Covaxin | भारत बायोटेकची लस 81 टक्के प्रभावी, तिसऱ्या फेजच्या अहवालातून स्पष्ट

भारत बायोटेकच्या (Bharat Biotech) कोवॅक्सिन (Covaxin) या कोरोना लसीच्या तिसऱ्या फेजचा अहवाल कंपनीने जाहीर केला असून ही लस 81 टक्के प्रभावी असल्याचा दावा केला आहे.

संग्रहित छायाचित्र

हैदराबाद: भारत बायोटेकची कोरोनाची लस कोव्हॅक्सिन ही 81 टक्के प्रभावी असल्याची माहिती कंपनीने दिली आहे. भारत बायोटेकने आपल्या कोरोनाच्या लसीच्या तिसऱ्या फेजचा अहवाल उघड केला आहे.

कोरोनावर ही लस आता 81 टक्के प्रभावी असल्याचं स्पष्ट झालं आहे असा दावा भारत बायोटेकने केला आहे. कोरोना लसीच्या तिसऱ्या फेजच्या अभ्यासासाठी एकूण 25,800 लोकांवर या लसीचा प्रयोग करण्यात आला आहे. त्यावेळी ही लस घेतलेल्या लोकांमध्ये कोणताही दुष्परिणाम दिसून आला नसल्याचंही कंपनीच्या वतीनं स्पष्ट करण्यात आलं आहे.

अॅस्ट्राझेनेका-ऑक्सफोर्डची लस ही 62 टक्के, फायझर-बायोएनटेकची लस 95 टक्के आणि मॉडर्नाची लस ही 94 टक्के प्रभावी असल्याचं सांगण्यात येतंय. जॉन्सन अॅन्ड जॉन्सन या कंपनीने त्यांची लस ही 66 टक्के प्रभावी असल्याचं सांगितलं होतं.

कोव्हॅक्सिन ही लस भारत बायोटेक, आयसीएमआर आणि नॅशनल इन्स्टिट्यूट ऑफ व्हायरॉलॉजी यांच्यावतीने संयुक्तपणे विकसित केली जात आहे. याच्या आपत्कालीन वापरासाठी या आधीच परवानगी मिळाली आहे.

भारत बायोटेकच्या Covaxin या कोरोना लसीच्या पहिल्या फेजचा पुनरावलोकन डेटा 'द लॅन्सेट' या सायन्स नियतकालिकेत प्रसिध्द करण्यात आला होता. अशा प्रकारचा डेटा प्रकाशित करणारी भारत बायोटेक ही भारतातील पहिलीच कोरोना लस निर्मिती करणारी कंपनी आहे. ICMR नेही या गोष्टीला पुष्टी दिली आहे.

भारत बायोटेकच्या पहिल्या फेजमध्ये 375 लोकांवर या लसीचा वापर करण्यात आला होता. त्यासंबंधीचा डेटा लॅन्सेटकडे जमा करण्यात आला होता. आता तो पहिल्या फेजचा डेटा लॅन्सेट या नियतकालिकेत प्रसिध्द करण्यात आला आहे. त्यामध्ये असं सांगण्यात आलं आहे की Covaxin लसीमुळे मानवी शरीरातील अॅन्टीबॉडी या क्रियाशील होतात, तसेच शरीरामधील T-cell याही क्रियाशील होतात. अॅन्टीबॉडी हे एक प्रकारचे प्रोटिन्स असतात जे मानवी शरीरातील व्हायरसविरोधात तयार होतात आणि त्या विरोधात लढतात. T-cell या कोणत्याही रोगाविरोधात लढण्यासाठी आवश्यक असणाऱ्या रोगप्रतिकारक शक्तीची निर्मिती करण्यासाठी अत्यावश्यक असतात.