Kolhapur News : दिवंगत आमदार अनिल बाबरांच्या समर्थकांना अश्रू अनावर; पोरके झाल्याची भावना

अनिलभाऊ व्यासपीठावर येऊन मार्गदर्शन करतील असं वाटतं होतं, पण त्यांचे निधन झाल्याने सर्वच कार्यकर्ते पोरके झाले आहेत, अशी भावना दिवंगत आमदार अनिल बाबर यांच्या समर्थकांनी व्यक्त केली.

shinde faction maha adhiveshan kolhapur

कोल्हापूर : सांगली जिल्ह्यातील जत खानापूर आटपाडीचे आमदार अनिल बाबर (Anil Babar) यांचे नुकतेच आकस्मिक निधन झाले. दिवंगत आमदार अनिल बाबर यांचे समर्थक मोठ्या संख्येने कोल्हापुरात (Kolhapur News) शिंदे गटाच्या सभेला उपस्थित आहेत. शिवसेनेचं दोनदिवसीय अधिवेशन कोल्हापुरात पार पडले. यानंतर आज (17 फेब्रुवारी) गांधी मैदानात जाहीर सभा होत आहे. 

या सभेला अनिल बाबर समर्थक उपस्थित राहिले आहेत. यावेळी समर्थकांना सभा ठिकाणी अश्रू अनावर झाले. अनिलभाऊ व्यासपीठावर येऊन मार्गदर्शन करतील असं वाटतं होतं, पण त्यांचे निधन झाल्याने सर्वच कार्यकर्ते पोरके झाले आहेत, अशी भावना दिवंगत आमदार अनिल बाबर यांच्या खानापूर मतदार संघातून आलेल्या समर्थकांनी व्यक्त केली. कोल्हापुरात गांधी मैदानात शिंदे गटाच्या महाअधिवेशनानंतर जाहीर सभा होत आहे. या सभेतून शिंदे गटाकडून जोरदार तयारी करण्यात आली असून लोकसभेसाठी प्रचाराचा नारळ फोडण्यात येणार आहे. 

सरपंच ते आमदार असा प्रवास

दरम्यान, अनिल बाबर (Anil Babar) यांनी घरात कोणतीही राजकीय पार्श्वभूमी नसताना सरपंच ते आमदार असा मोठा राजकीय प्रवास केला. ते पहिल्यांदा 1972 मध्ये सांगली (Sangli News) जिल्हा परिषदेवर सदस्य म्हणून निवडून गेले. 1990 त्यांनी अपक्ष म्हणून आमदार निवडणूक लढवली. 1999 मध्ये दुसऱ्यांदा आमदार झाले. स्वर्गीय आर. आर. आबा यांच्याशी सुद्धा त्यांचे घनिष्ठ संबंध होते. 

सांगली जिल्ह्यात महत्वपूर्ण असलेल्या टेंभू योजनेचे जनक म्हणून ओळख ओळखले जाते. आमदार बाबर सलग 20 वर्ष जिल्हा मध्यवर्ती बँकेचे संचालक होते. मागील दोन निवडणूक त्यांनी शिवसेनेच्या (Shivsena) तिकिटावर लढवली होती. उपमुख्यमंत्री देवेंद्र फडणवीस (Devendra Fadnavis) यांच्याशी सुद्धा त्यांची जवळीक होती. ऐनवेळी फडणवीस यांच्या आग्रहामुळे गोपीचंद पडळकर यांनी 2019 ला पाठिंबा दिल्याने निवडणुकीत यश मिळाले होते. 

अनिल बाबर यांचा काँग्रेस, राष्ट्रवादी, शिवसेना असा राजकीय प्रवास राहिला. मुख्यमंत्री एकनाथ शिंदे (Eknath Shinde) यांचे अत्यंत विश्वासू सहकारी म्हणून ओळख होती. विटा आणि खानापूर मतदारसंघात एकनाथ शिंदे यांच्या सहकार्याने कोट्यवधींची विकासकामे मंजूर केली होती. सेना आमदारांची कामे होत नाही, म्हणून झालेल्या तक्रारींची चौकशी अहवाल तयार करा म्हणून मुख्यमंत्र्यांनी बाबर यांना दिली होती. 

इतर महत्वाच्या बातम्या