष्ट्रवादीच्या आमदार सरोज अहिरे बाळाला घेऊन अधिवेशनात 

 राष्ट्रवादी काँग्रेसच्या आमदार सरोज अहिरे अडीच महिन्याच्या बाळाला घेऊन अधिवेशनासाठी उपस्थित राहिल्या. सरोज यानाशिकच्या देवळाली मतदारसंघाच्या आमदार आहेत. त्यांचा अडीच महिन्याचा बाळ प्रशंसक हा त्यांच्या शिवाय राहत नाही. त्यामुळे त्या आपल्या बाळाला घेऊनच आज विधानभवनात पोहोचल्या. विधानभवनात लहान बाळांसाठी करण्यात आलेल्या विशेष कक्षात प्रशंसकला ठेवून त्या विधानसभेच्या कामकाजात सहभागी झाल्या. 

Winter Assembly Session : विधान भवन परिसरात 'शाई पेन'वर बंदी

यंदा प्रथमच विधान भवन परिसरात शाईचे पेन घेऊन जाण्यास प्रतिंबध घालण्यात आला आहे. भाजप नेते चंद्रकांत पाटील यांच्यावर झालेल्या शाईफेकी नंतर राज्यभरात हे प्रकरण गाजले होते. या प्रकरणानंतर सुरक्षा यंत्रणा सतर्क झाल्या असून खबरदारीचा उपाय म्हणून विधानभवन परिसरात शाईच्या पेनवर बंदी घालण्यात आली आहे. शालेय शिक्षणमंत्री दीपक केसरकर यांनीही खबरदारीचा उपाय म्हणून शाई पेनवर बंदी घालण्यात आल्याची माहिती दिली.