Chhattisgarh Election 2018 : दुसऱ्या टप्प्यात 72 जागांसाठी मतदान

छत्तीसगडच्या सत्तारुढ भाजप मंत्रिमंडळातील नऊ मंत्री, विधानसभेचे अध्यक्ष आणि काँग्रेसच्या काही महत्त्वाच्या नेत्यांचं भवितव्य आज मतपेटीत बंद होणार आहे.

रायपूर : छत्तीसगड विधानसभा निवडणुकीच्या दुसऱ्या टप्प्यासाठी आज मतदान होत आहे. दुसऱ्या टप्प्यात एकूण 19 जिल्ह्यांतील 72 जागांसाठी मतदान पार पडत आहे. एक हजारापेक्षा जास्त उमेदवार यावेळी रिंगणात असून विधानसभा निवडणुकांचे निकाल 11 डिसेंबरला जाहीर होतील. एक लाख 54 हजार 596 मतदार आपला मतदानाचा हक्क बजावणार आहेत. छत्तीसगडच्या सत्तारुढ भाजप मंत्रिमंडळातील नऊ मंत्री, विधानसभेचे अध्यक्ष आणि काँग्रेसच्या काही महत्त्वाच्या नेत्यांचं भवितव्य आज मतपेटीत बंद होणार आहे. सकाळी दहा वाजेपर्यंत साडेबारा टक्के मतदानाची नोंद झाली आहे. 72 जागांसाठी भाजप आणि काँग्रेसचे प्रत्येकी 72 उमेदवार रिंगणात आहेत. याशिवाय आप (68), जनता काँग्रेस (अजित जोगी) (47), आंबेडकर पार्टी ऑफ इंडिया (एपीआय) (40), बसप (27), इतर (229), अपक्ष (493) उमेदवार निवडणूक लढवत आहेत. एकूण 1 हजार 79 उमेदवार रिंगणात असून यामध्ये 111 महिला उमेदवारांचा समावेश आहे. पहिल्या टप्प्यात 90 पैकी 18 मतदारसंघांमध्ये मतदान झालं. नक्षलग्रस्त भागातील आठ जिल्ह्यात मुख्यमंत्री रमणसिंह यांच्यासह 190 उमेदवारांचं भवितव्य मतपेटीत बंद झालं आहे.

छत्तीसगढ़ में आज दूसरे और अंतिम चरण का मतदान है। सभी मतदाताओं से मेरा निवेदन है कि वे पूरे उत्साह के साथ भारी संख्या में मतदान कर लोकतंत्र के महापर्व को सफल बनाएं।

— Narendra Modi (@narendramodi) November 20, 2018

रमणसिंह सरकार छत्तीसगड विधानसभेच्या 90 जागांपैकी 65 हून अधिक जागा जिंकत सलग चौथ्यांदा सरकार स्थापन करण्याचं भाजपचं उद्दिष्ट आहे. रमणसिंह सलग तिसऱ्यांदा सीएमच्या खुर्चीवर विराजमान झाले आहेत. चौथ्यांदा मुख्यमंत्रिपदाची माळ गळ्यात घालण्यास ते उत्सुक आहेत. तर काँग्रेस 15 वर्षांनंतर छत्तीसगडची सत्ता मिळवण्यासाठी प्रयत्नशील आहे.

छत्तीसगढ़ में आज द्वितीय व अंतिम चरण का मतदान है। मैं प्रदेशवासियों से अपील करता हूँ कि आप सभी 'पहले मतदान, फिर जलपान' को यथार्थ कर प्रातः 10:30 बजे तक अधिक से अधिक संख्या में मतदान करें और एक समृद्ध व नवा छत्तीसगढ़ के स्वप्न्न को साकार करने में अपना अमूल्य योगदान दें।

— Amit Shah (@AmitShah) November 20, 2018

छत्तीसगडमधील चित्र काय? छत्तीसगड विधानसभेत 90 आणि लोकसभेच्या 11 जागा आहेत. 2013 सालच्या विधानसभा निवडणुकीत भाजपने 49 आणि काँग्रेसने 39 जागांवर विजय मिळवला होता. तर 2014 सालच्या लोकसभा निवडणुकीत 10 जागा भाजपला आणि काँग्रेसला एक जागा मिळाली होती.