एक्स्प्लोर

Kolhapur Crime : शाहूवाडी तालुक्यात बिबट्याच्या हल्ल्यात मुलगी मृत्यूमुखी; उदगिरीपैकी केदारलिंगवाडी हद्दीतील घटना

Kolhapur Crime : कोल्हापूर जिल्ह्यातील शाहूवाडी तालुक्यातील (Shahuwadi Taluka) उदगिरीपैकी केदारलिंगवाडी हद्दीत बिबट्याने केलेल्या हल्ल्यात 10 वर्षीय चिमुरडीचा मृत्यू झाला.

By : विजय केसरकर, एबीपी माझा | Edited By: परशराम पाटील | Updated at : 21 Dec 2022 03:06 PM (IST)

Kolhapur Crime

Kolhapur Crime : कोल्हापूरजिल्ह्यातील शाहूवाडी तालुक्यातील (Shahuwadi Taluka) उदगिरीपैकी केदारलिंगवाडी हद्दीत बिबट्याने केलेल्या हल्ल्यात 10 वर्षीय चिमुरडीचा मृत्यू झाला. जनावरांना चरण्यासाठी घेऊन गेली असताना बिबट्याने हल्ला केल्याने मुलीचा मृत्यू झाला. मनीषा बाबाजी डोईफोडे (वय 10, सध्या. रा. केदारलिंगवाडी, मूळ रा. पुसाळे, ता. शाहूवाडी) असे मृत मुलीचे नाव आहे. ही घटना आज सकाळी साडेआठच्या सुमारास घडली. बिबट्यामुळे ग्रामस्थांमध्ये भीती पसरली आहे. (Kolhapur Crime)

शाहूवाडी (Shahuwadi Taluka) तालुक्यातील पुसाळे येथील बाबाजी डोईफोडे हे गेल्या चार महिन्यांपासून कुटुंबासह उदगिरी पैकी केदारलिंगवाडी येथे राहत आहेत. त्यांची पत्नी आणि मुलगी बुधवारी सकाळी साडेआठच्या सुमारास जनावरांना चरण्यासाठी घेऊन निघाल्या होत्या. केदारलिंग वाडीपासून एक किलोमीटर अंतरावर जनावरांच्या मागे असलेल्या मनीषा डोईफोडे या मुलीला बिबट्याने झडप मारून पकडले. काही अंतर पुढे गेल्यावर मुलीचा आवाज येत नसल्याचे तिच्या आईच्या लक्षात आले. आईने मुलीचा शोध सुरू केल्यानंतर काही अंतर मागे गवतात मुलीला ओढून नेणारा बिबट्या दिसला. आरडाओरडा करताच बिबट्या जंगलात पळून गेला.

या घटनेची माहिती मिळताच गावकऱ्यांनी घटनास्थळी धाव घेतली. बिबट्याने मान पकडल्याने मुलीचा जागीच मृत्यू झाला. या परिसरात बिबट्यांची दहशत वाढली असून, त्यांचा बंदोबस्त करावा अशी मागणी ग्रामस्थांकडून केली जात आहे. चांदोली अभयारण्यापासून जवळच हा परिसर असल्यामुळे बिबट्यांचा वावर वाढला आहे.

इतर महत्वाच्या बातम्या