Shravan 2020 | पाच ज्योतिर्लिंगांमध्ये आजपासून श्रावण महिन्यास सुरुवात; उत्तरेकडील राज्यांत भगवान शंकराचा जयघोष

आजपासून उत्तर भारतात भगवान शंकराला समर्पित असणाऱ्या पवित्र श्रावण महिन्यास सुरुवात झाली आहे. हा महिना हिंदू धर्मातील पवित्र महिना समजला जातो.

नवी दिल्ली : भगवान शंकराला प्रिय असणाऱ्या श्रावण महिन्याला आजपासून सुरुवात झाली आहे. हा महिना भगवान शंकराला समर्पित करण्यात येतो. हा महिना हिंदू धर्मातील पवित्र महिना असून आजपासून याला उत्तर भारतात सुरुवात होत आहे. आपल्याकडे (महाराष्ट्रात) पंचाग प्रतिपदा ते अमावस्या असा श्रावन महिना असतो तर उत्तरेकडे प्रतिपदा ते पौर्णिमा असा श्रावण महिना साजरा करतात. त्यामुळे आपल्यापेक्षा 15 दिवस आधी श्रावण महिना उत्तर भारतात सुरु होतो.

उत्तर भारतातील श्रावण महिन्यातील आजचा पहिला सोमवार. कोरोनाच्या प्रादुर्भावातही शिव मंदिरांमध्ये भाविकांची गर्दी दिसून आली. अशातच कोरोनाचा प्रादुर्भाव रोखण्यासाठी भाविकांच्या गर्दीवर नियंत्रण ठेवणं कठिण काम असणार आहे. असं असलं तरिही हा श्रावण महिना 12 ज्योतिर्लिंगांसाठी नाहीतर फक्त पाच ज्योतिर्लिंगांसाठी आजपासून श्रावण महिन्यास सुरुवात झाली आहे. उरलेल्या सात ज्योतिर्लिंगांसाठी 21 जुलैपासून श्रावण महिना सुरु होणार आहे.

श्रावण महिना 6 जुलैला सुरू होणार असून 3 ऑगस्टपर्यंत राहणार आहे. धार्मिक मान्यतेनुसार श्रावण महिन्यात येणाऱ्या सोमवारी महादेवाची पूजा, प्रार्थना केल्यानंतर आपल्या मनोकामना पूर्ण होतात. या महिन्यात शिवभक्त कावड यात्रा देखील सुरू करतात. यावेळी श्रावण महिन्यात शुभ योग असल्याचे सांगितले जात आहे. कावड यात्री या महिन्यात पायी शिवमंदिरात जाऊन महादेवाला जलाभिषेक करतात. श्रावण महिन्यात काशीमधील मंदिरांमध्ये खास तयारी केली जाते. मात्र, यंदा कोरोनाचं संकट असल्याने यावर विरजन पडण्याची शक्यता आहे.

देशात उत्तर, मध्य आणि पूर्व राज्यांमध्ये पौर्णिमेनंतर नव्या हिंदी महिन्यांना सुरुवात होते. याला पौर्णिमांत महिना असं म्हटलं जातं. मध्य प्रदेश, बिहार, राजस्थान, उत्तर प्रदेश यांसारख्या राज्यांचा यामध्ये समावेश होतो. या राज्यांमध्ये आजपासून श्रावण महिनाला सुरुवात होणार आहे. तसेच पश्चिम आणि दक्षिण भारतात आमावस्याच्या पुढच्या दिवसापासूनच नवा महिना सुरु होतो. याला अमंत महिना असं संबोधलं जातं. यामुळेच दरवर्षी गुजरात, महाराष्ट्र, आंध्रप्रदेश आणि तामिळनाडूसह दक्षिण भारतात 15 दिवसांनंतर श्रावण महिन्याला सुरुवात होते. या राज्यांमध्ये 7 ज्योतिर्लिंग येतात. येथे 21 जुलैपासून श्रावण महिन्यास सुरुवात होणार आहे.

श्रावण महिन्याचं महत्व

श्रावण हा श्रवणभक्तीचा महिना होय. श्रावणात अनेक शिवमंदिरांमध्ये कीर्तन सप्ताहांचे आयोजन केलेले असते. श्रावणी सोमवारी हमखास या शिवमंदिरांमधून कीर्तने होतात. 'हरी हरा भेद काही करू नका वाद' ही संतांची धारणा आहे. 'शिव भोळा चक्रवर्ती त्याचे पाय माझ्या माथी' असे संतांनी म्हटले आहे. श्रावणात वारकरी कीर्तन आणि हरदासी कीर्तन हमखास ऐकायला मिळाले इतकेच नव्हे तर पांडवप्रताप, शिवलीलामृत, नवनाथ, हरिविजय, जैमिनी अश्वमेध, काशीखंड आदी ग्रंथांचे वाचनाही घरोघरी होते. या ग्रंथांच्या वाचनाला 'पोथी लावणे', 'पोथी सांगणे' असे म्हणतात.

इतर बातम्या :