Coronavirus : देशात कोविडमुळे 3 लाख मृत्युमुखी; अमेरिका, ब्राझीलनंतर सर्वाधिक मृत्यू भारतात

कोरोनामुळे देशातील मृतांच्या आकडेवारीने आज तीन लाखांचा टप्पा पार केला आहे. सर्वाधिक मृत्यू होणाऱ्या देशांमध्ये भारत जगात तिसऱ्या स्थानावर आहे. अमेरिका आणि ब्राझीलनंतर कोरोनामुळे सर्वाधिक मृत्यू भारतात झाले आहेत.

coronavirus3

नवी दिल्ली : भारतात कोरोना संसर्गाच्या लाटेचा कहर पाहायला मिळत आहे. कोरोनामुळे देशातील मृतांच्या आकडेवारीने आज तीन लाखांचा टप्पा पार केला आहे. दुर्दैवाची बाब म्हणजे कोरोनामुळे आतापर्यंत तीन लाखांपेक्षा जास्त मृत्यू झालेल्या देशांच्या यादीतही भारताचा समावेश झाला आहे. भारतासह या यादीत अमेरिका आणि ब्राझीलचाही समावेश आहे. 

आरोग्य मंत्रालयाच्या ताज्या आकडेवारीनुसार, मागील 24 तासात 2 लाख 22 हजार 315 नव्या कोरोनाबाधितांची नोंद झाली आहे तर 4 हजार 454 कोरोनाबाधितांचा मृत्यू झाला. तर 3 लाख 02 हजार 544 जण कोरोनातून मुक्त झाले आहेत. याआधी शनिवारी (22 मे) देशात 2 लाख 40 हजार नव्या कोरोनाबाधितांची नोंद झाली होती तर 3 हजार 741 कोरोनाबाधित रुग्णांचा मृत्यू झाला होता.

जगभरात कोरोनामुळे आतापर्यंत सुमारे 35 लाख जणांचा मृत्यू झाला आहे. यामध्ये तीन लाख भारतीयांचा समावेश आहे. या हिशेबाने जगात कोरोनाने मृत्युमुखी पडणारा प्रत्येक तेरावा व्यक्ती भारतीय होता. ब्राझील आणि अमेरिकेनंतर कोरोनामुळे सर्वाधिक मृत्यू भारतात झाले आहेत. अमेरिकेते आतापर्यंत सुमारे सहा लाख आणि ब्राझीलमध्ये साडेचार लाख जणांना कोरोनामुळे बळी गेला. भारतात जगभरातील सुमारे 17 टक्के लोकसंख्या आहे.

देशात कोरोनामुळे होणारा मृत्यूदर 1.13 टक्के आहे तर रिकव्हरी रेट 88 टक्क्यांपेक्षा जास्त आहे. सक्रिय रुग्णांची संख्या घटून 11 टक्क्यांपेक्षा कमी झाली आहे. कोरोना सक्रिय रुग्णांच्या बाबतीत भारत जगात दुसऱ्या स्थानावर आहे. एकूण बाधितांच्या संख्येत भारत दुसऱ्या स्थानी आहे. 

राज्यांबद्दल बोलायचं झालं तर कोविडमुळे होणाऱ्या 73.88 टक्के मृत्यूंमध्ये महाराष्ट्र, कर्नाटक आणि तामिळनाडू या राज्यांचा वाटा आहे. सर्वाधिक मृत्यू महाराष्ट्रात झाले असून त्यानंतर कर्नाटक, तामिळनाडू, उत्तर प्रदेश, पंजाब, दिल्ली, केरळ, पश्चिम बंगाल, उत्तराखंड आणि आंध्र प्रदेश या राज्यांचा क्रम लागतो. दिवसाचा पॉझिटिव्हिटी दर कमी होऊन 11 टक्के झाला आहे.

देशात आतापर्यंत 19.49 कोटी नागरिकांना लस
देशात आतापर्यंत 19.49 कोटी जणांना कोरोना प्रतिबंधात्मक लस देण्यात आली आहे.  शनिवारी (22 मे) 18 ते 44 वयोगटातील 6 लाख 82 हजार 398 लाभार्थ्यांना लसीचा पहिला डोस देण्यात आला. 37 राज्ये आणि केंद्रशासित प्रदेशात एकूण 99 लाख 79 हजार 676 जणांना लस देण्यात आली आहे.

बिहार, राजस्थान आणि उत्तर प्रदेशात 18 ते 44 वर्षे वयोगटाच्या 10 लाखांपेक्षा जास्त जणांना लसीचा पहिला डोस देण्यात आला आहे. एकूण 19,49,51,603 जणांना लस देण्यात आली आहे. यामध्ये 97,52,422 आरोग्य कर्मचाऱ्यांना पहिला आणि 67,00,147 कर्मचाऱ्यांना दुसरा डोस देण्यात आला आहे.