Kolhapur News : 'गोकुळ' जातिवंत म्हैस पैदास केंद्राची उभारणी करणार; आमदार सतेज पाटील यांची माहिती
मागणी वाढल्याने जनावरांच्या किमती वाढत आहेत. यासाठी भविष्यात अशा प्रकारच्या जातीवंत दुधाळ म्हशी गोकुळ कार्यक्षेत्रात तयार व्हाव्यात यासाठी केंद्राची उभारणी करणार असल्याचे सतेज पाटील यांनी सांगितले.
Kolhapur News : 'गोकुळ'कडून (Gokul) जातिवंत म्हैस पैदास केंद्र उभारणीचा उपक्रम हाती घेणार असल्याची माहिती आमदार सतेज पाटील (Satej Patil) यांनी दिली. या माध्यमातून चांगली जनावरे कोल्हापूर जिल्ह्यामध्येच मिळतील. भविष्यात सर्वांसाठी जातिवंत म्हशींची खरेदी-विक्रीचे बाजारपेठ उपलब्ध होईल, असेही त्यांनी सांगितले. सतेज पाटील यांनी सांगितले की, सध्या जिल्ह्यात दूध उत्पादकांना उच्च वंशावळीच्या जातिवंत म्हशी (मुऱ्हा, मेहसाणा जाफराबादी) खरेदी करण्यासाठी परराज्यांमध्ये जावे लागते. मागणी वाढल्याने जनावरांच्या किमतीही वाढत आहेत. यासाठी भविष्यात अशा प्रकारच्या जातिवंत दुधाळ म्हशी गोकुळ कार्यक्षेत्रात तयार व्हाव्यात यासाठी केंद्राची उभारणी करणार आहे.
वाढदिवसाचे औचित्य साधत उत्पादकांकडून 51 म्हशींची खरेदी
गोकुळने (Gokul) 20 लाख लिटर दूध संकलनाचा संकल्प केला असून हे उद्दिष्ट पूर्ण करण्यासाठी संघाचे चेअरमन विश्वास पाटील यांच्या मार्गदर्शनात शिरोली दुमाला येथील दूध उत्पादकांनी आमदार सतेज पाटील यांच्या 51 व्या वाढदिवसाचे औचित्य साधून हरियाणा जातीच्या 51 म्हशी खरेदी केल्या आहेत. आमदार पाटील यांच्या हस्ते त्या जनावरांचे पूजन झाले आणित्या दूध उत्पादकांना प्रशस्तीपत्र वाटप करण्यात आले. दूध उत्पादक शेतकऱ्यांनी आमदार सतेज पाटील यांना वाढदिवसानिमित्त शुभेच्छा दिल्या.
सतेज पाटील (Satej Patil) यांनी सांगितले की, "माझ्या 51 व्या वाढदिवसाचे औचित्य साधून आपण सर्वांना या पद्धतीचा हा एक शेतकरीभिमुख उपक्रम राबवला त्याबद्दल मनापासून धन्यवाद देतो. विश्वास पाटील म्हणाले की, गोकुळकडून दूध उत्पादक शेतकऱ्यांसाठी दूध वाढ कृती कार्यक्रम मोठ्या प्रामाणावर राबवला जात आहे. दूध उत्पादकांनी जातिवंत जनावरे खरेदी करुन दूध वाढ कृती कार्यक्रमात भाग घेतला आहे. दूध उत्पादकांचा हा प्रतिसाद वाखाणण्याजोगा आहे. गोकुळच्या योजनांचा लाभ घेऊन दूध वाढीसाठी दूध उत्पादकांनी प्रयत्नशील राहावे."
यावेळी संचालक बाबासाहेब चौगुले, अभिजीत तायशेटे, अजित नरके, शशिकांत पाटील चुयेकर, प्रकाश पाटील, मुरलीधर जाधव, बयाजी शेळके, संचालिका श्रीमती अंजना रेडेकर, कार्यकारी संचालक योगेश गोडबोले, व्यवस्थापक पशुसंवर्धन डॉ.यू.व्ही.मोगले, सहायक व्यवस्थापक डॉ. प्रकाश दळवी, संकलन व्यवस्थापक एस.व्ही.तुरंबेकर, शाहू दूध संस्थेचे चेअरमन सचिन विश्वास पाटील, माजी पंचायत समिती सदस्य सुनील पाटील, वीरशैव बँकेचे संचालक अनिल सोलापूरे, राहुल पाटील, नंदकुमार पाटील,माधव पाटील, एस.के.पाटील, शशिकांत खोत उपस्थित होते.
इतर महत्वाच्या बातम्या
Before You Go
Uddhav Thackeray Speech Shivaji Park : तुम्ही काठ्या घेऊन या, आम्ही तिरंगा घेऊन लढू, ठाकरेंचं चँलेज
महत्त्वाच्या बातम्या
