राहुल गांधींचं ट्विटर हँडल बदललं, फोटोसह स्टेटसही अपडेट

एकंदरीत काँग्रेस महाअधिवेशनाचे निमित्त साधत राहुल गांधी यांच्या मीडिया टीमने ट्विटर हँडलमध्ये मोठे बदल केले आहेत.

नवी दिल्ली : काँग्रेस अध्यक्ष राहुल गांधी यांचं ट्विटर हँडल बदललं आहे. आधी ‘Office of RG’ असे ट्विटर हँडल होते. ते आता बदलून ‘Rahul Gandhi’ असे करण्यात आले आहे. शिवाय, स्टेटसमधील माहितीही बदलण्यात आली आहे. आता पूर्णत: राहुल गांधी यांचेच ट्विटर हँडल करण्यात आले आहे. स्टेटसमध्ये याआधी म्हटले होते की, हे हँडल राहुल गांधी यांच्या ऑफिसकडून चालवण्यात येते. मात्र आता “This is the official account of Rahul Gandhi | Member of Parliament | President, Indian National Congress” अशी माहिती अपडेट करण्यात आली आहे. त्याचसोबत, ट्विटर हँडलवरील राहुल गांधी यांचा फोटोही बदलण्यात आला आहे. एकंदरीत काँग्रेस महाअधिवेशनाचे निमित्त साधत राहुल गांधी यांच्या मीडिया टीमने ट्विटर हँडलमध्ये मोठे बदल केले आहेत. निवडणुकांमधील सोशल मीडियाचा प्रभाव पाहता, राहुल गांधी सोशल मीडियावरुन आधीपेक्षा अधिक सक्रीय होण्याची शक्यता आहे. दरम्यान, दिल्लीत सध्या काँग्रेसचं महाअधिवेशन सुरु आहे. राहुल गांधी यांनी काँग्रेस अध्यक्षपदाची सूत्र हाती घेतल्यानंतर, त्यांचे हे पहिलेच अधिवेशन आहे. त्यामुळे ते अधिवेशनातील भाषणातून पक्षाच्या पुढील वाटचालीची काय दिशा मांडतात, याची उत्सुकता सगळ्यांनाच लागली आहे.