एक्स्प्लोर

Cabinet reshuffle: मोदींच्या मंत्रिमंडळात घराणेशाहीचा प्रभाव नगण्य, ज्योतिरादित्य, अनुराग ठाकूर वगळता इतरांना स्थान नाही

मोदींच्या मंत्रिमंडळात सध्या 77 जणांचं जम्बो मंत्रिमंडळ आहे. पण ज्योतिरादित्य शिंदे आणि अनुराग ठाकूर ही दोन नावं सोडली तर घराणेशाहीला वाव नाही.

By : प्रशांत कदम, एबीपी माझा | Updated at : 08 Jul 2021 01:52 PM (IST)

Cabinet reshuffle Modi's cabinet, the influence of dynasticism is negligible, except for Jyotiraditya and Anurag Thakur Cabinet reshuffle: मोदींच्या मंत्रिमंडळात घराणेशाहीचा प्रभाव नगण्य, ज्योतिरादित्य, अनुराग ठाकूर वगळता इतरांना स्थान नाही

मोदी कॅबिनेट

नवी दिल्ली : मंत्रिमंडळात वर्णी म्हटलं की आधी घराणेशाहीचा दबदबा दिसायचा. नरेंद्र मोदींच्या मंत्रिमंडळात मात्र घराणेशाही ही जमेची बाजू नव्हे तर अडचणीचा मुद्दा बनताना दिसतोय..काही मोजके अपवाद वगळता घराणेशाहीचा प्रभाव दिसणार नाही याची काळजी मोदी सातत्यानं घेत असल्याचं दिसतंय.

मोदींच्या मंत्रिमंडळात सध्या 77 जणांचं जम्बो मंत्रिमंडळ आहे. पण ज्योतिरादित्य शिंदे आणि अनुराग ठाकूर ही दोन नावं सोडली तर घराणेशाहीला वाव नाही. मोदींच्या मंत्रिमंडळ विस्ताराचं विश्लेषण करताना हा ही एक महत्वाचा अँगल समोर येतोय. प्रीतम मुंडे, वरुण गांधी, पूनम महाजन यांची नावं चर्चेत होती. पण त्यांच्यापैकी कुणालाही मंत्रिमंडळात स्थान मिळालेलं नाहीय..

काँग्रेसवर घराणेशाहीचा आरोप करणाऱ्या भाजपमध्ये घराणेशाही नाही असं अजिबात म्हणता येणार नाही..अनेक नेत्यांची मुलं खासदार, आमदार बनली आहेत. पण मोदींनी या मंत्रिमंडळ विस्तारात मात्र या घराण्यांचं प्रस्थ वाढू दिलं नाहीय. जिथं शक्य आहे तिथं नव्या नेतृत्वाला वाव दिला गेलाय..अगदी पक्षात आयात लोकांनाही संधी दिली गेलीय.

महाराष्ट्राचा विचार केला तर मुंडे-महाजन या दोन घराण्यांचं उदाहरण अगदी ठळक आहे. 2014 साली सत्ता आली तेव्हा गोपीनाथ मुंडे केंद्रात मंत्री झाले. पण त्यांच्या अकस्मित निधनानंतर त्यांच्या घरात किंवा प्रमोद महाजनांच्या घरातही मंत्रीपद दिलं गेलं नाहीय. पंकजा राज्यात मंत्री होत्या, पण दिल्लीत मात्र गेली सात वर्षे सत्ता असूनही या दोन नावांचा विचार मंत्रीपदासाठी झालेला नाहीय. पूनम महाजन यांना राष्ट्रीय युवा मोर्चाची जबाबदारी दिली होती.

नरेंद्र मोदींच्या या विस्ताराचा विचार करताना यूपीएच्या काळात घराणेशाहीचं प्रस्थ कसं वाढलं होतं याचीही तुलना व्हायला हवी. यूपीएच्या काळात सचिन पायलट, ज्योतिरादित्य शिंदे, मिलिंद देवरा, जितेन प्रसाद सिंह हे सगळे घराणेशाहीचे चेहरे एकाचवेळी मंत्रिमंडळात समाविष्ट झाले होते. मोदींनी किमान हे अस्तित्व नगण्य राहील इतकी काळजी घेतलीय हे मात्र दिसतंय.

मोदी सरकारमधील मंत्र्यांची खातेनिहाय यादी खालीलप्रमाणे :

पंतप्रधान नरेंद्र मोदींकडे विज्ञान, तंत्रज्ञान विभाग देण्यात आले आहे. अमित शाह यांच्याकडे सहकार मंत्रालयाची जबाबदारी सोपवण्यात आली आहे. तर मनसुख मांडवीय हे नवे केंद्रीय आरोग्य मंत्री आहेत.