Kolhapur News : दाजीपूर ते राधानगरी वाहतूक मार्गात 1 एप्रिलपासून बदल; 'या' पर्यायी मार्गाचा वापर करता येणार
1 एप्रिल ते 31 मे 2023 या कालावधीत दाजीपूर ते राधानगरी रस्ता सर्व प्रकारच्या वाहतूकीस बंद करुन वाहतूक अन्य मार्गाने वळविण्यात येणार आहे. याबाबतची माहिती जिल्हाधिकारी राहुल रेखावार यांनी दिली आहे.
Kolhapur News : देवगड-निपाणी-कलादगी मार्गावर हायब्रीड ॲन्युटी या योजनेतंर्गत रस्त्याचे रुंदीकरण, डांबरीकरण, काँक्रीटीकरण, मोऱ्या आणि लहान पुलांच्या पुनर्बांधणीचे काम करण्यात येणार आहे. हे काम 1 एप्रिल ते 31 मे 2023 या कालावधीत करण्यात येणार आहे. त्यामुळे या कालावधीत दाजीपूर ते राधानगरी रस्ता सर्व प्रकारच्या वाहतूकीस बंद करुन वाहतूक अन्य मार्गाने वळविण्यात येणार आहे. याबाबतची माहिती कोल्हापूरचे जिल्हाधिकारी राहुल रेखावार यांनी दिली आहे.
या पर्यायी मार्गाने वाहतूक करता येणार
दाजीपूर ते राधानगरी रस्ता सर्व प्रकारच्या वाहतूकीस बंद करण्यात येणार आहे. त्यामुळे हलक्या आणि लहान वाहनांसाठी बालिंगा-महेपाटी कोते-धामोड-शिरगाव-तारळे पडळी-कारीवडे-दाजीपूर-ओलवण या मार्गाचा वापर करता येईल. तसेच मुदाळतिट्टा मार्गे येणारी हलकी आणि लहान वाहने सरवडे-सोळांकूर-राधानगरी (स्वरुप लॉज जवळून) राधानगरी महाविद्यालय-पिरळ पूल-मार्ग आणि कोकणातील वाहने फोंडा घाट-दाजीपूर-कारीवडे-पडळी-पिरळ पूल-राधानगरी या मार्गाने वळवावीत.
तसेच अवजड आणि मोठी वाहतूक रस्त्यावरुन पूर्णपणे बंद करुन कोकणातून कोल्हापूरकडे येणारी अवजड वाहने फोंडा-कणकवली फाटा-नांदगाव-तरेळे वैभववाडी-गगनबावडा मार्गे कोल्हापूर अशी वळविण्यात येत आहे. कर्नाटकातून येणारी अवजड वाहने कोकणामध्ये जाण्याकरीता मुदाळतिट्टा- आजरा - आंबोली - सावंतवाडी अशी वळविण्यात येत आहेत. नागरिकांच्या आणि वाहन चालकांच्या माहितीसाठी योग्य ठिकाणी दिशाचिन्हे व माहिती लावण्यात यावी, अशा आवश्यक उपाययोजना पोलीस अधीक्षक, कोल्हापूर, कार्यकारी अभियंता, सार्वजनिक बांधकाम (दक्षिण) विभाग, कोल्हापूर आणि उपप्रादेशिक परिवहन अधिकारी, कोल्हापूर यांनी याबाबत एकत्रितपणे कराव्यात, असेही आदेशात नमूद करण्यात आले आहे.
कोल्हापूरला रेल्वेनं प्रवास करणाऱ्यांसाठी 'गुड न्यूज'
गेल्या दीड वर्षांपासून प्रतीक्षेत असलेली सह्याद्री एक्स्प्रेस रेल्वे लवकरच सुरू केली जाणार आहे. त्यामुळे कोल्हापूर मुंबईला जाणाऱ्यांची मोठी सोय होणार आहे. सह्याद्री एक्स्प्रेस सुरू करण्यासाठी दिल्ली मुख्यालयाकडे प्रस्ताव देण्यात आला आहे.
दरम्यान, पुढील महिन्यापासून कोल्हापूर निजामुद्दीन, कोल्हापूर अहमदाबाद एक्स्प्रेस, कोयना एक्सप्रेस, कोल्हापूर कलबुर्गी सुपरफास्ट एक्स्प्रेसला जादा बोगी जोडण्यात येणार आहेत. त्यामुळे याचा फायदा कोल्हापूरसह सांगली मिरज शहरातील प्रवाशांना होणार आहे. सल्लागार समिती सदस्यांच्या बैठकीत कोल्हापूर निजामुद्दीन एक्स्प्रेसला तीन जादा बोगी आणि कोल्हापूर अहमदाबाद एक्स्प्रेसला तीन जादा बोगी, कोल्हापूर मुंबई कोयना एक्स्प्रेसला तीन जनरल बोगी, कोल्हापूर कलबुर्गी सुपरफास्ट एक्स्प्रेसला दोन स्लीपर डबे, दोन एसी थ्री टायर बोगी आणि कोल्हापूर नागपूर एक्स्प्रेसला एक जादा बोगी लावण्याचा सदस्यांच्या मागणीला मान्यता देण्यात आली आहे.
इतर महत्वाच्या बातम्या :
महत्त्वाच्या बातम्या
ट्रेंडिंग न्यूज
