बीएसएफच्या बडतर्फ जवानाचे नरेंद्र मोदींना आव्हान, वाराणसीतून समाजवादी पक्षाकडून उमेदवारी

सीमा सुरक्षा दलाच्या (बीएसएफ)जवानांना दिल्या जाणाऱ्या निकृष्ट दर्जाच्या जेवणाचा भांडाफोड करणारे बडतर्फ जवान तेज बहादूर यादव यांनी पंतप्रधान नरेंद्र मोदींविरोधात दंड थोपटले आहेत.

लखनौ : सीमा सुरक्षा दलाच्या (बीएसएफ)जवानांना दिल्या जाणाऱ्या निकृष्ट दर्जाच्या जेवणाचा भांडाफोड करणारे बडतर्फ जवान तेज बहादूर यादव यांनी पंतप्रधान नरेंद्र मोदींविरोधात दंड थोपटले आहेत. तेज बहादूर यादव यांना समाजवादी पार्टीकडून वाराणसी मतदार संघातून नरेंद्र मोदींविरोधात उमेदवारी देण्यात आली आहे. तेज बहादूर यादव हे मोदींविरोधात अपक्ष निवडणूक लढवणार होते. परंतु उमेदवारी अर्ज भरण्याच्या अखेरच्या दिवशी सपाकडून त्यांना उमेदवारी देण्यात आली आहे. जानेवारी 2017 मध्ये तेज बहादूर यांनी बीएसएफच्या जवानांना दिले जाणारे जेवण हे निकृष्ट दर्जाचे असल्याची तक्रार करणारा व्हिडीओ सोशल मीडियावर शेअर केला होता. या व्हिडीओमुळे तेज बहादूर चर्चेत आले. बीएसएफने त्यानंतर त्यांच्यावर शिस्तभंगाची कारवाई करत निलंबित केले होते. तेच तेज बहादूर युद्धाच्या मैदानातून आता निवडणुकीच्या मैदानात उतरले आहेत. मी भ्रष्टाचाराविरोधात आवाज उठवला म्हणून मला निलंबित करण्यात आले. त्यामुळे सैन्य दलातील भ्रष्टाचार संपवणे आणि सैन्यदल मजबूत करणे हे माझे ध्येय असल्याचे तेजबहादूर यांनी सांगितल.

सेना के जवान तेज़ बहादुर जी को वाराणसी से समाजवादी पार्टी का टिकट दिया गया है।

— Samajwadi Party (@samajwadiparty) April 29, 2019

समाजवादी पक्षाने सुरुवातीला शालिनी यादव यांना वाराणसी मतदारसंघातून उमेदवारी दिली होती. परंतु सपाने शेवटच्या क्षणी त्यांचा उमेदवार बदलला आहे. शालिनी या माजी काँग्रेस खासदार श्यामलाल यादव यांच्या सून आहेत.

जयहिंद मैं सोच रहा हूं क्यों ना बनारस से चुनाव लड़ा जाए मोदी जी के खिलाफ निर्दलीय मैं किसी पार्टी की गुलामी तो कर नहीं सकता

— Tej Bahadur Yadav (@iTejbahadur) March 28, 2019