Kolhapur Crime : कोल्हापुरात टोळीयुद्धातून रंकाळ्यावर तरुणाचा पाठलाग करून धारदार शस्त्रांनी निर्घृण खून
Kolhapur Crime : भर रंकाळा चौपाटीवर नागरिकांच्या डोळ्यासमोर सशस्त्र तरुणावर हल्ला करण्यात आला. अजय शिंदे असे मृत झालेल्या तरुणाचे नाव आहे.
कोल्हापूर : कोल्हापुरात भरदिवसा नेहमी गजबजलेल्या रंकाळ्यावर पाठलाग करून सशस्त्र हल्ला करत एकाचा निर्घृण खून करण्यात आला. ही घटना आज (4 एप्रिल) साडेपाच वाजण्याच्या सुमारास घडली. भर रंकाळा चौपाटीवर नागरिकांच्या डोळ्यासमोर सशस्त्र तरुणावर हल्ला करण्यात आला. अजय शिंदे असे मृत झालेल्या तरुणाचे नाव आहे. यादव नगरातील टोळी युद्धातून हा प्रकार घडल्याची प्राथमिक माहिती समोर येत आहे. पुर्ववैमनस्यातून हा खून झाल्याचे प्राथमिक तपास समोर आले आहे. दरम्यान, आज सकाळीच कोल्हापुरातील शहरातील हुतात्मा पार्कमध्ये ओढ्यात शीर नसलेला मृतदेह आढळला होता. त्यानंतर आता तरुणाचा खून झाल्याने शहरात खळबळ उडाली आहे.
24 वर्षीय तरुणीचा संशयास्पद मृत्यू
दरम्यान, कोल्हापुरात शनिवार पोस्ट ऑफिसजवळ वैष्णवी लक्ष्मीकांत पोवार (वय 24) हिचा सीपीआरमध्ये उपचारादरम्यान संशयास्पद मृत्यू झाला. आज (4 एप्रिल) घडलेल्या घटनेने खळबळ उडाली आहे. वैष्णवीच्या अंगावर मारहाण झाल्याच्या खुणा असल्याने मारहाणीत तरुणीचा मृत्यू झाला असावा, असा संशय व्यक्त केला जात आहे. वैष्णवी खासगी बँकेत नोकरीला होती. आज सकाळी तिला नातेवाईकांनी उपचारासाठी सीपीआरमध्ये दाखल केले. मात्र, उपचारादरम्यान तिचा मृत्यू झाला. तिच्या अंगावर मारहाणीच्या खुणा दिसत असल्याचे सीपीआरमधील डॉक्टरांनी पोलिसांना सांगितले. पोलिसांनी मृतदेहाची पाहणी करून मृत वैष्णवीची आई शुभांगी लक्ष्मीकांत पोवार (वय 50) आणि भावाला चौकशीसाठी ताब्यात घेतलं आहे.
इतर महत्वाच्या बातम्या
महत्त्वाच्या बातम्या
