शाहू महाराजांनी जाहीर पत्रातून सगळंच सांगितलं, कोल्हापूर राड्याची दुसरी बाजू समोर, सतेज पाटलांना काय म्हणाले?
Shahu Maharaj Kolhapur : कार्यकर्त्याला नाराज करून निवडणूक लढवणं मान्य नाही, सर्वसामान्य कार्यकर्त्याच्या सन्मानासाठी मधुरिमाराजेंचा अर्ज मागे घेतला असं खासदार शाहू महाराज यांनी स्पष्ट केलं.
कोल्हापूर : राज्यात चर्चेचा विषय ठरलेल्या कोल्हापूर उत्तरमध्ये झालेल्या राड्यावर आता खुद्द शाहू महाराजांनीच स्पष्टीकरण दिलं आहे. सामान्य कार्यकर्त्याच्या सन्मानासाठीच मधुरीमाराजे छत्रपती यांची माघार घेतल्याचा खुलासा खासदार शाहू महाराजांनी पत्रकाद्वारे केला. काँग्रेसच्या सामान्य कार्यकर्त्याला नाराज करून निवडणूक लढवणं मान्य नाही, एकाच कुटुंबात दोन पदं नको ही आपली पहिल्यापासून भूमिका असल्याचं शाहू महाराजांनी म्हटलंय. राजेश लाटकर हे काँग्रेस विचारांचे असून त्यांच्या विजयासाठी प्रयत्न करू असंही शाहू महाराजांनी म्हटलंय.
कोल्हापूर उत्तर विधानसभेच्या काँग्रेसच्या अधिकृत उमेदवार मधुरिमाराजे छत्रपती यांनी शेवटच्या क्षणी त्यांचा अर्ज मागे घेतला होता. त्यामुळे कोल्हापूर उत्तरसाठी काँग्रेस पक्षाचा उमेदवारच राहिला नाही. त्यामुळे काँग्रेस नेते सतेज पाटील चांगलेच भडकले असल्याचा व्हिडीओ व्हायरल झाला होता. त्या सर्व प्रकरणावर आता स्वतः शाहू महाराजांनीच भूमिका स्पष्ट केली.
Shahu Maharaj Letter : शाहू महाराजांनी पत्रात काय म्हटलंय?
काँग्रेसच्या सामान्य कार्यकर्त्याला नाराज करून निवडणूक लढवणे मान्य नसल्यामुळे कोल्हापूर उत्तर मतदार संघातून सौ. मधुरिमाराजे छत्रपती यांची उमेदवारी मागे घेण्यात आली. याशिवाय अन्य कोणतेही कारण उमेदवारी मागे घेण्यामागे नाही.
एका कुटुंबात दोन पदे नकोत म्हणून मधुरिमाराजे यांनी निवडणूक लढवायची नाही, असे आमचे आधीच ठरले होते. त्यामुळे त्या काँग्रेसच्या मुलाखतीसाठीही गेल्या नव्हत्या. परंतु राजेश लाटकर यांना उमेदवारी जाहीर झाल्यानंतर विरोध होऊ लागल्यावर एका विशिष्ट परिस्थितीत अनेकांच्या आग्रहास्तव काँग्रेस पक्षाची गरज म्हणून त्यांनी उमेदवारी स्वीकारली होती. लाटकर यांनी उमेदवारी मागे घेतली तरच लढायचे असे आमचे ठरले होते आणि लाटकर कुटुंबीयांसोबत झालेल्या चर्चेतही आम्ही त्यांच्याजवळ ही गोष्ट स्पष्ट केली होती. लाटकरांशी झालेल्या भेटीचा वृत्तांत पक्षनेतृत्वाला दिला होता. त्यांनी माघार न घेतल्यामुळे काँग्रेसच्या कार्यकर्त्यांचा सन्मान राखावा म्हणून अखेरच्या क्षणी आम्ही माघारीचा निर्णय घेतला.
काँग्रेस पक्षाचा अधिकृत उमेदवार रिंगणात नसला तरी राजेश लाटकर हे काँग्रेस विचाराचे पर्यायाने कॉग्रेस पुरस्कृत उमेदवार आहेत आणि त्यांना निवडून आणण्यासाठी आम्ही सर्व ताकदीनिशी प्रयत्न करणार आहोत.
Shahu Maharaj On Satej Patil : सतेज पाटलांवर शाहू महाराज काय म्हणाले?
श्री. सतेज पाटील हे कोल्हापूर जिल्ह्याचे काँग्रेसचे नेते आहेत. राज्यपातळीवर नेते म्हणून ते उत्तम काम करीत आहेत. त्यांना ताकद देणे ही आमची जबाबदारी आहे. त्यामुळे कोल्हापूर उत्तरमधील राजेश लाटकर यांच्यासह जिल्ह्यातील काँग्रेसच्या अन्य चार जागा तसेच महाविकास आघाडीच्या सर्व जागा जिंकण्यासाठी आम्ही एकत्रितपणे प्रयत्न करणार आहोत.
माघारीनंतरच्या घटनांमध्ये सतेज पाटील यांनी जाहीरपणे संताप व्यक्त केला. कार्यकर्त्यांना उ‌द्देशून त्यांनी आपल्या भावना व्यक्त केल्या. त्यावरून काही विरोधक आमचा अपमान झाला, असा कांगावा करीत आहेत. प्रत्यक्षात सतेज पाटील यांच्याकडून तसे काही घडलेले नाही. आमच्यात कोणतेही मतभेद नाहीत. माघारीच्या घटनेनंतर आम्ही भुदरगडच्या कार्यक्रमात एकत्र होतो आणि तिथून एकाच गाडीतून परत आलो.
विधानसभा निवडणुकीच्या माघारीनंतर काही लोक सोशल मीडियावर मी खासदारकीचा राजीनामा देणार असल्याच्या अफवा पसरवत आहेत, त्यात अजिबात तथ्य नाही. कोल्हापूरच्या साडेसात लाखांहून अधिक लोकांनी मला विक्रमी मते देऊन निवडून दिले आहे. कोल्हापूर जिल्ह्याचा प्रतिनिधी म्हणून देशाच्या संसदेत मी काम करीत आहे आणि काँग्रेसचा व महाविकास आघाडीचा खासदार म्हणून लोकांची सेवा करीत राहणार आहे.
ही बातमी वाचा:
महत्त्वाच्या बातम्या
ट्रेंडिंग न्यूज
