एक्स्प्लोर

Jalgaon Dudh Sangh : जळगाव दूध संघाच्या अध्यक्षपदी भाजप आमदार मंगेश चव्हाण, पदभार स्वीकारताच खडसेंचा फोटो हटवला

Jalgaon Dudh Sangh : जळगाव जिल्हा दूध संघाच्या (Jalgaon Dudh Sangh) अध्यक्षपदी भाजपा आमदार मंगेश चव्हाण ( MLA Mangesh Chavan) यांची बिनविरोध निवड झाली आहे.

By : चंद्रशेखर नेवे, एबीपी माझा | Edited By: गणेश लटके | Updated at : 18 Dec 2022 11:50 AM (IST)

Jalgaon Dudh Sangh

Jalgaon Dudh Sangh : अत्यंत प्रतिष्ठेच्या मानल्या गेलेल्या जळगाव जिल्हा दूध संघाच्या (Jalgaon Dudh Sangh) अध्यक्षपदी भाजपा आमदार मंगेश चव्हाण ( MLA Mangesh Chavan) यांची बिनविरोध निवड झाली आहे. या निवडणुकीत भाजप-शिंदे गटाच्या ( BJP-Shinde Group) शेतकरी सहकार पॅनलने एकनाथ खडसेंच्या (Eknath khadse) गटाचा पराभव केला होता. विशेष म्हणजे या निवडणुकीत एकनाथ खडसेंच्या पत्नी मंदा खडसे यांनी पराभवाचा धक्का बसला आहे. दरम्यान, जळगाव दूध संघाच्या अध्यक्षपदी कोणाची वर्णी लागणार, याबाबत जोरदार चर्चा सुरु होती. अखेर आमदार मंगेश चव्हाण हे दूध संघाचे अध्यक्ष झाले आहेत.

भाजप-शिंदे गटाच्या विजयात मंगेश चव्हाण यांची महत्त्वाची भूमिका

जळगाव जिल्हा दूध संघाच्या निवडणुकीत भाजप-शिंदे गटाच्या शेतकरी सहकार पॅनलने 16-4 असा विजय मिळवला होता. एकनाथ खडसेंच्या गटाला केवळ चार जागांवरच समाधान मानावं लागलं होते. त्यानंतर अध्यक्ष कोण होणार असा प्रश्न उपस्थित केला जात होता. अखेर आज भाजप आमदार मंगेश चव्हाण यांची अध्यक्षपदी निवड करण्यात आल्यानं सर्व चर्चांना पूर्ण विराम मिळाला आहे. आमदार मंगेश चव्हाण हे एकनाथ खडसे यांचे कट्टर राजकीय विरोधक मानले जातात. जळगाव जिल्हा दूध संघावर तब्बल सात वर्षे एकनाथ खडसे यांच्या नेतृत्वाखालील संचालक मंडळाची सत्ता होती. या निवडणुकीत भाजप-शिंदे गटाने एकत्र येत एकनाथ खडसेंचा दारुण पराभव केला होता. या निवडणुकीत भाजपचे आमदार मंगेश चव्हाण यांनी विजयासाठी महत्त्वाची भूमिका बजावली होती. त्यामुळं त्यांची अध्यक्षपदी वर्णी लागली आहे.

दूध संघातील एकनाथ खडसेंचा फोटो हटवला, मंत्री महाजनांची टीका

भाजप आमदार मंगेश चव्हाण दूध संघाच्या अध्यक्षपदी विराजमान होताच जिल्हा दूध संघातील एकनाथ खडसे यांचा फोटो काढण्यात आला आहे. त्यामुळं तब्बल सात वर्षापासून एकनाथ खडसे यांच्या ताब्यात असलेल्या जिल्हा दूध संघावर आता भाजप-शिंदे गटाची सत्ता आली आहे. जिल्हा दूध संघात अध्यक्षांच्या दालनात असलेल्या फोटोवरून मंत्री गिरीश महाजन यांनी पुन्हा एकदा एकनाथ खडसे यांच्यावर निशाणा साधला आहे. जिवंतपणी कसं काय कोणी कोणाचा फोटो लावू शकतो. प्रोटोकॉलनुसार महापुरुषांचे फोटो, मुख्यमंत्र्यांचा फोटो आपण या ठिकाणी लावू शकतो. मात्र एकनाथ खडसे यांचा फोटो या ठिकाणी कसा काय? असा सवालही महाजन यांनी उपस्थित केला. त्यामुळं संचालकांनी सांगितल्यानुसार खडसेंचा फोटो काढण्यात आला आहे. या फोटोची आम्हाला आता काही गरज भासत नाही असेही मंत्री गिरीश महाजन म्हणाले.

महत्त्वाच्या बातम्या: