Shivaji University : राज्यपाल भगत सिंह कोश्‍यारींविरोधात शिवसेनेकडून शनिवारी जेलभरो आंदोलन 

Kolhapur News : राज्यपाल भगतसिंह कोश्यारी यांना कोल्हापूरच्या शिवाजी विद्यापीठाच्या दीक्षांत समारंभासाठी आमंत्रित करण्यात आलं आहे. या दौऱ्याला शिवसेनेकडून (ठाकरे गट) कडाडून विरोध करण्यात आला आहे.

Governor Bhagat Singh Koshyari

Kolhapur News : राज्यपाल भगतसिंह कोश्यारी (Bhagat Singh Koshyari) यांना कोल्हापूरच्या शिवाजी विद्यापीठाच्या दिक्षांत समारंभासाठी (Convocation ceremony of Shivaji University) आमंत्रित करण्यात आलं आहे. विद्यापीठाचा (Shivaji University) दीक्षांत सोहळा 16 फेब्रुवारी रोजी होत आहे. या दौऱ्याला शिवसेनेकडून (ठाकरे गट) कडाडून विरोध करण्यात आला आहे. राज्यपालांच्या विरोधातील आंदोलनाचा पहिला टप्पा म्हणून शनिवारी जेलभरो आंदोलन शिवसेनेकडून करण्यात येणार आहे. 

शनिवारी 11 फेब्रुवारी रोजी शिवाजी विद्यापीठाच्या प्रवेशद्वारात जेलभरो आंदोलन करण्यात येणार आहे. कोल्हापुरात येण्यापूर्वी राज्यपाल भगत सिंह कोश्यारी यांनी जाहीर माफी मागावी, अन्यथा 16 फेब्रुवारी रोजी दीक्षांत समारंभस्थळी  निदर्शने करण्याचा इशारा शिवसेनेकडून देण्यात आला आहे. शिवसेना जिल्हाप्रमुख संजय पवार, विजय देवणे यांनी त्याबाबतचे निवेदन कुलगुरू डॉ. दिगंबर शिर्के यांना दिले. यावेळी प्रभारी कुलसचिव डॉ. विलास शिंदे उपस्थित होते. शिवसेनेनं म्हटले आहे की, छत्रपती शिवाजी महाराज यांचा वारंवार अपमान करणाऱ्या राज्यपाल भगतसिंह कोश्यारी यांना शिवाजी विद्यापीठाने दीक्षांत समारंभासाठी निमंत्रित केले आहे. वारंवार आणि जाणीवपूर्वक राज्यपाल कोश्यारी हे छत्रपती शिवरायांबद्दल अनुद्‌गार काढतात, वादग्रस्त वक्तव्य करतात.

कोल्हापूरच्या जनतेच्या जखमेवर मीठ चोळले

कोल्हापुरात शिवरायांच्या नावाने असलेल्या शिवाजी विद्यापीठाच्या (Shivaji University) दीक्षांत समारंभास त्यांना निमंत्रित करून विद्यापीठ प्रशासनाने कोल्हापूरच्या जनतेच्या जखमेवर मीठ चोळले आहे. ते जनता कदापी सहन करणार नाही. त्यामुळे कोल्हापुरात येण्यापूर्वी राज्यपाल कोश्यारी यांनी माफी मागावी. त्यांच्या विरोधातील आंदोलनाचा पहिला टप्पा म्हणून शनिवारी जेलभरो करण्यात येणार असल्याचे जिल्हाप्रमुख संजय पवा आणि विजय देवणे यांनी सांगितले. शिवसेनेनं घेतलेल्या आक्रमक भूमिकेनंतर आपल्या भावना, मागण्या शासनापर्यंत पोहोचविण्यात येतील, असे कुलगुरू डॉ. शिर्के यांनी म्हटले आहे. यावेळी रविकिरण इंगवले, मंजित माने, चंद्रकांत पाटील, लतीफ शेख, कमलाकर जगदाळे, पूनम फडतरे, राजेंद्र पाटील, अवधूत साळोखे, शशिकांत बिडकर, राजू जाधव आदी उपस्थित होते.

शिवाजी विद्यापीठाचा 16 फेब्रुवारीला दीक्षांत समारंभ 

दरम्यान, शिवाजी विद्यापीठाचा दीक्षांत समारंभ (Convocation ceremony of Shivaji University) 16 फेब्रुवारी रोजी होणार आहे. या समारंभाला राज्यपाल भगतसिंह कोश्यारी आणि माजी खासदार विनय सहस्त्रबुद्धे यांची प्रमुख उपस्थिती असणार आहे. शनिवारी (ता.04) झालेल्या व्यवस्थापन परिषदेच्या बैठकीत यावर शिक्कामोर्तब करण्यात आले होते. यामध्ये व्यवस्थापन परिषदेवरील नूतन सदस्य उपस्थित होते.

इतर महत्वाच्या बातम्या