Ichalkaranji Vidhan Sabha : इचलकरंजीतून राहुल आवाडेच उमेदवार! महायुतीला पाठिंबा दिलेल्या अपक्ष आमदार प्रकाश आवाडेंची मोठी घोषणा
Ichalkaranji Vidhan Sabha : कार्यकर्त्यांमध्ये आणि मतदारसंघांमध्ये कोणतीही संभ्रमावस्था राहू नये यासाठी मी हा निर्णय घेतला असल्याचे प्रकाश आवडे यांनी आपला निर्णय जाहीर करताना सांगितले.
कोल्हापूर : कागल विधानसभा मतदारसंघातून उपमुख्यमंत्री अजित पवार यांनी वैद्यकीय शिक्षण मंत्री हसन मुश्रीफ यांची महायुतीकडून कोल्हापूर जिल्ह्यातील पहिली उमेदवारी जाहीर करण्यात आल्यानंतर आता अवघ्या चार दिवसांमध्येच इचलकरंजीमधून सुद्धा विद्यमान आमदार प्रकाश आवाडे यांनी आपल्या मुलाची उमेदवारी जाहीर केली आहे. राहुल आवाडे हेच इचलकरंजी विधानसभा मतदारसंघातून निवडणुकीच्या रिंगणात असतील, अशी घोषणा आज प्रकाश आवाडे यांनी पत्रकार परिषदेत केली. त्यामुळे महायुतीला पाठिंबा दिलेला असतानाही प्रकाश आवाडे यांनी घेतलेल्या निर्णयाने भूवया उंचावल्या आहेत.
आम्ही कोणाकडे उमेदवारी मागायला जाणार नाही
दरम्यान, महायुतीने पाठिंबा दिल्यानंतर काय निर्णय घेणार याबाबत विचारले असता त्यांनी या संदर्भातील निर्णय त्यावेळी पाहू असे सांगितले. आम्ही कोणाकडे उमेदवारी मागायला जाणार नाही. ते ताराराणी पक्षाकडून ती उभे राहतील असे त्यांनी सांगितले. आमदार प्रकाश आवाडे यांनी इचलकरंजीमधून राहुल आवाडे यांची उमेदवारी जाहीर करताना अजून तीन ते चार ठिकाणी उमेदवार देणार असल्याची घोषणा केली. हे सर्व उमेदवार ताराराणीच्या चिन्हावर उभा करणार असल्याचेही आवाडे यांनी म्हटलं आहे.
राहुल आवाडे हेच इचलकरंजीमधून उमेदवार असतील
पक्ष कोणता असेल याची चर्चा करण्यापेक्षा राहुल आवाडे हेच इचलकरंजीमधून उमेदवार असतील. कार्यकर्त्यांमध्ये आणि मतदारसंघांमध्ये कोणतीही संभ्रमावस्था राहू नये यासाठी मी हा निर्णय घेतला असल्याचे प्रकाश आवडे यांनी आपला निर्णय जाहीर करताना सांगितले.
ते म्हणाले की, मागील वेळी सुद्धा मी स्वतःच लढण्याचा निर्णय घेतला होता. मात्र निवडून आल्यानंतर भाजपला पाठिंबा दिला होता. गेल्या पाच वर्षांपासून आम्ही प्रामाणिकपणे भाजपचे पाठीशी उभा असल्याचं प्रकाश आवाडे यांनी नमूद केले. माझ्या निर्णयाबाबत वरिष्ठांना माहिती दिली असल्याचेही प्रकाश आवाडे यांनी सांगितलं. उमेदवारी संदर्भात कोणताही वेळ घालवायला नको. कार्यकर्ते जोमाने काम करत आहेत. राहुल आवाडे यांचं काम घरोघरी पोहोचवण्याचं काम सुरू असून कोणत्याही प्रकारे संभ्रमावस्था नको म्हणून हा निर्णय घेतला असल्याचे प्रकाश आवाडे म्हणाले. त्यामुळे आता कोल्हापूर जिल्ह्यातील दोन मतदारसंघांमध्ये उमेदवार निश्चित झाल्याचे चित्र आहे. आवाडे यांनी इचलकरंजीसह हातकणंगले आणि शिरोळमधून उमेदवार देण्याचे सुतोवाच केले आहेत.
इतर महत्वाच्या बातम्या
महत्त्वाच्या बातम्या
