Asansol Bypolls : बिहारी बाबू शत्रुघ्न सिन्हा होणार का बंगाली बाबू? आसनसोल लोकसभा पोटनिवडणुकीसाठी मतदान सुरू

Asansol Bypolls: तृणमूल काँग्रेसचे उमेदवार आणि अभिनेते शत्रुघ्न सिन्हा पश्चिम बंगालच्या आसनसोल लोकसभा मतदारसंघातून पोटनिवडणूक लढवत आहेत. त्यांच्याविरोधात भाजपने अग्निमित्रा पॉल यांनी उमेदवारी दिली आहे.

Shatrughan Sinha Asansol Bypolls

Asansol Bypolls : बिहारी बाबू आणि अभिनेते शुत्रघ्न सिन्हा (Shatrughan Sinha) आता बंगाली बाबू होणार का याकडे साऱ्याचं लक्ष लागलं आहे. शत्रुघ्न सिन्हा पश्चिम बंगालच्या आसनसोल मतदारसंघातून तृणमूल काँग्रेसच्या (TMC) तिकीटावर पोटनिवडणूक लढवत आहेत. तीन राज्यांतील विधानसभेच्या चार जागांसाठी आज पोटनिवडणूक होत आहे. त्यामुळे त्यांच्यासाठी आजचा दिवस महत्त्वाचा ठरणार आहे. आज सकाळी 7 वाजेपासून मतदानाला सुरुवात झाली आहे. सकाळी नऊ वाजेपर्यंत आसनसोलमध्ये 12.77 टक्के तर बालीगंगे मतदारसंघात 8 टक्के मतदान झालं आहे. 

भाजप खासदार बाबुल सुप्रियो यांच्या राजीनाम्यामुळे आसनसोल लोकसभेची जागा रिक्त झाली आहे. तृणमूल काँग्रेसने यापूर्वी कधीही आसनसोलच्या जागेवर विजय मिळवता आलेला नाही. यंदा मात्र 2019 मध्ये भाजप सोडणारे अभिनेते शत्रुघ्न सिन्हा आसनसोल मतदारसंघातील बिगर बंगाली लोकांमध्ये प्रभाव पाडून विजय मिळवतील अशी तृणमूलला आशा आहे. सिन्हा यांच्या विरोधात भाजपच्या उमेदवार अग्निमित्रा पॉल आहेत. भाजपने अनेक स्टार प्रचारकांसह आसनसोल मतदारसंघात जोरदार प्रचार केला आहे.

मी बंगाली बाबू आहे : शत्रुघ्न सिन्हा
भाजपने ममता बॅनर्जी यांच्यावर आसनसोल मतदारसंघात बाहेरच्या व्यक्तीला आणल्याचा आरोप केला होता. यावर प्रत्युत्तर देताना शत्रुघ्न सिन्हा यांनी म्हटलं की, 'मी आता फक्त 'बिहारी बाबू' राहिलो नाहीत, तर आता 'बंगाली बाबू'ही आहेत.' प्रचाराच्या भाषणातही त्यांनी अनेकदा बंगाली भाषेचा वापर केला. 

आसनसोल मतदारसंघाचा इतिहास
आसनसोल लोकसभा 1957 ते 1967 पर्यंत काँग्रेसकडे होती. त्यानंतर 1967 ते 1971 दरम्यान आसनसोल मतदारसंघ संयुक्त समाजवादी पक्षाकडे होता. माकपने 1971 ते 1980 काळात हा मतदारसंघ काबिज केला. त्यानंतर काँग्रेसने पुन्हा सत्ता काबिज करत 1989 पर्यंत महत्त्वपूर्ण मतदारसंघ ताब्यात घेतला. 1989 ते 2014 पर्यंत ही जागा सीपीआय(एम) च्या ताब्यात होती. 2014 च्या सार्वत्रिक निवडणुकीत बाबुल सुप्रियो यांनी भाजपच्या तिकीटावर पहिल्यांदा ही जागा जिंकली. बाबुल सुप्रियो 2019 मध्ये भाजपच्या तिकिटावर पुन्हा विजयी झाले, त्यानंतर ते नरेंद्र मोदी यांच्या नेतृत्वाखालील केंद्र सरकारमध्ये मंत्रीही झाले.

पश्चिम बंगालमधील 2021 च्या विधानसभा निवडणुकीनंतर बाबुल सुप्रियो यांनी भाजपला रामराम केला आणि तृणमूल काँग्रेसमध्ये प्रवेश केला. त्यानंतर पोटनिवडणूक आवश्यक असल्याने आसनसोल लोकसभेच्या सदस्यपदाचा राजीनामा दिला. यावेळी, तृणमूल कांग्रेसचे आमदार सुब्रोतो मुखर्जी यांच्या आकस्मिक निधनामुळे नोव्हेंबर 2021 मध्ये रिक्त झालेल्या बालीगंगे विधानसभा मतदारसंघासाठी पोटनिवडणूक घ्यावी लागली.

महत्त्वाच्या इतर बातम्या :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह - ABP Majha