Amritsar: अमृतसरमध्ये गोळीबारात जखमी झालेल्या शिवसेना नेते सुधीर सूरी यांचा मृत्यू, आरोपी अटकेत
Sudhir Suri Shot Dead : सुधीर सुरी अमृतसरमधील मजीठा रोडवरील एका मंदिराबाहेर निदर्शने करत असताना त्यांच्यावर गोळीबार झाला.
Sudhir Suri Shot Dead : अमृतसरमध्ये शिवसेना नेते सुधीर सुरी यांच्यावर एका अज्ञात व्यक्तीनं दिवसाढवळ्या गोळ्या झाडल्या होत्या. या हल्ल्यामध्ये सुधीर सुरी गंभीर जखमी झाले होते. रुग्णालयात उपचारादरम्यान त्यांचा मृत्यू झाला आहे. पोलिसांनी आरोपीला बेड्या ठोकल्या आहेत.
सुधीर सुरी अमृतसरमधील मजीठा रोडवरील एका मंदिराबाहेर निदर्शने करत असताना त्यांच्यावर गोळीबार झाला. या मंदिरातील काही देवीदेवतांच्या मूर्तींची विटंबना झाल्याच्या वृत्तामुळे ते या मंदिराबाहेर निदर्शने करत होते. त्याचवेळी गर्दीमधील एका अज्ञात व्यक्तीनं त्यांच्यावर गोळीबार केला. यामध्ये सुधीर सुरी गंभीर जखमी झाले होते. सुरी यांना उपचारासाठी तात्काळ रुग्णालयात दाखल करण्यात आले होते. मात्र, उपचारानंतर त्यांची प्राणज्योत माळवली आहे. सुधीर सुरी यांच्या मृत्यूनंतर स्थानिक शिवसैनिकांमध्ये संतापाचं वातावरण आहे. पोलिसांनी याप्रकरणी एका व्यक्तीला अटक केली असून तपास सुरु आहे. पोलिसांनी आरोपीकडून बंदूक जप्त केली आहे.
याप्रकरणी बोलताना पोलिस आयुक्त म्हणाले की, 'सुधीर सूरी गोपाळ मंदिराच्या परिसरात निदर्शन करत होते. त्यावेळी त्यांच्यावर हल्ला झाला. त्यानंतर तात्काळ त्यांना रुग्णालयात दाखल केलं. पण उपचारादरम्यान त्यांचा मृत्यू झालाय. पोलिसांनी आरोपीला अटक केलं असून त्याच्याकडून बंदूक जप्त केले.' या प्रकरणी पोलीस महासंकलाक गौरव यादव यांनीही माहिती दिली. ते म्हणाले की, सुधीर सुरी यांना गोळी मारणारा संदीप सिंह याला घटनास्थळावरुन अटक केलं आहे. चौकशीमध्ये अनेक घटनेचा उलगडा होईल. पंजाबमधील जनतेला शांततेचं आवाहन करतोय. सोशल मीडियावरील अफवाकडे लक्ष देऊ नका.
सुधीर सुरी हे अमृतसरमध्ये एका मंदिराच्या बाहेर निदर्शने करत होते. त्यावेळी जमलेल्या गर्दीतून पुढे आलेल्या एकाने त्यांच्यावर गोळीबार केला. यामध्ये ते गंभीर जखमी झाले होते. उपचारादरम्यान त्यांचा मृत्यू झाला आहे. पंजाबमधील आणखी एक शिवसेना नेते अश्वनी चोप्रा यांच्यावरही गुरुवारी प्राणघातक हल्ला झाला होता. अश्वनी चोप्रा यांच्यावर गोळीबार करणारे हल्लेखोर सायकलवरुन आल्याचं सांगण्यात आलं होतं. दरम्यान, मागील काही दिवसांपासून सुधीर सुरी यांच्यावर हल्ल्याची योजना करण्यात येत होती. दिवाळीमध्येच त्यांच्यावर हल्ला करण्यात येणार होता. गेल्या माहिन्यात पोलिसांनी काही गँगस्टरला अटक केली होती. यावेळी चौकशीदरम्यान आरोपींनी खुलासा केला होता. पंजाबमध्ये एसटीएफ आणि अमृतसर पोलिसांनी एकत्र कारवाई करत महिन्याभरात चार गँगस्टरला अटक केली होती. या आरोपींची चौकशी केल्यानंतर अनेक धक्कादायक माहितीचा खुलासा झाला होता.
महत्त्वाच्या बातम्या
