Jalna News: जालना जिल्ह्यात वीजेच्या कडकडाटासह वादळी वारे, पावसाची शक्यता; प्रशासनाकडून खबरदारी घेण्याचे आवाहन

Jalna Rain News: जालना जिल्ह्यातील नागरिकांनी खबरदारी घेण्याचे आवाहन प्रशासनाने केले आहे. 

जालना जिल्ह्यात वीजेच्या कडकडाटासह वादळी वारे, पावसाची शक्यता; प्रशासनाकडून खबरदारी घेण्याचे आवाहन

Jalna Rain News: गेल्या चार दिवसांपासून मराठवाड्यात अवकाळी पाऊस (Unseasonal Rain) पडताना पाहायला मिळत आहे. दरम्यान मुंबईतील कुलाबा येथील प्रादेशिक हवामानशास्त्र केंद्र यांनी दिलेल्या सुचनेनुसार जालना जिल्ह्यात (Jalna District) उद्या (11 एप्रिल) पर्यंत यलो अलर्ट जारी करण्यात आला आहे. या कालावधीत तुरळक ठिकाणी विजेच्या कडकडाटासह हलका ते मध्यम स्वरुपाच्या पावसाची व ताशी 30-40 किमी प्रतितास वेगाने वादळी वारे वाहण्याची शक्यता वर्तवली आहे. त्यामुळे जालना जिल्ह्यातील नागरिकांनी खबरदारी घेण्याचे आवाहन प्रशासनाने केले आहे. 

जालना जिल्ह्यात उद्या (11 एप्रिल) पर्यंत यलो अलर्ट जारी करण्यात आला आहे. त्यामुळे या पार्श्वभूमीवर जिल्हा प्रशासनातर्फे नागरीकांना दक्षता घेण्याबाबत आवाहन करण्यात आले आहे. मेघगर्जनेच्या वेळी, वीजा चमकत असताना किंवा वादळी वारे वाहत असताना झाडाखाली किंवा झाडाजवळ उभे राहु नये. वीजेपासून बचावासाठी सुरक्षित ठिकाणी आश्रय घ्यावा. धोकादायक ठिकाणी सेल्फी काढू नये. गडगडाटीच्या वादळादरम्यान व वीजा चमकताना कोणत्याही विद्युत उपकरणांचा वापर करू नये वीजेच्या सुवाहक भागांशी संपर्क टाळावा. ट्रॅक्टर्स, शेतीची अवजारे, मोटारसायकल, सायकल यांचेपासून दूर रहावे. मोकळे मैदान, झाडाखाली, टॉवर्स, ध्वजाचे खांब, विद्युत दिव्यांचे खांब, धातुचे कुंपण, विदयुतवाहिनी अथवा ट्रॉन्सफोर्मजवळ थांबू नये. सर्व प्रकारच्या अधांतरी लटकणाऱ्या लोंबकळणाऱ्या तारांपासून दूर रहावे. वीजा चमकत असताना मोकळ्या जागेवर असल्यास सुरक्षेसाठी गुडघ्यावर बसून हाताने आपले कान झाकावे व आपले डोके दोन्ही गुडघ्यांच्यामध्ये झाकावे. जमीनीशी कमीतकमी संपर्क असावा. 

अशी घ्या काळजी! 

तसेच अवकाळी पाऊस व गारपीटीमुळे शेतीमालाचे नुकसान टाळण्यासाठी शेतकरी बांधवांनी वेळीच नियोजन करावे. शेतकऱ्यांनी शेतमाल सुरक्षित ठिकाणी साठवून ठेवावा. बाजार समितीमध्ये शेतमाल विक्रीसाठी आणला असेल किंवात्याप्रमाणे नियोजन केले असेल, तर सदर मालाचे नुकसान होणार नाही याची काळजी घ्यावी. जनावरांचे सुरक्षित ठिकाणी स्थलांतर करावे. तसेच सर्व नागरिकांनी वादळी वारे, वीज पासून स्वतः सह जनावरांचे संरक्षण होईल याबाबत योग्य ती दक्षता घ्यावी. आपत्कालीन परिस्थितीत नजीकचे तहसील कार्यालय, पोलीस स्टेशन यांचेशी संपर्क साधावा. तसेच जिल्हा नियंत्रण कक्ष, जिल्हाधिकारी कार्यालय, जालना येथील दुरध्वनी क्र. 02482-223132  यावर संपर्क साधावा, असे आवाहन प्र. निवासी उपजिल्हाधिकारी तथा जिल्हा आपत्ती व्यवस्थापन प्राधिकरणाचे मुख्य कार्यकारी अधिकारी अंजली कानडे-पवार यांनी प्रसिध्दी पत्रकाव्दारे केले आहे.

इतर महत्वाच्या बातम्या :