Congress Rally : महागाई, बेरोजगारीविरोधात रामलीलावर काँग्रेसचा एल्गार; राहुल गांधींच्या नेतृत्त्वात मोदी सरकारविरोधात हल्लाबोल
Congress Rally : महागाई, बेरोजगारी आणि जीएसटीबाबत भाजप सरकारवर हल्लाबोल करत आज काँग्रेस दिल्लीच्या रामलीला मैदानावर रॅली काढणार आहे.
Congress Rally : राहुल गांधींच्या (Rahul Gandhi) नेतृत्त्वात आज काँग्रेस (Congress) मोदी सरकारविरोधात हल्लाबोल करणार आहे. महागाई (Inflation), जीवनावश्यक वस्तूंवरची जीएसटी आणि बेरोजगारीच्या मुद्द्यावरुन काँग्रेसचं आंदोलन आहे. 7 सप्टेंबरपासून 'भारत जोडो यात्रा' (Bharat Jodo Yatra) सुरू होण्याआधी महागाई ते बेरोजगारी आणि जीएसटीच्या मुद्द्यावरून भाजपविरोधात काँग्रेस रामलीला मैदानावर आंदोलन करणार आहे. रामलीला मैदानावर आज होणाऱ्या या रॅलीत काँग्रेसनं मोठ्या संख्येनं लोक जमल्याचा दावा केला आहे. या रॅलीत सहभागी होण्यासाठी देशभरातून काँग्रेस कार्यकर्तेही पोहोचत आहेत.
काँग्रेसच्या सूत्रांकडून मिळालेल्या माहितीनुसार, रॅलीपूर्वी सकाळी 11 वाजता पक्षाचे अनेक ज्येष्ठ नेते काँग्रेस मुख्यालयात जमणार आहेत. येथे हे सर्वजण बसमध्ये बसून रामलीला मैदानाकडे रवाना होतील. या रॅलीची तयारी पक्षानं पूर्ण केली असतानाच पोलिसांनीही सुरक्षेच्या दृष्टीने विशेष बंदोबस्त तैनात केला आहे.
भारत जोडो यात्रा 7 सप्टेंबरपासून सुरू होणार
काँग्रेसची 7 सप्टेंबरपासून कन्याकुमारी ते काश्मीर 3,500 किमी 'भारत जोडो यात्रा' सुरु होण्यापूर्वी या रॅलीचं आयोजन करण्यात आलं आहे. भारत जोडो यात्रे दरम्यान, राहुल गांधी महागाई आणि बेरोजगारी या समस्यांवर प्रकाश टाकण्यासाठी आणि जातीय सलोखा वाढवण्यासाठी देशभर प्रवास करणार आहेत. 'भारत जोडो यात्रा' हा काँग्रेस पक्षाचा आतापर्यंतचा सर्वात मोठा जनसंपर्क यात्रा आहे. ज्यामध्ये पक्षाचे नेते तळागाळातील सामान्य लोकांपर्यंत पोहोचण्याचा प्रयत्न करणार आहेत.
काँग्रेस अध्यक्षा सोनिया गांधी उपचारासाठी देशाबाहेर गेल्या असून पक्षाच्या महासचिव प्रियांका गांधीही त्यांच्यासोबत परदेशात आहेत. त्यामुळे त्या दोन्ही कार्यक्रमांत सहभागी होणार नाहीत. राहुल गांधी देखील सध्या सोनिया गांधी यांच्यासोबत परदेशात आहेत. मात्र ते शनिवारपर्यंत भारतात परत येणार आहेत.
सर्वसामान्यांचे प्रश्न आहेत : काँग्रेस
महागाई आणि बेरोजगारीवरून काँग्रेस सरकारवर हल्लाबोल करत आहे आणि म्हणत आहे की, हे सर्वसामान्यांचे प्रश्न आहेत. त्यावर सर्व मंचांवर चर्चा झाली पाहिजे. पक्ष सोडल्यानंतर काँग्रेसचे माजी नेते गुलाम नबी आझाद हे देखील जम्मूतील सैनिक फार्म येथे पहिल्या जाहीर सभेला संबोधित करणार आहेत. राजीनामा पत्रात काँग्रेस नेतृत्वावर टीका करणारे आझाद रविवारी आपला हल्ला आणखी तीव्र करू शकतात.
काँग्रेसनं मात्र, जम्मू आणि काश्मीरचे माजी मुख्यमंत्री आझाद यांची पक्ष नेतृत्वाविरुद्धची जाहीर वक्तव्य ही सत्ताधारी भाजपच्या इशाऱ्यावर सुरू केलेली "विचलित करण्याची युक्ती" असल्याचं म्हटलं आहे.
महत्त्वाच्या बातम्या
ट्रेंडिंग न्यूज
