1980 च्या दशकात जे घडलं ते चुकीचं होतं, शीख दंगलींवर राहुल गांधींचं मोठं वक्तव्य, म्हणाले, मी नसताना पक्षाच्या अनेक चुका झाल्या
राहुल गांधी (Rahul Gandhi) यांचा एक व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमध्ये राहुल गांधी अमेरिकेतील ब्राउन विद्यापीठातील एका कार्यक्रमात विद्यार्थ्यांशी संवाद साधच आहेत.
Rahul Gandhi on Sikh Riots : काँग्रेस नेते राहुल गांधी (Rahul Gandhi) यांचा एक व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमध्ये राहुल गांधी अमेरिकेतील ब्राउन विद्यापीठातील एका कार्यक्रमादरम्यान विद्यार्थ्यांशी बोलताना दिसत आहेत. या कार्यक्रमादरम्यान, एका शीख विद्यार्थ्याने राहुल गांधींना 1984 च्या दंगली आणि शीख मुद्द्यांवर काही प्रश्न विचारले. यावेळी बोलताना राहुल गांधी म्हणाले की, 80 च्या दशकात जे घडले ते चुकीचे होते. मी अनेक वेळा सुवर्ण मंदिराला भेट दिली आहे. भारतातील शीख समुदायाशी माझे खूप चांगले संबंध असल्याचे गांधी म्हणाले.
अमेरिकेतील ब्राउन विद्यापीठातील कार्यक्रमादरम्यान एका विद्यार्थ्याने राहुल गांधींना विचारले, की, तुम्ही म्हणालात की राजकारण निर्भय असले पाहिजे, घाबरण्यासारखे काहीही नसावे. पण आम्हाला फक्त पगडी बांधायची नाही, आम्हाला अभिव्यक्ती स्वातंत्र्य हवे आहे, जे काँग्रेस पक्षाच्या राजवटीत नव्हते. 1984 च्या दंगलीतील आरोपी सज्जन कुमार सारख्या लोकांना संरक्षण दिल्याचा आरोपही विद्यार्थ्याने केला. तसेच शीख समुदायांच्या आवाजांकडे दुर्लक्ष केल्याचा आरोप काँग्रेसवर केला.
नेमकं काय म्हणाले राहुल गांधी?
मी नसताना पक्षाच्या अनेक चुका झाल्या आहेत. काँग्रेस पक्षाच्या इतिहासात झालेल्या प्रत्येक चुकीची जबाबदारी घेण्यास ते तयार असल्याचे राहुल गांधी म्हणाले. मी जाहीरपणे म्हटले आहे की 80 च्या दशकात जे घडले ते चुकीचे होते. मी अनेक वेळा सुवर्ण मंदिराला भेट दिली आहे. भारतातील शीख समुदायाशी माझे खूप चांगले संबंध असल्याचे राहुल गांधी म्हणाले.
भाजप आयटी सेलचे प्रमुख अमित मालवीय यांची राहुल गांधींवर टीका
भाजप आयटी सेलचे प्रमुख अमित मालवीय यांनी एक व्हिडिओ शेअर करून राहुल गांधींवर टीका केली आहे. X वरील त्यांच्या पोस्टमध्ये त्यांनी लिहिले की, "एका तरुण विद्यार्थ्याने राहुल गांधींना सांगितले की तुम्ही शिखांशी चांगले वागला नाही आणि त्यांच्या गेल्या अमेरिका भेटीदरम्यान पसरलेल्या कथित भीती आणि गोंधळाची आठवण करून दिली. आता राहुल गांधी केवळ भारतातच नव्हे तर आंतरराष्ट्रीय व्यासपीठांवरही टीकेला सामोरे जात असल्याचे मालवीय म्हणाले.
महत्त्वाच्या बातम्या
